خواطر فتاة مسلمة الجزء الثاني

الـحُـب💜💍

_فضلًا وليس أمرًا تقرأي كل كلمة بقلبك لحد الآخر_

صل على النبي يا غالية🌸

أول حاجة هتكلم عنها هل الحب حرام ولا حلال؟!

انتي مش محتاجة شيخ ولا محتاجة أي حد فى الدنيا يجاوبك على السؤال ده بالذات

اقعدي كدة مع نفسك وفكري هو انا لو محافظة على نفسي الحمدلله ودايما بغض بصري عن الشباب وقلبي ده مفيهوش أي حد بس فجأة غصب عني كنت ماشية فى الشارع لوحدي وحصلت معايا مشكلة وشاب ساعدني ولقيت نفسي والله فجأة كدة قلبي بيدق من ناحيته بس انا بجد مش قصدي وعرفت ان كدة حرام💔

فين الحرام فى كدة؟!!

ازاي مجرد دقة قلب أو شوية مشاعر ربنا زرعها فيكي وتبقى حرام..وازاي أصلا نقول على كلمة جميلة جدا زي دي انها حرام..
ازاي وحَّشنا الحب أوي كدة وخليناه عامل زي اللعبة اللي بنلعب بيها شوية وبعدين نزهق منها

الحب ده حاجة لا أكبر شاعر يعرف يوصفه ولا أكبر عاشق يعرف يديله حقه

لما تبقي ماشية مبحلقة فى اللي بتحبيه ولما تبقي عمالة تتكلمي معاه وتفضلي تفكري فيه 24 ساعة وناسية نفسك وربك واخرتك يبقى فعلا ده الحرام

لما تبقي فى كل مرة تستغني عن حاجة غالية فيكي مقابل الحب يبقى ده الحرام

لما تبقي بتكلميه وانتي واثقة أوي من نفسك وتقولي أصل بابا وماما عارفين يبقى ده الحرام

لانك باختصار كل همك مشاعرك واحتياجاتك ومبصيتيش غير لنفسك وللناس..

انتي متخيلة انك بصيتي للناس ومبصيتيش لربك ولا لاخرتك👌🏻💔

بصيتي انك حبيتي فقولتي طب وفيها ايه لما اكلمه طالما الكلام بينا بحدود

بصيتي انك طالما كدة سعيدة فى القرب منه يبقى البعد عنه مستحيل

انتي ظلمتي نفسك يا بنتي صدقيني..واللي بتقرأ كلامي وهي لسة مرتبطة بواحد تحت مُسمى الحب فانتي والله بتظلمي نفسك وبتموتيها بالبطئ

البنت اللي اتكلمت عنها فوق خالص اللي هي حبت غصب عنها واللي أكيد في منها كتير الحمدلله بيقرأوا كلامي

طول ما انتي محافظة على نفسك وعلى قلبك وبتعملي اللي ربنا أمرك به يبقى متخافيش يا جميلة

بس هقولك على شوية حاجات تعمليها علشان ميتحولش الحب الحلال ده لحب حرام

حصل اللي حصل ولقيتي نفسك فجأة قلبك اتعلق بواحد

1/استودعيه عند الله "يعني هتسيبي الشخص ده كدة لله..عارفة لما مثلا تبقى حاجة غالية جدا عليكي وتحطيها فى مكان مستحيل حد يعرفه وتقفلي عليها كويس وتبقي مطَّمنة ان مستحيل حد ياخدها وهترجعي تلاقيها مكانها تاني؟!..
ولله المثل الأعظم والأجمل والأرحم..
انتي لما هتسيبي الشخص ده كدة لله فاتأكدي يا بنتي انه لو خير ليكي هيبقى من نصيبك"