🌸 عشق الشيوخ 🌸
✏ يسرى الرفاعي
✏زوي
✏ فاطمة اليوسفي
#الفصل_17
فغرت سيدرا فمها بتعجب ... و لكن ثواني فقط و ضحكات ... الكلام لي قال ماقدراتش تستوعبه ..
حطات يديها على ذقنه مجدداً .. وماقادراش تحبس ضحكتها ...
سيدرا:~ بلاما تبقى ضحك معايا باش نبعد عليك ... (رفعات حاجبها الأيسر) راه ماغاديش نتفرق معاك حتى تقول ليا السبب ..
واخا الظلام .. بانو ملامحه قاتمين لها ..وتنهيدة مثقلة خرجات من جوفه ..
هشام:~ ماكنضحكش ...
وسعات عينيها وشافت فيه بنظرة مذهولة ..
سيدرا:~ شنو ؟ ك .. كيف ... كيفاش ماكتضحكش ؟
زير على جفونه .. وزفر بكبت ...
هشام:~ عصام ولد عمتك ...
تسلمت الجدية من نبرة صوته ... الشيء لي خلاها تنوض من بلاصتها رجعات شعلات ضو وتقابلت معاه ... كتأكد من ملامحه أنه كيضحك ...
و لكن وجوم وجهه وضح ليها الامر ... و أنه فعلا كان كيهضر بصح ..
حطات يديها على فمها وكتهضر بلهاث ...
سيدرا:~ كيفاش هادشي !!...
هز هشام وجهه و قابل عينيه الداكنتين مع عينيها ... كيتكلم بحرقة .....
هشام:~ ماتسوليني على والو ا سيدرا ...
حررات عينيها من حصار عينيه .. و دوزات يديها على شعرها كأنها كتجمع فيه ...
انتفضت بعنف من بلاصتها ... وردات بإنفعال ....
سيدرا:~ لا غادي نسول وغادي تجاوب ... علاش مخبين هادشي ؟
دور هشام وجهه كأنه باغي يتجاهل اسئلتها ... ولكن هي كانت كيف الآلة ... كانت كتسول على كل مافبالها ...
سيدرا:~ ع .. عصام .. (تنفسات بصوت مسموع) عصام واش عارف؟؟؟ ... وحنا علاش ماعارفينش بلي هو ولد عمتنا ؟؟ (حطات يديها على قلبها) وعمتي... شكون .. ايما وحدة فيهم ؟؟؟
تجاهل كل اسئلتها .. اكتفى انه يضيق عينيه ماباغي يقول والو ...
حطات يديها على صدره كتكلم بانفعال اكبر ..
سيدرا:~ واش خطفتوه لينا ملي كان صغير ؟؟ ... داكشي علاش ماباغينش نعرفو ؟؟
النظرة لي رمقها من مور جملتها كانت كافية باش تلجم لسانها ... ولكن غير لدقائق ...
فاش شافته ماجاوبها على حتى شي حاجة.. قربات ليه ... حطات يديها على ذراعه حتى دار شاف فيها مرة اخرى .. وهمسات بعدم تصديق ...
سيدرا:~ دابا عصام ولد .. ولد عمتنا أنا ونجمة .. بابا خالو ؟ ( زيرات على جفونها ) وجدي هو جدو وعائلتنا وحدة ؟؟؟ ....
أومأ لها بالإيجاب ... الدموع برقو فعينيها بدون سبب ..وإحساس غريب راودها ..
المرورة تكونات فحلقها بدون شعور ..
غرسات أصابعها فجلده وهضرات بتوسل .
سيدرا:~ غير لحتيني دابا فالصحراء و خليتيني بلا ماء ... قول ليا اش طرا مايمكنش تخليني هاكا ... (بلعات الغصة لي فجوفها) شكون عارف هادشي؟؟ .... عصام عارف؟ جدي عارف ؟؟ بابا ؟ ماما ؟
دعك جبينه بتعب ... وحرك راسه بنفي ..
هشام:~ عارف غير الشيخ و الوالدة و انا ... و دابا نتي ...
نزلات راسها ... وحطات يديها كاتمة شهقتها ...
سيدرا:~ دابا عاد فهمت علاش خالتي ماكتحملناش ...
شافت فيه بنظرة عامرة فضول ...باغيا تزيد تعرف ...
كأنه فهمها .. شدها من ذرعها بلطف وكيتكلم بهدوء مزيف ...
هشام:~ سيدرا .. سيدرا ... لي غادي نقول ليك ... هو عصام ماخاصوش يعرف ... على الاقل ماشي دابا ...
ناضت من مكانها وجاوبت بحدة ...
سيدرا:~ ضروري خصك تقولها .... كيفاش مخبين موضوع بحال هذا .. بحال هادشي ماكيتخباش .. واش حماقيتي ؟
ناض هو الاخر و قبطها من ذراعها بالجهد هاد المرة ....
قطب جبينه ...
هشام:~ ماباغيش هاد الهضرة تخرج من هنا ... سمعتي ا سيدرا ! ..
شافها غادي تحل فمها باش تقول شي حاجة و لكن سبقها ...
هشام:~ الا وصلات لشي حد غانتفاهم معاك ... حيت هادشي غايدير المشاكل حتى يكون الوقت المناسب عاد غانحلوه ..
دفعات يديه و بعدات منه ... كيفاش يقول ليها سر بحال هذا ... وبلاما يقول التفاصيل و باغيها تسكت من فوق ...
قدر هشام يقرا افكراها ... قبط يديها ولطف صوته ...
هشام:~ سـيـدرا ...
حركات راسها شافت فيه ... و هزات سبابتها ناحيته....
سيدرا:~ وهادشي شمن علاقة عندو بزواج نجمة وعصام ...هما كيبغيو بعضياتهم .. (ردات شعرها اللور وهزات ذقنها) باغين تقولو لهم لا على قبل شي حاجة بحال هادشي ؟ باش ماتفضحوش ياك .....
سكت هشام .. عاقد بين حواجبه .. ماخلاتش ليه الفرصة فين يجاوب ... حتى اضاف بصوت مخنوق ...
سيدرا:~ شحال ماخبيتو خوك غايعرف شي نهار .. وماغايتقبلش هادشي ..
هز راسه .... وابتسم بسخرية مريرة ....
هشام:~ هادشي علاش ماخصوش يعرف .. حيت ماغايتقبلهاش وعصام فشكل ..
جلسات على طرف الفراش ..والحزن غلف صوتها .....
سيدرا:~ حتى واحد ماغادي يتقبلها ..
تجاهل جوابها قرب حتى جلس حداها ...
هشام:~ عصام الا عرف يقدر يهجر كلشي ... وحتى ختك يخليها ويهجرها .. داكشي علاش حتى حد ماخاصو يعرف ...
فهمات من نبرة صوته انه مابغاش يزيد يهضر فالموضوع ... و ماغادي تجر من عندو حتى كلمة اخرى .. خبطات رجليها مع الارض بعصبية ...
تلاحت جيهتها وعينيها ف السقف ...
حسات بجسده قدامها .. باقي ماتمد غير جالس ...
دارت عنده وهمسات بإختناق ....
سيدرا:~ كون غير ماقلتيهاش ليا ... علاش حطيتي الحمل د هاد السر عليا ... (ارتعشت شفتها السفلية بألم) ماكانش خصني نعرف ...
تفاحة ادم تحركات بقوة فحلقه ....
هشام:~ نتي لي حكرتي ...
ماعاوداتش جاوبت ... عطاتو بظهر ..وجسدها كينتفض بعنف .. كل ماتفكرات ملامح عصام وانه مافراسو والو ..
حطات يديها على قلبها باختناق .. كتحس بالنفس كيطلع بزز من صدرها وريقها كيجف .....
شافت جهة هشام بان لها عطاها بالظهر ... وخارج .... وآخر فعل شافته من عنده قبل مايطفي الضو .. هز تليفونه لي كان كيهضر بيه ... واسم عصام لي خرج من جوفه ...
هشام :~ عصام .. خرج برا نهضر معك ..
ВИ ЧИТАЄТЕ
عِشق الشيوخ | مكتملة.
Романтикаسلام حبيباتي .. ❤ جينا بيدينا عامرين .. برواية مشتركة بيناتنا بثلاثة .. بعد عدة تخمينات واخيراً قررنا نحطوها ونشاركو معكم حماسنا ومشروعنا ههه .. بعنوان:~ ♧ #عِشق_الشيوخ ♧ بقلم :~ ✏ #زوي .. #فاطمة_اليوسفي .. #يسرى_الرفاعي ❤ ماغانقولوش أحداث الرواية...
