واحد أعرفه كان جد جداً و ملوش فى العلاقات و الجو ده يوم ما فكر يتجوز اتجه لجواز الصالونات و ابتدى يدور على واحدة فيها كل الصفات اللي بيحلم بيها معداش وقت كبير و فعلاً لقاها محترمة و متدينة وعلى خلق وناضجة فكرياً بشكل يقوم أي علاقة اتخطبوا و فى بداية علاقتهم كل حاجة كانت تمام كان بيقولي انه شايف نفسه اكتر واحد محظوظ فى الدنيا عشان لقى كل الصفات اللي كان بيتمناها فيها.
لكن بعد حوالي شهرين بس عرفت انهم فسخوا خطوبتهم و استغربت جداً و لما قابلته و سألته ليه عملت كده رد و قالي حقيقي معرفش بالرغم من انها كانت تعتبر فتاة احلامي الا اني كنت حاسس ان في حاجة غلط ! مش فيها دي كانت ناقص تقيدلي صوابعها العشرة شمع بس برضو حسيت ان في حاجة ناقصة يمكن ف العلاقة نفسها يمكن فيا انا شخصياً مش عارف الموضوع مالوش سبب منطقي بس تقدر تقول ما ارتحتش
جاري ميلر، السياسي الامريكي كان ليه مقولة معروفة جداً قال فيها يصعب العثور على من يقول لقد كنت خائفاً الى درجة انني اسرعت إلى زوجتي محمد فعل ذلك يوم ان جاءه جبريل لابد انها كانت امرأة مميزة
الموضوع عمره ما كان صفات معينة انت عايزها او شروط لازم تكون متوفرة فى الطرف الاخر و خلاص مش معادلة محسوبة بالورقة و القلم و حسابات بالعقل و المنطق بس الواحد مننا محتاج يلاقي فى البنت اللي هيرتبط بيها مفهوم الراحة اللي ربنا اتكلم عنه فى كتابه و قال لتسكنوا اليها السكينة و الطمأنينة دول هما اللي بيخلوك ترجع بيتك بعد يوم شاق و متعب و تترمي فى حضن مراتك فترتاح و تحس ان همومك كلها نزلت من فوق كتافك مين قال ان الامان والطمأنينة احساس مقتصر على الستات بس ؟بالعكس اقوى الرجال بييجي عليهم اوقات انكسار و ضعف و بيحتاجوا يلاقوا حد يطمنهم و مش اي حد
الحد اللي يلاقوا فيه راحتهم و الخلاص من تعبهم و الامهم و حزنهم..
لو لقيت فى البنت اللي اختارتها راحتك و لو لقيت فيها سكنك وامانك و بيتك و وطنك يبقى تمسك فيها بإيديك و سنانك و تبقى غبي لو ضيعتها من ايديك :
