《7》
سالم بنبرة صوت حازمه : اقسم بالله نحبك ..
سوسن : كلمة راجل ..
سالم بي اصرار : كلمة راجل ..
سوسن : نبيك توا اتجي لشقتي .. تواا..
سالم : شقتك .. علاش؟؟..
سوسن : من غير علاش ..تعال ..
سالم : بس .. الجارات كلهم مع زوجتي في شقتي مرات تشوفني وحده منهم خاش لعندك ..
سوسن : مادخلنيش .. نبيك تواا .. و الا والله معاد تحلم تشوفني ولا تسمع صوتي .. اثبت حبك ليا و تعالى ..
سكرت سوسن بعد كملت كلامها و خلت سالم في حيره من أمره .. كيف بيمشي و كيف بيخش و شنو تبي فيه سوسن .. و لأنه سوسن بلغت في نفسه مبلغ كبير و لأنها قدرت تسيطر عليه و على تفكيره .. ولع سيارته و رجع للعماره عشان يمشي لشقتها ..
..........................
رواسي مقعمزه تفكر كيف بتتصرف و كيف بتبعد خطيبها عنها و تقاوم بوها عشان ترجع لحبيبها اللي دار كل شي على خاطرها ..
رنت رواسي على رقم خطيبها وليد .. رد عليها ..
وليد : يا هلااا .. اول مره تضربي عليا .. اكيد نحلم اني .. قبل حتى لما نتصل بيك كلمتين بالسيف و تسكري ..
رواسي بصوت هادي : اهلين وليد ..
وليد : اهلين بيك .. كيف حالك ..
رواسي : الحمدلله ..
وليد كان بيبدا اي موضوع يهدرز فيه بس فاجأته رواسي بالقنبله اللي قالتها ليه ..
رواسي : وليد اني فحياتي حد ثاني .. اني بابا غصبني عليك .. اني نبي حد تاني ..
وليد انصدم من كلامها و النار ولعت فيه و غليت في عروقه ..
رواسي قعدت تبكي : ارجوك .. ارجووك افسخ و خليها تجي منك .. بالك ربي يكتبني ليه .. ارجوك ساعدني ..
وليد حاول يمسك اعصابه حس انه كرامته في الارض و انها اهاناته...
رواسي : الووو .. وليد ...
وليد : مستحيل اللي تطلبي فيه .. بندير روحي ماسمعت شي و لا انتي قلتي شي .. و العرس في موعده .. يلا سلام ..
سكر الخط عليها .. رواسي قعدت تبكي و انهارت اخر سبيل ليها عشان ترجع لي عادل انقطع .. بينما وليد قلبه يغلي حس بالاهانه منها ..
وليد في داخله : حتندمي عليها يارواسي .. حتندمي عليها ..جايه بصحة الوجه و تقوليلي نبي حد غيرك .. نخليك تتمني الموت و ماتحصليها .. انخلي سمعتك في الارض .. تو تشوفي ..
حط التليفون و ولع سبسي حشيش و يفكر كيف بيدير فيها ..
.....................................
درس سالم سيارته بعيد عن العماره و مشى على رجليه لين وصل للعماره ..ركب في الاصانصير و كان خايف يلقى جيداء او وحده من الجارات قدام باب الشقه .. بس من حسن حظه ما كان فيه حد .. مشى يتسحب لين وصل لباب شقة سوسن و رن الجرس .. فتحت امها ..
فوزيه مدت يدها لداخل الشقه ترحب بيه : تفضل يا سالم ..
سالم استغرب عرف انه امها عندها علم بالعلاقه اللي بينه و بين بنتها ...
خش للمربوعه و قعمز فيها .. لين خشت عليه سوسن و دموعها على خدها .. سالم لما شافها قلبه فرح بشوفتها وقف ومشي لعندها و قال ..
سالم : سوسو حبيبتي .. ماتعرفيش قداش مستاحشك.. علاش درتي فيا هكي .. علاش..
