للحب حروب أيضآ ( روايات ليبية )

حلقة 10🔥

رواية (#للحب_حروب_أيضا)

قصة سميه & مراد

"10"

بديت انرد كيف قبل ورديت انت مراد الي انحبه والي يحبني ويخاف عليا ويهتم بيا
ع قد ماكنت فرحانه ع قد ماخفت من الي جاي
تميت كل مانفرح انخاف لدرجة اني ندكر الي صار بينا ونبكي حتى وانا فرحانه
كان خاطري انحطك في دار ونسكر عليك مانخليش حد يجي يشورك
لا هلك يعاركوك ولا اصحابك ايجروك للحشيش والشرب ولا بنات يشوفنك انا وبس معاك
انا صبحك وليلك وبكاك وضحكك وتفكيرك واملك ومستقبلك
انا وبس كل شي في حياتك
ردت ضحكتي لين هلي استغربو
ماما :يابنتي انتي عندك انفصام ولا حاجه
-هههههه عليش
ماما :لك فتره بكاوات ونكد واليوم جوك سمح وتضحكي
نهى :اها اليوم ماشالله تضحك
-حاسديني انتم ولا شني
اميمه :سميه تليفونك ايرن
-هيا توا انجي
مشيت شفت تليفوني لقيتها فاطمه صاحبتي
فاطمه :هامغوليه شنجك
-تمااام بكل
فاطمه :الله اكبر شن صاير ف الدنيا
-هههههههخ تاريتني كنت منكديه بكل
فاطمه :يعني مش حاسه بروحك ههههه
-لا ﻷني روحي كانت رايحه مني
فاطمه :هههههههه شن جو سومه العاشق هضا ..باهي ولقيتيها ولالا
-اها واخيرا
فاطمه:قصدك رديتو
-اها هههههه
فاطمه :يناعلي واخيرا وكيف صار
حكيتلها ع الي صار وكيف ردينا لبعضنا بعدها صكرت وفتحت النت لقيت صديقتي من سوريا انت معرفني عليها دازتلي
--سيمو قالي مراد رجعتو
-اها الحمدلله
--عنجد هو بيحبك كان دايما بحكيلي انو بيحبك بس ظروفو صعبه
-حتى انا والله انحبه
--بعرف ..الحمدلله رجعتو بس ادا زعلك هالزنخ بس اوليلي
-ههههههههه انشالله
--بعرفو غليز بس والله بيحبك ديري بالك عليه
-انشالله ..تسلميلي حبيبه
البنت الوحيده الي ماكنتش نغير منها ﻷنها صافيه ونعتبروها اختنا الكبيره كنت ديمه لما نتزاعلو نمشي نشكيلها وتوقف معايا ضدك
ولعند توا رغم الي صار بينا انت بعدت وهي مزالت رفيقتي وتصبر فيا ع فراقك
المهم شويه وفتحت انت الفيس
مراد:عبيتي انحبببببك
-انموت فيك شنجونا
مراد:فوق الريح
-شنوووو
مراد:لا والله ريح صافي
-ههههخهه نحسابه
مراد:بعدين بنكلمك عندي عرم دوا
-امباه حبيبي
مراد:ردتلي حياتي تعرفي
-وانا ردتلي حياتي تعرف
مراد:نوعدك معش نسيبك بكل
-ونوعدك انحبك طول عمري
مراد:عيدميلادك قريب ايجي
-اها مزال عليه يومين ..هلي مدايرين عزومه كبيره
مراد:اوووووو هيد ميلاد البرنسيسه حتى هو
-ههههههه لا والله غير ماما عازمه ع حوشنا مادرنش لمه لما حولنا قالتلي بالمره انديروها يوم عيد ميلادك
مراد:تي حوشكم له قريب 5شهور توا خطرلكم
-اهو شن تقول عاد ..حظي بيش يجيني عيد سمح
مراد:تي كونه عيدك هضا بس يخليه احلى يوم
-ياروحي انت نجك ليا ..تي الحوش يبي برمه سمحه ماعندش نيه بكل
مراد:ماتعبيش روحك توا كل شي يندار
-انشالله ..
مراد :انجيك يوم عيد ميلادك
-تي والله لو تجي معش نبي عيدميلاد بكل
مراد:انشالله ياروحي يجي يوم انديروه مع بعضنا
-انشالله
مراد:اسمعي توا بنطلع انا وف الليل انكلمك
-اوكي حبيبي رد بالك ع روحك
مراد:انشالله ..انحبك
-انموت فيك
سكرت الفيس وطلعت مع هلي بديت نبرم ع الحوش نظام تنكيت وتقليع كل وحده فينا انا وخواتي اتدير في حاجه وماحوتك كملنا لعند الساعه 11 ف الليل
كنت حاطه تليفوني ع الصالون
امنيه :المعزوق هضا يرن
بحتت في اميمه لقيتها اتفنص فيا واتشايرلي ع التليفون
فهمت انك انت يامراد الي ترن
صبيت خديت التليفون وخشيت لداري
-ايوا حبيبي
مراد:اهلين ياعمري شنجوك
-تمام بكل توا كيف كملت حوسه
مراد:يعطيك الصحه اعويناتي وانا توا كيف روحت دوشت وكلمتك
-حمام الهنا ياعمري
مراد:سلمك ياقلبي .. نطلب منك طلب
-اطلب اعويناتي
مراد :اقري معايا
-شن نقرى !!
مراد:سورة الفاتحه
-ههههههه استغفر الله ياربي عليش
مراد:غير ديري الي قتلك عليه بس قولي ورايا
قعدت انت تقرى وانا نرد وراك لين صدق الله العظيم
-ها قرينا قولي عليش
مراد :اوعديني الفاتحه هدي تبقى بيننا لين نقروها يوم ماتكوني مرتي
-نجك ليا نوعدك ياعمري
مراد:انحبك والله انحبك
-والله انموت فيك ..مراد نسألك سؤال
مراد:شنو حبيبي
-مزلت تحشش وتسكر
مراد:لا والله من العيد ماخش فمي
-الحمدلله وشن خلاك اتوقف
مراد:يوم الكبيره كنت ساهر انا والشباب صحابي وشربنا .. روحت للحوش متأخر ع أساس كلهم راقدين لقيت امي تراجي فيا
فطنتلي وشمة بنتي وقالتلي غاضبه عليك لين انموت من وقتها وانا معش جيت شوره كل مانبي نشرب ولا نحشش تخطر عليا كلمة امي وهزيبتها وبكاها ع حالي ودعاها عليا
-بجد تستاهل
مراد:عارف روحي بس بجد تعبت من روحي
-ربي يفكك منه
مراد : امين حبيبي
-حي هديل قالتلي سيبت سراج
مراد:اها لهم فتره
-حرام يحبو بعضهم
مراد:تي صغار هما مزالو ع الحب ..تي هي مانظني ترقد الا بقصه من امها
-ههههههههههه حرام عليك صغيره هي بس عاقله
مراد: تي نحنا الكبار ماعندنا عقل بيجي للصغار
-ربي يكملني بعقلي ادوي ع روحك
مراد:يناعلي من العقل انا
هدرزنا وحكينا ع الي فات وع حياتي كيف كانت بدونك وحياتك كيف كانت بدوني ..حكينا وحكينا لين فصل الرصيد خشينا رقدنا
جا يوم عيد ميلادي الي كان احلى يوم في حياتي لمة العيله ووجودك انت في حياتي واهتمامك بيا والراحه والفرحه
كان يوم يهبل مانقدرش نوصفه من اوله ﻷخره ايهبل
كل ماندكره توا نضحك ونبكي في نفس الوقت
مشى اليوم وطفيت شمعة عيدي ال19وخشيت ف ال20 جاني عيد من احلى الاعياد
صح ماكنتش معايا وماجبتليش هديه بس كنت كل ساعه ترن عليا وتقولي كل عام وانتي بخير انحبك
وفي الليل فتحت الفيس لقيتك دازلي (كل عام وانتي عمري ومعايا انحبك ياعبيتي ونور حياتي )
عدا اليوم بفرحه وراحه وتاني يوم صار اسوء كابوس في حياتي والي قعدت عليه 3شهور وبكرا تعرفو شن صار ....

يتبع

تقييمكم ♥