#على_درب_الله_تلاقينا (1)
يا صباح الرعب الساعه 6 وعلى المقيمين خارج مدينة الرعب المحافظة على فروق التوقيت ، درجة الحرارة فى الضل 25 وده كويس للزواحف واحتمال يبقى جو هايل للكسل ف السرير او النوم او اقولك الاحسن عمل تمرينات للمخاوفاتية اصحى اااااا يا شلبى"
*أحمد قفل المنبه*
"أسامه أخوه ع السرير التاني نايم قصاده بيتكلم بعصبيه": يابني انت مش مكسوف من المنبه الزفت الي انت عامله داه
احمد بضحك: انا بحب التفاهه دي
اسامه بعصبيه شال المخده رماها عليه : وأنا ذنبي اي ياتافه أصحى مخضوض كل يوم بالشكل داه
احمد قام من ع السرير ورد عليه وهو رايح ع للحمام: قوم قوم بطل كسل هتتأخر ع جامعتك
أسامه بغيظ: ماشي ياعم المخوفاتي
"أحمد خد شاور ولبس هدومه وراح لوالدته وهي بتجهز الفطار"
_صباح الخير ياست الكل
_صباح النور ياحبيبي
"أحمد مسك إيدها وبصلها بدهشه" : لا لا مش معقول
والدته بخضه: في اي ياواد
احمد : كل يوم بتذيدي حلاوه يخربيت كدا
ضحكت واتكسفت: روح يااحمد يابني ربنا يجبر بخاطرك زي مانت دايما جابر بخاطري كدا
احمد بفرح وهو ماسك صباع البطاطس بياكل فيه : يااه اهو بالدعوه الحلوه دي الواحد يعرف يبدأ يومه ناوليني بقى العيش كدا علشان أفطر وانزل شكلي هتأخر النهارده ع الشغل
"والدته ادتله العيش بإبتسامه"
"أسامه أخوه كان لبس وخرج قعد ع السفره جمبهم"
أسامه بغيظ: ايوا ايوا أفضلي دلعي فيه كدا كتير
والدته بابتسامه: هو أنا أقدر ادلعه ومدلعكش أذا كان هو قلبي فأنت كبدتي ها اي رأيك بقى
خرجت اختهم شيماء من الأوضه وهي بتفرك عينها ونايمه ع نفسها:
شيماء: ياصباح الخير شايفاكو بتوزعو الأعضاء يعني وانا مليش نصيب ولا اي
احمد بياكل ومستعجل : اديها المراره ياماما شيماء تستاهل كل خير
شيماء قربت وخبطته ف كتفه: لا أنا عايزه القلب ياخفيف "وبصت لوالدتها" صح ياماما مش أنا قلبك
خرج والدهم من الأوضه : أنا سامع حد بيقول قلب مفيش حد قلبها غيري
والدتهم ضحكت: كلكو قلبي قلب الأم بيساع كتير
فجأه موبايل أحمد رن
شيماء بتقرأ مين بيرن لقت مكتوب د:سمر
شيماء إدت الموبايل لاحمد وغمزتله: ايوا ياعم الي عنده صحاب بنات بيتصلو يطمنو عليه
احمد مسك منها الموبايل وادايق : تلاقيها بترن علشان اتأخرت ع المستشفى
(أحمد خريج تمريض وشغال ف مستشفى خاصه ف قسم الطوارئ )
أسامه مستغرب : طب ماترد عليها
احمد بلامبالاه: وارد عليها بتاع اي أنا مليش كلام معاها
والدته بضحك : تلاقيه مكسوف يكلمها قدامنا
احمد بعصبيه: ياجماعه أنا ولا مكسوف ولا حاجه كل الحكايه إني خلاص في طريق أنا أخترت أمشيه وإن شاء الله هقابل البنت الي أنا عايزها ع نفس الطريق
والده: وياترى طريق اي دا بقى
احمد بكل ثقه: طريق ربنا 💙
”"بقلم ملك محمد""""
__________
*ف الجهه الأخرى*
_يا صباح الرعب الساعه 6 وعلى المقيمين خارج مدينة الرعب المحافظة على فروق التوقيت ، درجة الحرارة فى الضل 25 وده كويس للزواحف واحتمال يبقى جو هايل للكسل ف السرير او النوم او اقولك الاحسن عمل تمرينات للمخاوفاتية اصحى اااااا يا شلبى"
دعاء نايمه والمنبه عمال يرن دخلت والدتها عليها قفلته
_اي يابنتي المنبه الزفت الي انتي عملاه داه دا صحا البيت كله بره
دعاء فتحت عيونها: صباح الخير ياماما
والدتها بعصبيه: صباح الخير اي بس غيري النغمه الوحشه دي وبطلي تفاهه بقى وأكبري
دعاء قعدت ع السرير وضحكت: حد يقول كدا ع كرتي البعبع بردو
والدتها بإندهاش : يعوض عليا عوض الصابرين يابنتي انتي بقيتي عروسه كفايه هبل بقى
دعاء بدهشه: عروسه ! يلهووي فرح البت نرمين النهارده ولازم اروحلها بدري
"شدت الغطا من عليها وقامت جري من ع السرير
والدتها بفقدان أمل: وانا الي بقول بكرا تعقل لا دا واضح ان حالتها بتذيد
خدت شاور وقعدت تفطر
صباح الخير يابابا: صباح النور ياقلب بابا ها نمتي كويس
والدتها بغيظ: خليك دلع فيها كدا أهي معدتش نافعه
دعاء وهي بتاكل: اي الي مزعلك بس ياأموله قالبه عليا من الصبح ليه
والدتها : أنا مش قالبه عليكي أنا زعلانه علشانك صحابك عمالين يتخطبو ويتجوزوا وانتي دماغك عنيده ومش عايزه تتلحللحي
دعاء بضحك: هو كان حد عدل جه وانا قولت لا
والدتها بعصبيه: وهيجي العدل منين بالي انتي عملاه بنفسك
دعاء بتبص لوالدها بإندهاش :بابا هو أنا فيا حاجه وانا مش واخده بالي
والدها بضحك: لا لا انتي كلك ع بعضك عسل
والدتها بعصبيه: انتو عايزين تنقطتوني صح
أنا قايمه أصحي اخواتك يفطرو
دعاء : وانا كمان هقوم ألبس علشان متأخرش ع نرمين
"دخلت دعاء تلبس
واقفه بتكلم ف نفسها قدام المرايه
لبست الخمار وحطت النقاب ع وشها وقالت
وها قد أكتمل القمر يااختي عليا عثل يااخواتي
اختها نور بتبص عليها بأستغراب : هو فين القمر بالظبط انتي مش ظاهر منك حاجه
دعاء بصتلها وبكل فخر قالت: لا ماهو القمر الي بجد مستخبي تحت النقاب لواحد بس هو الي يشوفه
نور بضحك: وفين الي أمه داعيه عليه داه
دعاء بكل ثقه: هقابله أكيد ع نفس الطريق
نور باستغراب : طريق اي
دعاء : طريق ربنا 💙
