ياما الحب نده علي قلبي مردش قلبي جواب ...
كنت بشرب قهوتي كالعاده في المكان اللي بحبه الصبح بدري ، سرحانه في صوت الست وهي بتغني ، المكان مش كلاسيكي ولا حاجه بس هما علشان يعرفوني ف كل ما اجي اشرب قهوتي الصبح بيشغلولي الأغنيه دي بالذات ...
خلصت قهوتي وقولت أقوم انزل أتمشي شويه في الجو الحلو ده ويمكن الدنيا تمطر ، فجأه لاقيت واحد شد الكرسي وقعد وقالي ...
_ صباح الخير ، أنا أحمد قررت نشرب فنجان قهوه سوا النهارده ، قهوتك تركي مظبوط صح ولا تشربي كابتشينو ؟
برفعة حاجب ونرفذه ..
_ إنت مين وإزاي تقعد كده وإزاي تسمح لنفسك كده ؟
_ قولتلك أنا أحمد ، واحد من معجبينك ، تسمحيلي نشرب قهوه
_ وإنت مين قالك إني بشرب مع حد من معجبيني قهوه ؟ إنت إنسان سخيف
_ أنا عايزه أناقشك في أخر كتاب مش أكتر ونشرب فنجان قهوه
أخدت شنطتي ومشيت ...
نرلت وطول الطريق عماله افكر هو انا كنت سخيفه ولا لا ، ماهو برضو مكنش ينفع يقعد كده من غير يستأذن وده كمان عايز يشرب قهوه ، مجنون ده !
___________
سرحت في صوت أم كلثوم وهي بتقول " ياما عيون شغلوني لكن ولا شغلوني ، إلا عيونك إنت دول بس اللي خدوني "
إنتبهت للويتر جمبي وهو بيحطلي القهوه والورد والكتاب ، ضحك وقالي كالعاده ال ownr بيقول لحضرتك صباح الخير ..
_ صباح النور ، والله ما أعرف ليه كل الورد ده كل يوم ، إشكرهولي لو سمحت
_ يافندم حضرتك منورانا ومستر أحمد بيوصي لحضرتك كل يوم علي الورد وكتاب مختلف ، حضرتك بتشرفينا كل يوم ولازم حاجه خاصه للي بيحبونا
_ شكرا جدا وإشكرلي مستر احمد كتيير
ياتري بيبعتلي ورد كل يوم علشان أنا زبونتهم فعلا ، طب إزاي الكتاب النهارده هو " رسائل إلي ميلينا " إزاي بيعرف بحب إيه ؟
فتحت الكتاب بهدوء تلقائيا لاقيتني بشم الورق ، كنت بدور علي ريحته ، لاقيتها !
كإنه كان حاضن الكتاب !
بس المره دي لاقيته سايبلي ورقه في الكتاب
" تسمحي أشاركك فنجان قهوه "
ضحكت ، ضحكت لحد ما إتكسفت
_ نهال إزيك ، جيت تاني علشان نشرب قهوه ، أنا أحمد بتاع إمبارح
_ إنت تاني يا بني ادم ، حقيقي إنت سخيف
_ إستني بس رايحه فين
_ معرفش أنا إزاي بيدخلوا ناس قليلة الذوق في المكان المحترم ده
___________
مسكت الورقه طول اليوم وبتخيله ، بقاله 3 شهور بيبعتلي كل يوم ورده وكتاب ، كل يوم بيقولي بشكل مختلف " أنا عارفك "
فاكره من شهر لما سابلي ع الترابيزه جمب القهوه ورقه صغيره مكتوب فيها " يامسدس طلقته ناعمه " وقتها إدايقت لا حسيت إنه بيلعب معايا وزعلت ، فضلت أسبوعين مروحش المكان ، لحد ماحسيت إن المكان وحشني ، كدابه !
كان هو اللي وحشني ، الورد والكتب ، مغازلته علي الورق
مشوفتوش ولا أعرف ملامحه بس أكيد حلو زي زوقه في الكتب والأغاني ...
روحت بعدها ، جابولي القهوه وصوت عبد الحليم كان بيقول " علي قد الشوق اللي في عيوني ياجميل سلم "
كل مره بحسه بيكلمني بألغاز ، مزهقتش مره إني مروحش
كنت بروح ، كنت عايزه اشوف المجهول ده .....
____________
_ صباح الخير يافندم ، تشربي قهوتك دلوقتي ولا هتقرأي الأول ؟
_ هاتلي قهوه
كنت هقوله ناديلي مستر أحمد بس مكنش ينفع ، مش أنا اللي هطلب أقابله ، هو قالي تسمحي نشرب قهوه ومجاش ولا إتكلم
_ صباح الخير للمره التالته يانهال ، ممكن نشرب قهوه بقي ؟
_ إنت تاني ! طب انا هناديلك ال ownr لو سمحت ، لو سمحت انا عايزه مستر أحمد
_ يافندم مستر أحمد قاعد قدام حضرتك أهو
_ مستر أحمد مين !؟ إنت !
مشيت !
ضحكت ، طب إزاي ، بيهزر معايا
وأنا اللي كنت بقوله إنت سخيف ، غبيه ، وطلب مني 3 مرات نشرب قهوه وانا مركزتش ومركزتش حتي في إسمه !
طلعت البيت وفضلت باصه للسما ، لاقيت رساله علي موبايلي
" تسمحي نشرب قهوه سوا بكره الصبح مع الورد والكتب وأم كلثوم ، هستناكي الساعه 9 "
قلبي دق جامد ، هو !
ملامحه هاديه اووي ، أسمراني وعيونه عسلي ، مش طويل ورفيع ، كان لابس قميص سماوي اخر مره شوفته ...
________
رجلي مش قادره تتحرك ، مش عارفه أخطي خطوه !
مكسوفه
انا هرجع ، هرجع وانا قدام الكافيه
انا هطلع وهقوله شكرا وهمشي
لاقيت صوت بيناديني
_ نهال ؟
كان هو ، إتجمدت مكاني
كان واقف وبيبصلي وبيضحك
طلعت وقعدت إستنيته
_ صباح الخير يافندم ، مستر أحمد بيقول لحضرتك لو تتفضلي في البار هو بيعملك القهوه
_ ليه هو اللي بيعملها ؟
_ قهوة حضرتك يافندم طول الوقت مكنش حد بيعملها غيره ، إتفضلي هو مستنيكي
بيعملي القهوه كمان !
والورد والكتب !
كان واقف علي البار وبيعملها بصلي وقالي إتفضلي ، عملها بكل هدوء ، كل حركه إتحركها في الوقت ده حسيتها بين ضلوعي !
مد ليا إيده بالقهوه وقالي تسمعي حليم ولا ام كلثوم ؟
قولتله علي ذوقك هسمع ...
صوت الست كان حلو أووي وهي بتقول " أهل الحب صحيح مساكين "
_ إستنيتك كتييير
_ أنا كنت عايزه أعرفك من زمان بس كنت بتصر تفضل مجهول
_ خرجت وقولتلك تسمحي نشرب قهوه طلعت سخيف !
إتكسفت وضحكت
_ سخيف اووي صح ؟
_ مستر أحمد مقصدش
_ أحمد بس من غير مستر ، أنا بحبك ، تسمحي نشرب قهوتنا كل يوم الصبح سوا ؟
_ أحمد أنا بحبك 💙
#_حكايات_فريد
