Ui! Janda... (COMPLETED In Book And EBOOK).

BAB 01

BAB 01

Ui! Janda...
Penulis : Annell Cjrosey Adorey.
Wattpad : Annell85
SABAHAN SLANG....

Awal pagi lagi si Nerika pigi sana rumah sepupu dia. Dalam perjalanan dia pigi sana tu terjumpalah dia Si Gotuk. Senyum-senyum si Gotuk meninguk wajah ayu si Nerika.

   "Awal juga, ke mana kita ni Rang?" Diabilang si Gotuk. Dengan sisiran style balah tangah rambutnya itu, menyerlahkan lagi kehinsoman dia pada pagi itu.

   "Rang, rang... Apa kunu tu? Saya mau pigi tempat si Fenny ni. Ko ni pigi mana, awal butul berkeliaran sudah. Takkan mencari harapan sudah. Ko jangan Gotuk. Gastrik moti."Serius wajah si Nerika bercakap. Mengikut juga si Gotuk di belakang dia kama.

   "Ish, ko ni Rika. Logop bah saya ni. Tapi logop bertempat gia hehe..."

   "Jadi, ko mau pigi mana ni? Takkan ko mau ikut saya pula?"Diabilang si Rika lagi.

   "Saya mau pigi cari tu karabau beliau saya, gansau kopio tu karabau!(kuat merayau betul tu kerbau!)."Koirak juga si Nerika dingar apa yang si Gotuk cakap.

   "Terikut gaya ko lah tu Gotuk. Pigilah ko mencari, jangan saja sudah kana kasi jadi pusas tu Karabau haha..."Kelam- kabut terus si Gotuk pigi masuk sana lorong kebun bapa dia.

Sampai saja si Nerika di rumah durang si Fenny, turus dia pigi masuk saja sana pintu dapur.  Biasa sudah dia begitu bila pigi sana. Mesti sana dapur yang dia pigi duluan. Sebab di sanalah tempat tu angkol sama anty dia berkumpul kalu awal pagi.

    "Kuh! Haro tulun?(ada orang?)"Diabilang si Fenny, maka masuk sudah dia di dalam sambil senyum-senyum tinguk tu beliau si Fenny sedang bersarapan.

    "Aikk, awal juga Rika. Si Fenny masih lagi kogoruk tu. Nda parnah bangun awal tu sumandak tu. Nda taulah macam mana dia mau jadi bini urang kalu begitu gaya."Dia bilang tu Mama si Fenny.

    "Ish, ko ni anty... Pandailah dia berubah tu bila sudah ada laki nanti hehe..."Si Nerika pigi duduk sana sebelah bapa si Fenny. Turus mama si Fenny pigi bagi dia gelas sama piring.

   "Marilah sarapan sama-sama..."Diabilang tu Angkol dia.

   "Sudah gia saya sarapan di rumah tadi ni."Tapi Mama si Fenny pigi nogi tuang milo di gelas dia.

    "Ish, yang di rumah kamu lain gia, sini lain lagi gia... Rezeki ko lah tu haha, makan saja banyak-banyak. Kurus sudah anty nampak ko ni Rika. Kerja keraskah?"Diabilang tu Anty dia.

    "Hurm... Ada tanggungan gia anty, mama pun nda sudah bulih kerja berat-berat. Sayalah saja harapan mau bantu-bantu si Mama."Diabilang si Nerika.

    "Tulah, nasib ada lagi ko yang bulih kana harap-harap, daripada si Helda tu. Pentingkan diri sendiri. Silap juga gia mama ko. Dia terlampau kasi manja si Helda. Sekali last-last nda bulih diharap juga."Serius butul Mama si Fenny bercerita.

   "Ntahlah Anty, mau cakap pun serba salah juga saya."Diabilang si Nerika.

   "Bah, pogulu oku(duluan saya). Saya mau pigi sana rumah si John dulu. Ada sudah kali tu karabau durang."Diabilang bapa si Fenny.

    "Odoi, karabau durang si Gotuk pula kamurang mau korotkah? Patutlah awal pagi lagi si Gotuk merayau-rayau sudah cari tu karabau durang hehe..."Si Nerika koirak bila ingat balik pasal tadi.

    "Gansau bah tu karabau tu, tau kali mau kana korot. Itulah juga kali dia pigi bertapuk lagi ekeke...."Turus Bapa si Fenny beredar.

Nda lama kemudian, muncul sudah si Fenny sana dapur. Dia nampak saja si Nerika turus dia pigi peluk si Nerika. Manja butul gaya si Fenny.