مبرر خيانة

حلقة 10🔥

ياسين:: تريحي شوي  توا تلحقي عندهن العلم بجيتك  لكن من ناس لتجي مقدرنش يقعدن معاك

-لا توا احسن نبي نمشي نشوف سلوى قلبي بياكلني عليها...

ياسين :: برحتك... انا توا طالع ، وكان تبوا شي ناديني

هزيت راسي له وصبيت ومعي سندس طلعت للخيمه صبايا ...شفت سلوى وامها في حاله ويعزن فيهن صبايا ..  حضنته وبدينا نتباكوا على فقدتنا لي اغلى اب... ماهو لي كيفك ياعمي صافي مايعيشش الموت تخطفه بدري...

سلوى تحضن في ... ينعلي يابراء بابا راااااح خلاص معش في دلااااالي يابراااء وعزوتي راااااااح  من ينوضني صبح وجايب فطوري ويقولي يلا  افطري وجهزي روحك لقرايتك .... حي عللللي انا كيف بنعيش بلاه كييييييييف قوووووولووولي كيف نوض من نومي ومنلقش كيف نطلع من جامعتي وميروحش بي  كيييف في طريق مايقولش شنو خذت بنيتي ماناقصها شي كييييف ياااااهوووو قولولي كذبه وتوا يطلع.. حي علي انا بعد نغمض عيوني نشوفه قدامي يضحك يااااروحي انا توا تحت ترااااب العيون سماح الضحكه قاااعده بين عيووووني قزنتني يااابااابااا  ....

موقفتش وبكت دنيا كلها .... ادعيله ياعمري توا ماينفعه لتقولي فيه الله غالب قهرنا كلنا  لكن فكري كيف توفى لا الم ولا وجع صلى فجر وهو ساجد راكع لربي وطلعت روحه ربي يرزقنا بحسن الخاتمه زيه عيشي كيف مارباك وسلم خوتك وامك متقهرش روحك وتوجعي هو اول ليلة في قبره مايوصله شي توا الا دعاء له .... قولي لا إله الا الله وترحمي عليه...

سلوى تبكي :: بس هذا بابا يابراء عمك صافي لكان يحبك ويعامل فيك زي بنته راااااح خلاص

-الله يرحمه ويسامحه .. هذا حال دنيا  الموت ماتاخذ الا زين ..يلا سلم خيتي صبي اغسلي وجهك وصلي وادعيله يلااااا

سندتها وطلعتها للحمام تتوضأ بلغصب ...عزيت امها وهي تصلي وتدعي

حطيت راسها على حضني نمسحلها على شعرها عند  مارقدت غطيتها وصبيت للناس لتعزي...

_________

اليوم ثالث يوم العزاء خفت شوي  زحمة  الناس كنت في مطبخ مع بنات  نقص في خبزة العصور ناداني سراج

سراج:: شوفي باتك يبيك حاولت نساعده لكن يبيك انتِ

-وين قاعد  هو وخالد وينه خلى يشوفه

سراج:: في حوشكم القديم ،، خالد من امس رايح مش عارف وين اختفى ...عطيني سخان كبير نبي لرجاله قبل ماتطلعي ...وبعدها لفي من باب للورا عشان من قدام في رجاله...

جبت لي يريده ..وطلعت من باب الخلفي   شفت حوشنا والحنين رجعني لي سنين فاتوا عمري ماكنت  نتوقع اني ح نحن لي هذك الأيام  طقيت مرتين فتح ........

يعقوب... 

نصدمت من شوفته رغم كل سنين لي مرو هبت مشاعر من جديد قلبي ليزيد نبضه اول مايشوفه وجسمي ليرجف ..لساني ليجمد كل شي صحى من نظرة  العيون لتلاقن لما فتح الباب...