عِشق الشيوخ | مكتملة.

الفصل السابع عشر

🌸 التتمة 263 🌸

عقدات سيدرا تحت صدرها بشرود ... وكتتفكر حوارها مع هشام وردة فعلها ..
من وقتها وهي هازة هاد الحمل الثقيل على ظهرها ..
باغيا تقول لكلشي أن عصام ولد عمتها ودمهم دم واحد ... وفنفس الوقت عارفة هشام ماغايبغيش .. وغاتجبد لهم المشاكل مع بعض ....
لقات راسها مضطرة تسكت وتحطات بين نارين ... الا فلتات من وحدة غاتطيح فالأخرى ...
عمرها حسات بهاد الرابط القوي بينها وبين عصام .. واخا خو زوجها .. حتى للوقت لي عرفاتو ابن عمتها .. عاد بان لها الرابط العائلي الخفي لي كان جامع بيناتهم ..
سهات فالبعيد ... مافيقها غير صوت نجمة ...
نجمة :~ هيه ..  سيدرا ...
رمشات عينيها و تركيزها رجع ... وشافت ف نجمة .. كتبتسم بصعوبة....
سيدرا :~ هانا معك ..
كانت نجمة عاقدة حواجبها بانزعاج كاتشوف ف المرآة .. والتفت ناحية سيدرا ..
نجمة :~ شوفي .. هاد الخط د الايلاينر د هاد العين جا هابط .. و لاخر بان طالع ... قادي ليا واحد فيهم .... (قلبات فمها)نتي كتعرفي لهادشي مزيان .. ...
رجعات سيدرا هزات قلم الايلاينر ... و دورات ليها وجهها .. كاتمسح واحد فيه ...
امراتها برقة ...
سيدرا :~ سدي عينيك بزوج باش نشوف ...
سدات نجمة عيونها  .. عاضة على شفاهها بسعادة ...
حتى قادات لها سيدرا ... ودارت كاتشوف راسها ف المرايا مرة اخرى .... حطات يديها بإرتجاف على قلبها ... ودارت كاتشوف ف سيدرا ...
نجمة :~ ناري ... انا خايفة ا سيدرا ... مخلوعة ... (هزات ل سيدرا يديها) قيسي قلبي ...
حطات سيدرا يديها على قلب نجمة وهي كاضحك .. وحسات بدقات قلبها المتسارعة .... وتكلمات بنبرة مازحة ..
سيدرا :~ ايوا لي شافك يقول أول مرة اتشوفيه ... ( ابتسمت بشرود) حتى انا حسيت هكاك المرة اللولة .. (شدات لها فيديها الباردين وزيرات عليهم) ماكاين لاش توتري كلشي غايدوز مزيان ..
مطات نجمة شفايفها وهزات كتافها مرات متتالية ..
نجمة :~ وا..  الزواج هذا .. راه ماشي بحال بحال .. قادت احمر الشفاه مجدداً وهزات كتافها كتهضر فنفس الوقت ...
نجمة:~ الشيخ الكبير بغا وأخيراً.... (رجعات دارت عند سيدرا) وعصام قال ليا حتى هشام ماكانش باغي كيبان لي كنا غالطين .. غير كان خايفو يتفلى عليا يمكن ...
اختفت ابتسامة سيدرا وشردات مجدداً ... تنهدات بثقل بلا ماتجاوب نجمة .... اكتفت انها تهز راسها ب اه كأنها كتأكد كلامها ...
وقفات نجمة ... وغمزاتها ...
نجمة :~ شفتي .. كنتو غالطين حتى ف عصام .. ماكانش باغي يتفلى عليا ....
ابتسمت سيدرا بشرود ... ردات عليها بصوت منخفض ..
سيدرا :~ بصح كنت غالطة... كنت غالطة ف بزاف د الحوايج..
ابتسمت نجمة بعفوية ... وغمزاتها ..
نجمة:~ دابا عصام ولا واحد منا ..و غايولي من عائلتك كثر ..
تنهدات سيدرا ورجعات عينيها ل نجمة و هي كاتبتسم .. و كاتقاد لها شعرها ...
سيدرا :~ اه .. هو اصلا من العائلة ...
بلعات باقي كلامها ... وضغطات على جفونها ...
حركات نجمة راسها بتوتر ... وشافت جهة الباب ....
نجمة :~ و لا .. عرفت دابا هو لوسك ... و دابا غايولي راجل ختك ... ولادك دابا اتكون عندهم خالتهم مزوجة بعمهم .. ( غمضات عين وحدة بتخمين ) امم شنو ايقولو ليا خالتي ولا مرات عمي ؟ ...
انهت نجمة كلامها وهي كاتضحك بمرح ... اما سيدرا ابتسامتها اختفت بمجرد ماجبدات نجمة موضوع الولاد ..
بدون شعور دارت يدها اسفل بطنها .. و قلبها انقبض عليها ..
هاد القضية مخلياها هازة هم كبير فوق كتافها ... علاش ماحملاتش هاد المدة كاملة ... واخا قطعات موانع الحمل وماكاين والو ..
تنهدات ... وشافت ف نجمة لي كاتشوف ف المرآة .. رجعات ابتسمت رغما عنها ... ماباغاش تخسر نهار ختها ... شافت فيها نجمة من المرايا و هضرات معها ..
نجمة :~ جيت زوينة ياك ؟
ابتسمت سيدرا بحنان وغمضات عينيها ...
سيدرا :~ فنة ... ما شاء الله .. (قدات لها الحزام) ما سماوك نجمة حتى نجمة ...
ابتسمت نجمة بخجل قبل ماتدخل مهم .. و تطلب منهم ينزلو لتحت ...
نزلات نجمة بالزغاريد و الصلاة و السلام... حتى وصلات للصالة د العيالات ...