لازم يخرب لي الرومنسيه دي هههه
قعدنا اكلنا وشربنا وانبسطنا شديد واشيل واخبت فيه تقول لي بخصوص ريم وريم تضحك قالت لي كنت معاهو وانا القلتا ليه عرفتك كان جابو سيرتي ماحتترددي طوالي حتجي .. قعدتا اضحك وسالتو عرف تاريخ ميلادي كيف قال لي العصفوره واتساغل علي ابى يوريني بس شكلو سال خيلاني ..
انبسطا من اليوم دا شديد ..
كلام حبوبه طلع صاح الله يرحمه بجي اليوم الحتنبسطي فيه وماحتشيلي هم اي حاجه وربنا حيعوضك عن الشفتي كلو وفعلا جاء والله جاب لي محمد وعوضني ب الجد عن الشفتو كلو .. (يارب تحفظو ليها وتدينا زيو هههه)..
حياتي بقت ماشه كل يوم احلى من القبلها وكل يوم بتعلق ب محمد زياده وحبيت خالتو شديد امو وبقت طوالي تتصل علي وتجيني وامشي ليها وتطمن علي حسيتا زي امي والله ..
وكل يوم محمد شابكني اوعديني مايجي يوم نسيب بعض نهائي ..
انت ياغبي انا بلقى زيك تاني عشان افرط فيك ..
اي انا ماخطير انا ماصعب .. ههههه ..
والماستر ماشي كويس والعرس كل مره بقرب واهلو بدو ف التجهيزات ما حبو يكلفو علينا نهائي ..
وانا ومحمد كل مانلقى نفسنا فاضين نطلع السوق مع انو رافض اشتري من هنا قال لي تاخدي شيلتك وحاجاتك من اي مكان دبي لندن اي حته قلتا ليه مافي داعي للمصاريف الزياده دي خليها .. برضو ماسمع الكلام وسافر دبي اخد لي حاجات كتيره للعرس وكم توب وجاء .. ومرت ابوه رسلت برضو حاجات من لندن..
يوم لقيت نفسي فاضيه وماعندي موضوع قلتا امشي ل ريم طولت منها ..
مشيت ليها ف العياده ونسه وضحك ..
شويه جات السكرتيره ..
قالت ليها في وحده قالت دايراك ..
اممم منو عيانه ..
لا قالت بتعرفك معرفه شخصيه ودايراك ..
اوك خليها تخش ..
فعلا جات داخله وحده حلاتا وصغيره بتكون ٢٢سنه سلام عليكم ..
وعليكم السلام ..
دكتوره ريم ..
ايوه اتفضلي ..
لو سمحتي عايزاك براك ..
ريم عاينت لي قلتا ليها بمشي قالت لي لا ..
اتفضلي دي صحبتي واختي احكي قداما عادي ..
براحتك ..
انتي خطيبه الباش مهندس محمد عبد الكريم ..
ريم تاني عاينت لي انا اشرتا ليها اي يعني قولي ب راسي ..
قالت ليها اي خير في حاجه ..
والله انا طبعا سهى كنت حبيبه محمد خطيبك ومحمد كان عامل معاي علاقه وليه فتره بعاملني ماحلو وتاني انقطع لمن سالتا عرفتا انو خطبك ..
ريم قالت ليها طيب والمشكله وين مدام بتقولي كااان عندو علاقه معاك .. كان ماضي يعني هسي انا الحاضر انتي قصدك شنو ب كلامك دا والبثبت لي انك ما كذابه وجايه تلفقي عليه التهمه دي شنو ..
وانا طبعا قاعده وصابه فيني مطره .. احلامي راحت محمد يخوني انا بعد ماقلتا الله عوضني ومحمد زيو ماف ووو .. الدنيا لفت بي ..
البت طوالي قالت ليها قلتا اجي اوريك لو هو ما موريك اوعيك بس (طبعا اكيد دا ماقصدها دايره تخرب العلاقه بس )..
والاثبات عندي صور وفتحت تلفونا وورتنا الصور ليها هي ومحمد ..
صور ناس بتحب بتحب جنب بعض وحركات يعني ..
ريم قالت ليها طيب شكرا ع المعلومه دي ممكن ترسلي لي الصور ب الواتس بس ..
جدا هاتي رقمك ..
وفعلا طوالي رسلتا ومشت ..
طوالي شلت الصور منها ودقيت ل محمد ..
انت وين ..
في الحته الفلانيه ..
طيب تعال المجمع هسي ..
مابقدر بعيد مني مالك ..
طيب نتلاقى في كده قريبه ليك ولي في النص ..
تمام ..
قفلت وشلت الصور في التلفون وناويه شر بس ..
