قصة حقيقية باللهجة العراقية تتكلم عن فتاة لم تحظى بطفولة دافئة في احضان والدتها و بدل ذلك عاشت ايام مليئة بالرعب و المعاناة بسبب تصرفات والدتها الغريبة ..
و هل سترى السعادة مع حبيبها إم سيعذبها مثل الباقين ...
لا تقرأ النبذة التعريفية و تحكم على الر...
مرحبا ... أنا اسمي لارا اليوم راح اسولفلكم قصتي الي من الممكن ان تجذب فضولكم حتى تعرفون شنو راح يصير بنهاية وياي ... أني بنية من مواليد 2001 بشرتي حنطاوية و عيوني عسلي و كبار و اني الجبيرة باخواتي و اخواني و رغم جنت صغيرة بهواي احداث صارت بس عقلي جبير و اكبر من عمري و اتذكر كل التفاصيل الي صارت ، بابا مواليد 1974 و ماما مواليد 1983 عندي خمس خوات و ثنين اخوان .. أما بالنسبة لاهل بابا فعندي خمس عمات و ثنين عمام .. عائلة بسيطة و عادية لحد وقت معين تغيرت حياتنة بيوم واحد و انقلبت راس على عقب و كل شي بعد هذا اليوم تغير .. هذا اليوم المشؤوم جان عرس عمي الي ورا مباشرة تشخبطت حياتنة .. جنت واكفة كدام المراية الي بالغرفة و اباوع لروحي فرحانة هواااي بابا اشترالي هدوم جداد علمود عرس عمو و طالعة بيهن حلوووة متحمسة البسهن شوكت يجي العرس و البسهن و يشوفني البنات .. هنة عبارة عن تنورة سودة و فانيلة بيجي و فوكاهن يلك بيجي .. كلش حلووات فجاءة اجت ماما و كامت تصيح علية لان لابستهن : " لارا وج لارا تعالي نزعي الهدوم راح توصخيهن و بالعرس تجي البنات حلوة و انتي هدومج مو حلوووات .. تعالي لارا وج راح تمردين الهدوم "
ركضت لبابا و اصيح : " بابا .. بابا شوف ماما تريد تبسطني ما تخليني البس الهدوم الجديدات "
بابا كام يضحك و كال لماما : " عوفيهة سارة خلتتونس بيهن شوية و نوب تنزعهن .. راح اخذها افرهة شوية و اجي و من نرجع هي تنزعهن .. مو لارا !! "
كيفت و كتلة : " اي بابا بس نرجع انزعهن والله "
Oops! This image does not follow our content guidelines. To continue publishing, please remove it or upload a different image.
اخذني و رحنة لبيت عمتي بيتهة مو بعيد علينة و اني وبابا دائما نروح يمهة .. رجعنة للبيت و صدك نزعت الهدوم و ضميتهن ما ردتهن يتوصخن .. و مر الاسبوع و اجة عرس عمي و اني فرحانة راح البس اهدومي الجدد .. عدة العرس على خير و الحمد لله واني طلعت حلوة و مثل اي عرس عراقي هوسة و زفة و ناس هواي .. طبعا عمي عرس ببيتنة و كبرت عائلتنة صار عمي و مرتة و عائلتي و بيبيتي طبعا مرتة عمي كرايبنة مو غريبة امي و مرت عمي و بيبتي كلهن كرايب بس ما شاء الله العداوة الي بينهن لو غريبات مو هيج .. بيبتي الله يغفر ذنبهة متسلطة و ابوي شتريد يسويلهة صح غلط هو وراهة و دائما المشاكل مشتعلة بين امي و ابوي بسببهة ... ابوي يحب النسوان حيل و عند علاقات هوااي بالرغم من حب امي الة جانت تحب حيييل و بخبال و هو اخر همة هي او حتى حبهة الة بارد ، عصبي و اهم شيء صاحباتة و الي منهن كرايبنة و بينة و بينهن ملح و زاد و بما انو امي ما الهة قدرة على ابوي و هو عايش حياتة بمزاجة و هوى هي تجي تطلع حركة قلبهة و قهرهة بينة احنة جهالهة ... صحيح حياتنة جانت ما خالية من المشاكل " الي اغلبهن اذا مو كلهن بسبب بيبيتي " قبل لا يتزوج عمي بس من تزوج عمي زادت مشاكلنة و صارت بيبتي و مرت عمي في جهة و امي وحدهة صار بيتنة عبارة عن جبهة و هن خلصنهة حروب بيناتهن و ما اكول هيج لانها امي او ادافع عنهة بس لأن عقلي جبير و ما احتاج واحد يدليني الصح من الغلط جانت امي مظلومة دائما كلهم يتحدون عليهة بيبيتي و مرت عمي و من يرجع عمي يوسوسلة يروح يبسط امي .. الي زاد المشاكل كون مرت عمي خبيثة و بخيلة حيل و بما انو احنة عايشين ببيت واحد كلنا جان الصرف على البيت و المسواك يتقاسموا عمي و ابوي و من جان عمي يجيب المسواك تضمة مرتة و تتبلة على امي و لهذا السبب عمي كام يطب للبيت و يطلع يضرب بامي و يهين بيهة .. سمعتهة اكثر من مرة تشكي لابوي و تكلة انو عمي يضربهة بس هي جانت اخر همة و كل مرة جان يضربهة بدل ما يدافع عنهة و يوكف وياهة جان يوكف وياهم عليهة و يكعدون يشكون الة منهة و يتبلون عليهة و هو بدون سؤال و لا معرفة عن المشكلة يضربهة .. لسة اذكر لمن جان يدخل للغرفة بليل و يقفل الباب عليهة و يشبعهة ضرب بالحزام يمثل بيهة انواع العذاب و من يطلع اروح اشوفهة مكسرة تكسر و هي ما بيدهة شي غير البجي ما جنت اكدر انام كل يوم بليل اسمعهة تتعذب و مو بيدي اسوي شي او حتى اساعدهة ... طبعا البعض منكم ما راح يصدك انو اكو رجال يكرهة مرتة لهدرجة او حتى يعنفهة بهلطريقة حتى لو جان يكرهة .. بس ابوي غيرر ابوي يعتبر نفسة مجبور على امي لهذا السبب هو مسوي حياتهة جحيم .. ابوي جان يحب وحدة و خطبهة اكثر من مرة و درس جامعة و خلص و هو ينتظرهة توظف و هو ينتظرهة بس اهلهة جانوا يرفضوا بالرغم من انو هم كرايب بس جانوا يرفضون على اساس بنتهم عدهة مرض خطير و مرضهة يجبرهة ما تزوج و لهذا السبب بيبيتي الله يغفر ذنبهة كالتلة هو قحط نسوان الا ازوجك و اكسر خشومهم و لهذا السبب ابوي اتزوج امي جبر و راحت السنين الي انتظر بيهة حبيبتة على الخالي بلاش مثل ما نكول لهذا السبب هو يكرهة امي لان هو يعتبرها مثل غلطة بحياتة لأنها مجرد شي مجبور علية ..
استمرت معاناة امي وية ابوي و بيبيتي و عمي و مرتة جانت وحيدة و مظلومة ما عدهة سند لا اخو لا رجل يسندهة .. حاربوهة حيل منعوهة من كل شيء حتى وصلت بيهم النذالة الى انو يحرموهة من الاكل جنت اشوفهة من تكعد بليل بالبوكة تاكل و كأنو هي جاي تسوي جريمة تعذبت هواي انظلمت هواي .. سنة كاملة من العذاب عاشت امي بالجحيم عيروهة حتى بينة .. جانت بيبتي و مرتة عمي يصيحلهة ام البنات لان جان عدهة بس 3 بنات و ما عدهة ولد .. بديت اشوفة امي تضعف و تنكسر راحت شخصيتهة و ثقتهة بنفسهة دمروهة كل شيء كلهم كلهم دمروهة خصوصا ابوي حطمها مرد قلبهة بخيانات و علاقاتة و صديقاتة .. و خباثة بيبيتي و مرتة عمي من جهة .. و عمي الي عالم ثاني .. و كأنو اي واحد مهموم ما عاجبة شي ضايج او مزعوج يجي يطلع ضيم ضوجتة و قهرة بامي .. وهي لا حول و لا قوة و لو حاولت تدافع عن نفسهة اجتمعوا عليهة و ضربوهة .. يتبع ....
اتمنى عجبكم الجزء الاول لا تنسون التصويت و مشاركة القصة و رايكم بالكومنتس البطلة بانتظارتعليقاتكم
