ميمونة والكورونا😂

الجزء (2)

امي:وعليش

محمود:قال ماانسجمش امعاها تصنع واجد وتدلع واجد

امي:وهذا اللي تبوه جيل هالوقت

محمود:والله ماني عارف كلنا استغربنا بس هو قال السبب هذا والله واعلم كان فيه حاجة اخرى ماقالهش

أمي:ربي ايقوي نصيبه ويعطيه بنت الحلال اللي اتسر قلبه وخاطره

محمود:ان شاءلله والله أنور شاب اكويس بكل لكن اللي صار كلنا استغربناه ووجعنا لطة شينة

أمي:ايوا ربي ماايجيبها الواحد وان شاءلله نفرح بيك وبخوتك

محمود:ان شاءلله

أمي:مازالت كنتي ماكملت قرليتها عشان انطلعو الفرح

محمود:السمستر هذا اخر سمستر وبعدين تمشي اتحددي

أمي:والله نهار مبروك يوم مانمشي انحدد فرحك

محمود:ان شاءلله

نا كنت جنبهم نغسل في الدواسات بس مش مركزة في تخريفهم همي كله انكمل هالحوسة عشان نبدى في الغداء وانكمله قبل ماايروحو وبعد الغداء بنرقى للسطوح انكنسة وانلمه وننزل انعقم الحوش كله 🙄

كملت الدواسات ونشرتهن وخشيت للكوجينة بنبدى في الغداء

/
/

أمي:كان ربي ايهنيني علي خيتك وايجيها نصيبها

محمود:ربي كريم وبعدين هي مش مضايقتنا قاعدة امعانا وفوق روسنا

أمي:عارفة لكن بنتريح عليها البنت في الاول والاخير مالها الا حوش راجلها

محمود:ربي ايفرج ومازالت اصغيرة ونصيبها توا ايجي غير كان تفتك من هالطيابة الزايدة والدروشة بس

امي:ان شاءلله لكن هذا طبع ياما نصحت لكن مافيش فايدة

/
/

نابديت في الغداء ووتيته كله ووتيت الصفر لان مستحيل انديرو صفرة وحدة ولا صفرتين كيف الناس ديما ياثلاثة يا اربعة عشان ديما امزرقين امعاهم اضيوف 🤦‍♀️

عاد وتيت الصفر وعالظهر بدو الاول الاول ايجي وطبعا زي كل يوم امعاهم اثنين ولا ثلاثة
وابدي ياميمونة اخدمي عليهم شيئ الغداء وبعدها الغسالة وشاهي الغداء وعقمي كل مكان خشو فيه واجري عالحمامات وكله خايفة من هالكورونا اللي ارعبت هالعالم كله الا خوتي هازيين عالوضع 😒

وبعد روحو اصحابهم خشيت للمربوعة وضميتها وخليتهم كلهم يغسلو ايديهم وعقمتهم الهم ورقدو 🤣
ونا رقيت فوق السطوح بنلمه وانكنسه لي يومين عليه والقبلي مخليه فضيحة 😤
قشطت محرمتي وخذيت المكنسة واللمامة وقبعت سروايلي ورقيت وبديت انكنس فيه
ووبعد اذان العصر بشوي سمعت بابنا ايدق وكنت عارفتهم كلهم مرقدين وامي اتفرج عالاخبار ماحتى افتحت الباب🤦‍♀️
ماعاد فيه امفيت ميمونة تنزل مالدور الثالث عشان اتحل الباب
نزلت ونا انهزب

نا:عليك بخت حتى الباب ماينحل لين اتحله ميمونة ان شاءلله اتموت ميمونة عشان انشوفكم ايش اديرو 😡

فتحت الباب والقيت ???

#يتبع

ازعمك من جاهم 🤔

أسفة لو فيه لخبطة في الأسماء وأكيد رأيكن ايهمني😉

گـتـابـتـي Koka Saleh