حبيبي المجهول

24

فوت وقراءه ممتعهه بحبكممممم♥️🌚
الحلقة 24
حبيبي المجهول
على: طيب يالا انا جاي معاك
راحو الاتنين وقابلهم خالد واخدهم علي الاوضه اللي ليلي فيها
خبط ودخل علي ودخل وراه ادهم وبص لمراته اللي بقاله شهرين ماشفهاش
وهيا بصتله نظره طويله مش عارفه تحدد فيها اي حاجه
واحشها ____ بتحبه ____ بتكرهه ____ عايزاه ___ ايه بالظبط هيا مش عارفه
ادهم واقف هيتجنن عليها عايز يجري يضمها
عايز يحط راسه علي صدرها
عايز يشم ريحتها
عايز يقرب منها
عايز حبيبته في حضنه
عايز وعايز وعايز بس مش بايده حاجه
دخل ووقف ومعرفش يقول حاجه وهيا دمعه نزلت منها مسحتها
ادهم: انتي كويسه؟؟
ملقيش حاجه يقولها غير دي
ليلي: الحمد لله
علي: ربنا يقومك بالسلامه يا بنتي ويحفظك انتي واللي جاي ده يالا شدي حيلك بقي وهاتيه بسرعه
ليلي: ربنا يسهل يا عمي
على: ان شاءالله هيسهلك وهتقومي بالسلامه وكل حاجه هتبقي كويسه
ليلي كل شويه بتجيلها الطلقه بتتعب وتتالم جامد لحد ما تعدي
واول طلقه جاتلها ادهم جري عليها ومسك ايدها وهيا اتعلقت في ايده وضغطت عليها بكل قوتها لحد ما عدت فسابت ايده
وجعها كان بيوجعه هو اكتر منها
كان جنبها وشاركها كل لحظه الم
كان بيراقب الجهاز والشاشه اللي بتقيس نبض البيبي والشاشه اللي بتقيس الطلقات وبتبين الطلقه وهيا هتيجي قاعد جنبها وبيمسك ايديها وهيا بتتعلق فيه
الطلقه المره دي طولت جامد وهيا ماسكه فيه
ليلي: ااااه هموت __ هموت يا ادهم هموت
ادهم: لا يا قلبي بعد الشر عليكي هانت اهي خلاص هانت
ادهم بيحاول يخفف عنها ويهديها لحد ما تعدي
واول ما عدت ليلي سابت نفسها في حضنه
يااااااه قد ايه اشتاقت للحضن ده!!! قد ايه اشتاقت لضمته دي!!! للمسه ايديه علي جسمها؟ لانها تسمع نبضات قلبه وهيا نايمه علي صدره
وادهم ضمها زي ما يكون غريق واخيرا اتعلق بحاجه
هو ده ملجأ الامان بتاعه _ هو ده بيته ومكانه ومن غيره تايه ومرمي في شارع _ هو ده حبه
وحشته جدا وحشته لدرجه ان قلبه بيوجع
بصت لفوق وهو بصلها وقرب منها لحد ما لمس شفايفها اللي اشتاقلهم
وللحظه ليلي اندمجت معاه بس فجأه صوره دولي قدامها فبعدت عنه
ادهم: ليلي!!!
معرفش يقول ايه؟ فسكت وخاف انها تبعده
كفايه انه جنبها وده المهم دلوقتي
التعب بدا يزيد فراح للدكتوره
ادهم: وبعدين سيادتك هتسيبيها تعبانه كده؟ اعملي حاجه ولو مش عارفه هنقلها مستشفي تانيه
الدكتورة كشفت علي ليلي بهدوء جنن ادهم
الدكتورة: دي ولاده يعني الم وتعب ووجع ومفيش حاجه اقدر اعملها غير الانتظار الا لو حبيت اني اولدها قيصري!؟ اختاروا
ادهم: لو ده هينهي المها ولديها
الدكتورة: هينهي المها حاليا بس
ادهم: يعني ايه؟
الدكتورة: يعني القيصريه ما بتتعبش في الولاده بس بنفتح بطنها وبنفتح الرحم علشان نخرج البيبي وبيبدا تعبها بعد الولاده ولا بتقدر تتحرك او تقوم او تقعد وكل حركه بمليون الم والم وبتاخد علي الاقل اسبوع كده والرحم علشان يلتئم ويرجع لوضعه عايز علي الاقل 6 شهور
اما الطبيعي فبتتعب كام ساعه لحد لحظه خروج البيبي وبيبقي الم لا يحتمل بس بينتهي مع خروج البيبي وبعد ساعه بتقوم وتتحرك وتشيل ابنها والولاده انتهت
فاختار تعب ساعتين ولا فتح بطن مع مخاطر الجراحه
ادهم سكت ومردش
الدكتورة: عارفه ان الموضوع مؤلم بس معلش نستحمل وبعدين امور مراتك طبيعيه كلها
وضع البيبي كويس استجابه الرحم كويس
وبمعدل الطلقات دي خلاص قربنا
ادهم: طيب مافيش حاجه تسرع الموضوع بحيث ما تفضلش تتالم كتير؟؟
الدكتورة: في لو عايزين
طلبت الدكتورة من الممرضه تديها حقنه طلق صناعي وقالتلها تجهزها خلاص
واول ما خرجوا وسابوهم
ليلي: خايف عليا اتوجع؟؟؟ الوجع اللي انت وجعتهولي يا ادهم اكبر عندي مليون مره من الوجع ده
انت وجعتني بايدك
ادهم: حقك عليا ليلي انا مستعد عمري كله افضل اتاسفلك بس سامحيني
ملحقتش ترد لانها صرخت وبدات تولد
اخدوها لاوضه العمليات وهيا متعلقه في ادهم ومسكاه ومش عايزه تسيبه
ليلي: خليك معايا ما تسيبنيش __ اوعي تسيبني _ لو هموت عايز اموت وانت جنبي ماتسيبنيش
ادهم: ليلي مش هسيبك بس انتي داخله العمليات
ليلي بتعيط ومتعلقه فيه: انا خايفه ماتسيبنيش
الكل بيبصلهم باستغراب
الحب اللي بينهم كبير فعلا طب ليه هما بعيد عن بعض
سؤال محير الكل
الدكتورة: خليك معاها الظاهر ان انت بتديها القوه والشجاعه انها تواجه الالم تعال معاها