الغزالة في عرين الاسد

الكاتبة#فيد عبدالله(١)

مسااء الورد ياورد شلونكم يا ارقى متابعين مشتاقتلكم هووواي،،اتركم بالبارت الاول من قصتنة الرائعة واتمنا من كل قلبي تدعمونهة بتصويتكم لان كلللش جميلة

البارت الاول
فيد عبد الله

ريم ،سماني ابوية هالاسم تيمنا بعيوني جانن حلوات وكلش كبار على كولتة يشبهن عيون الريم ,,,,البنية الوحيدة بنص خمس اخوان فشي اكيد جنت المدللة مالتهم بس بحدود بحكم عاداتنة وتقاليدنة وية اهلنة كرابتنة الي نعيش بنصهم،،، ماخذين منطقة كاملة بيهة كيعانة وبساتين باطراف محافظة.....وكلهة كرايب اعمام واخوال وواولاد عم وهوسة، ابوية عند ٤ اخوان وهووعمي حسين توم بس عمي حسين الاكبر وهوالي استلم الشيخة بعد جدي الله يرحمةلان ابوية مريض ومالة خلك وظل يدير بيهة بكل حق وعدل والناس تحبة وتحترم حجاية لان يخاف الله كلش ووياه ايدة اليمنى ابنة (حمزة) وااااه ياحمزة ،،،،،،اسم على مسمى هيبة وكشخة وجمال جنت اعشقة بداخلي وضامة حبة بكلبي سر حلو اسرح بي تالي الليل كل بنات عمي يشردن منة ويخافنة الا اني احب حتى خوفي منة صح هو ما يصيح ولا يضرب بس نضرتة جانت رصاصة تخليك تموت بمكانك يخوف ببرودة متتوقع رد فعلة شنو وعقابة قاسي ويدمر الاعصاب هيج جنت اسمع من اخواني جنت انطرة لو اجانة يمر للديوانية واظل اتمعن بي من ورة الشباك اذكر مرة لمحني وخزرني خزرة خلتني امووت وكعت يومين بالفراش من الخوفة منة ومن خواني لو دروا بية فتحت البردة واتمعنت بي ، كملت ثالث متوسط بدراستي وكعدوني لان الاعدادية بعيدة والمنطقة كلهة كرايب عدنة زحمة انطب ونطلع رغم اني ناعمة كلش ممبين علية كبر ابد بس هاي عادتنة بعد واني ما ناقشت لان طبعي مااناقش ابد شيكولون اكول بي مصلحتي وهمة اعرف،،، هذا طبعي جان وطبع كل بناتنة واتعلمت بكعدتي اطبخ واعجن واخبز لان امي تعبت وصرت اني ام البيت وكلهة تشهدلي بنضافتي واكلي الطيب وشوية شوية صرت الاعتماد علية وخاصة من طاح ابوي مريض وعرفنة عندة سرطان بالامعاء امي صار وكتهة كلة الة تداري بي وهو سودة علية ذبل وخلص واني عمري يروح وياه جنت اشوفة امان الدنيا كلهة عمرة ما زعلني ولا ضوجني ولو عاطوا خواني بالشقة بية يصيح بيهم ما يرضة ومن فقدتة انتهيت وملخت روحي اتذكر اتخربط كلش واخذوه للمستشفى ويومين واتوفى من اجانة الخبر اتهسترت و طلعت بلا وعي ركضت للباب واصيح جذب وشالي نازل من راسي وحافية ركضت خطوتين وانجريت حيل من ايدي التفتت حمزة سحبني ودخلني للحوش وعيونة دم تريد تاكلني وعاصر زندي حيل ثواني راح حيلي بيهن منا صدمتي ومنا خوفي منة بعدة هستوة يفتح حلكة يحجي واني انسحبت روحي وطحت بيدة ماحسيت الا خالتي ترش مي بوجهي شهكت وكعدت اريد استوعب شصار ،،،ووعاني صوت النسوان وعياطهن كمت املخ بروحي والمصيبة صوتي انمسح واختفى بس دموعي كامت تنزل واملخ بروحي خالتي انتبهتلي اخذتني للغرفة وتهدء بية وتقرالي قران واني صرت ارجف مثل السعفة ،وكعت كلش بايام الفاتحة كمت مااكدر اشيل روحي من الفراش الصخونة موتتني وبلعومي مشحط احسة ومايطلع صوتي لحد يوم الثالث كفوا الفاتحة واجوي خواني من الجادر سودة علية انتهوا تعب والعالم انكلبت علينة اول طبتهم علية للغرفة حضني اخوية الجبير علي ويطبطب على ضهري وخواني داير مدايري شهكت ابجي بحضنة