نجاة : لا لا شي ، مغير نفكر في فرح بنتك خايفة تنقص شي حاجة ،بس ،
اسماعيل : كل حاجة وجبناها وان شاءالله تنستري مع ضيوفك وننسترو معا بنتك ونتهنو عليها ،
نجاة : ان شاءالله يارب ،
اسماعيل مازال منقد عليها وقال : ي ولية كنك ؟ حالتك مش عاجبتني ، في شي نا ما نعلم بيه !؟
نجاة تنهدت وطفت عالشاهي وحطت البراد ونادت بنتها : ي نسمة جيبي الطواسي وين رحتي ؟
علي خشت نسمة جايبتهن : اهو جبتنن ي ماما ، ماقلتي اغسليهن كويس ، !!
وخذهن نجاة ونسمة مشت لخواتها ،
نجاة لزوجها : والله ي حاج شن بنقولك !! في موضوع يخص ولدك ونا مش عاجبني ،
اسماعيل : شنو في احكي ؟
نجاة : ولدك شكله يبي روعه بنت خوك ،
اسماعيل بفرحة : يازين ما اختار ،
نجاة بصدمة : كيف يازين من اختار ؟ شنو تقولى؟
اسماعيل عصب : وكنها بمت خوي شن يغيبها ؟
نجاة بقرنت حواجبها وقالت : خشاها مايعيبها شي لكن ماتناسب ولدي ، .
اسماعيل سقم قمعيزته بعد ماكان متكي وقال : وعليش ي حنه ماتناسب ولدك ؟
نجاة : انت ناسي ان البنت مطلقة والا كيف ؟
اسماعيل بهزوة : وشن فيها؟ اول وحده والا اخر وحده ؟ بنت خوي صغيرة امداداتها ماساع عاطو فيهن حتى كلمة ،
نجاة : انا نبي لولدي بنت بنوت ،، عاد اول فرحة ليا ياخذ وحده مطلقة !!!
اسماعيل : بالله ريحينا من دوتك الزايدة ، يعني رافضتها عشان خذاها راجل قبل ولدك ؟
نجاة : هادا عيبها الوحيد ، وكان يبيها ياخذها الثانية ، مش مانعاته وليد واحد ونتمنى نشوفه عريس ومعبي الحوش اعويلة والشرع محلله يتجوز اربعه ، عادي ناخذلة بنت بنوت وبعدها كان يبي بنت عمه ناخذوها له ،
اسماعيل عصب وقال : ريت هالطاهر الشريف اللي تبيله بنت بنوت وهو ياما مصيع برا في تونس وغيرها ، ريتي ي ولية ولدي كان يبي بنت خوي وعلي الطلاق ناخذها له وزواج علي بنت خوي لاااا لا يجوز قبلها ولا بعدها ،، فاااهمة !؟
نجاة : لاااا ي حاج تحلف بالطلاااق عليااا ؟؟ مش كان بنت خوك معناها تجبر ولدي ياخذها وهي ماشية ومروحة ،، البنت ماعندي فيها مانقول لكن ولدي مصيع والا ايش ماكان يدير الراجل مايعيره شي ،، بتجوز والف بنت تتمناه ،
اسماعيل صبا وهو متنرفز وقال : لااا بتعانديني مالا ؟ بعد درتيها تو تشوفي كلامي والا كلامك اللي بيمشي !
وطلع وخلاها تواجي عمتكن نجاة خايفة ولدها ياخذ بنت عمه المطلقة وهي تبيله بنت بنوت اااخ من التفكير السطحي واللي مافيه طعمة ،، عرب ماتعرفن كيف تفكر ،
#جميلة_في_عالم_الذئاب 26
Start from the beginning
