Power of Seven

Kabanata 3

Pagdilat ko ng mga mata ko ay nakita kong naibaba ko na ang pantalon ng lalaking hinuhubran ko hanggang tuhod niya at may anim na lalaking nakatingin sa akin. Nanlalaki ang mga mata ko, gusto kong magpalamon sa lupa, kung panaginip lang ito ay kailangan ko nang magising dahil sobra talagang nakakahiya.

"Hindi ko rin alam basta pagkababa ko nakita ko siyang hinuhubraan si Juno habang nakapikit kaya tinawag ko kayong lahat. Baka magse-sex sila?" Kibit-balikat niyang sabi na wala man lang pag-aalinlangan sa akusasyon niya.

Nagpantig ang tainga ko sa sinabi ng mukhang pinakabata sa kanilang lahat, siya rin kasi ang pinakamaliit kaya sa palagay ko siya ang bunso sa loob ng Mansyon. Nakatulala lang akong nanlalaki ang mga mata habang nakikipagtitigan sa kanila, hindi ko alam kung ano ang ire-react ko.

Kaya siguro naisip ng lalaking ito na gagawa kami ng milagro dahil sa posisyon namin, naibaba ko na kasi ang pantalon ng kaibigan niya hanggang tuhod nito, habang nakayakap sa sarili niya. Mapagkakamalan nga kaming gagawa ng 'di kanais-nais kahit na sino ang makakita sa amin.

"Ikaw mali 'yang iniisip mo ah," Dinuro-duro ko siya. "Para sa kaalaman mo, pumasok lang naman itong kaibigan niyo sa loob ng refrigerator niyo nang makita ako," depensa ko.

"Ah, baka natakot sa 'yo kasi ang panget mo," Tumaas ang dugo ko sa aking ulo dahil sa mga narinig ko, kalalaking tao ng batang 'to hindi marunong gumalang ng babae.

Tumayo ako para harapin ang batang nambastos sa akin, umismid lang ito at parang nanghahamon. Mga demonyo yata ang mga magiging amo ko sa loob ng mansyon, lalo na ang isang ito, napakabastos ng bibig, kung putulan ko kaya ng sungay ang isang 'to. Tingnan lang natin kung lumabas pa ang pagiging demonyito ng batang 'to.

"Huwag kang magtatangkang lumapit sa amin," babala ng lalaking nakasando, nakapamulsa at naka-undercut ito ng gupit. Nakasuot ito ng sando na hapit sa matipuno niyang katawan, 'di mo aakalain na labing-walong taong gulang lang ang isang ito.

Kilala ko siya, siya ang lalaking pinapaiwas sa akin ni Mr. Philip, sa lahat ng mga aalagaan ko sa kanya dapat ako mag-ingat. Kaya wala akong nagawa kundi bahagyang umatras, ayokong magpadalos-dalos at magpadala sa bugso ng damdamin ko, baka hindi ko magustuhan kung anuman ang puwedeng sunod na mangyari.

"Sino ka at anong pakay mo?" maangas nitong sabi, malalim ang boses niya, lalaking-lalaki. Nakakunot-noo pa nga nang tanungin niya ko.

"Ako po 'yung kasambahay na ipinadala ni Mr. Philip, nandito ako para pagsilbihan kayo. Ako si Ayeng Dela Cruz, 'Ayeng' nalang po ang itawag niyo sa akin," pagpapakilala ko at sagot narin sa tanong niya.

"Pati ba naman pangalan panget," muling hirit ng isa, napataas ang isang kilay ko, pasalamat siya at malayo siya sa akin kundi masasabunutan ko talaga siya, wala na ba siyang alam na salita kundi panget?

"Hoy, batang spoiled brat, kahit anong sabihin mo, maganda ako, pinanganak akong maganda, mamamatay akong maganda," hinawi ko ang buhok ko, napapalakpak ang nakashort lang na isang lalaki sa likod.

"Gusto mo threesome tayo nila Juno, sali ako?" Nagtaas pa ito ng isa niyang kamay, nasa likod lang siya ng lalaking maraming tattoo at nang pinakabata sa kanila. "Promise! Masisiyahan ka." Ngumiti ito ng abot-langit, bigla kong nandiri, gano'n ba ang tingin niya sa lahat ng mga babae?

"Babae ang kausap niyo mga bro, maging maginoo kayo, tigilan niyo na ang pang-aasar sa kanya," pagtatanggol sa akin ng lalaking nakasuot ng salamin gamit ang malumanay niyang boses. May bangs ito na hanggang taas lang ng kilay ang haba, matangos ang ilong, kasing pula nang mansanas ang manipis niyang labi at bumagay ang manipis at malinis nitong kilay sa maamo at maliit niyang mukha.