براء ربي لعالم معزتك عندي كيف سلوى لكن يابنتي لصار حرام انتوا خوت ربيناكم على هك منعرفش القصه من امتا بينكم لكان يعقوب تحمل كل مسئوليه قال لي خالد انه تلفون له وانك ماتعرفي بشي وانه فاهم غلط ... وقبل تقاتلوا هو وخوه عليك وانا ام ميرضنش عيالي يصير فيهم هكِ ... سألتك بالله تبعدي عنهم كان ياسين ولا يعقوب انحرمت منهم هم الأثنين واحد هاجر والأخر مانشوفش فيه الا بعد كم شهر من خدمته في صحراء ...
كلامها كمل على مزعلتش لكن إنتهيت معها الحق انا شن ندير هنا خلاص مش مكاني انا وجعت الكل بس والله مانقصد انا لعنة دخلت حياتهم وفككتها زي عيلتي يمكن زي ماتقول امي انا بنت حرام
________
طلعت وماقلتش شي اكثر من كلمة سامحيني ....مش ناقصني حد يدعي على ..انا من يحضني من يمسح دمعتي من يجبر كسرتي ... كلكم ماتفكروش الا في اروحكم وانا لكسرني وخرب حياتي تفكيري باالكل الا نفسي لي ليها حق على مافكرتش فيها ....
خشيت حوشنا شفت اولاد فريحه وفتحيه .. سلمت عليهم وعلى امهاتهم...
فتحية :: من شوي كيف جينا ..وكنا نبوا نطلعوا عندكم من في غادي في شن يديرن
- اقاربهم وجيران ...
فريحه:: كنك وجك اصفر وليش جايه توا مش الليله عشاء
- تعبانه ونبي نرقد ...
خشيت لدلر وصكرت باب مرقدتش كل لي جواتي أسئلة ومفش من يجاوب عليهم غيره هو ؟ !
______
في ليل نسمع في فوضى صغار وامهاتهم ....طلعت نقعد معاهم ..
فريحه تخنق في بنتها من قالك تلحقيني انا قتلك ديري بالك على خوتك مش تفضحيني قدام ناس
البنت تعيط مش قادر تتنفس تستنجد بإيديها .... فكيتها منها ...وانا نشوف في عيونها نفس نظرة لي مستحيل ننسها أمي💔
جسمي رعش ...حضنت البنت وهديتها شربت ميه وزي اي طفله شوي وبدت تلعب مع صغار
انتِ من جدك كيف تضربي بنتك على سبب تافه
فريحه:: خلها تتربى كان ماسمعت كلامي توا امتا تبي تسمعه العار هذي مش قادره تمسك اخوتها والله مزال ماشبعتش منها ضرب توا تشوف
-شنو الاسلوب متخلف هذا هذي طفله شن فهمها بعقدك وامراضك النفسيه لطلعيهم عليها ... بدال ماتاخذي درس من طفولتنا السوده جايه تربي عيالك على نفس المنهج ...
فتحيه:: حرام عليك فريحه كسرتي بخاطر البنت مزال صغيره تهددي فيها بطريقه هذي
- والنبي فكني من فلسفه ومياعه زايده وكنها تربيتنا الحمدالله كنا نخافوا ومانقدروا نرفعوا عيونه لا في بونا ولا امنا وليقولوها لنا نموتوا عليها خلها تتعلم على حالها هذي بنت شن اخرتها يعني غير كوجينه والصغار
أنت تقرأ
مبرر خيانة
Romanceهل يوجد للخيانة مبرر ؟ قصة حب كبيرة جدا تدخل فيها الخيانة بلغلط ؟ فما مصير حبهم ؟ رواية من داخل المجتمع الليبي ؟ للكاتبة : هامي
حلقة 9🔥
ابدأ من البداية
