الموضوع طلع انو زميلنا احمد معجب بسهى شديد طبعا هي برضو معجبه بيه بس ما كانت مفتكره انو الاعجاب دا متبادل قالت لي انو بعد انا مشيت وهي كانت قاعده براها في المحاضره قريب نهايه المحاضره الاستاذ خالد كان بياخد في الاتندس احمد جاء قعد جنبها ودار بينهم الحديث التالي
سهى كيفك
تمام والله يا احمد انت كيف
بخييير والله ما كنت قايل انك بتعرفي اسمي
مع ابتسامه بسيطه كده لالا بعرفك ياخ
كويس طيب دي حاجه كويسه وين سمر
هنا هي حست انو عايز يسئلها مني او عندو مشاعر اتجاهي حست انها مخنوقه من سؤالو دا بس ردت
قالت حاسه نفسها زهجانه شويه وما نفسها تحضر المحاضره فرجعت البيت
ايواا كويس طيب انا كنت عايزك في موضوع شخصي شويه لو ممكن
لمن قال كده افتكرت انو عايز يصل لي عن طريقها كان نفسها تديه كف بس قالت لمن اشوف اخرو
طيب ماف مشكله اتفضل احكي
بصراحه كده ومن الاخر انا معجب بيك وحابب اني اخد رقمك واتواصل معاك لو سمحتي حتى لو ما عندك مشاعر اتجاهي فانا كابي اتواصل معاك كصاحب بس
ابتسمت وقالت ليه بصراحه انا انسانه بكره تصرفات البنات بتاعت انو يكون عندك مشاعر اتجاه زول ولما يجي يصرح ليك بمشاعرو تقعدي تتقلي وتفتري عليه ونظام هو العايز وهو الجاري وراك وانتي ما عندك ليه شي وبعد فتره لما تقعي بوشك فيه تبريرك انو بعد كل العملو علشانك انتي حبيتيه
😹😹تصدقي انك ظريفه ياخ
بإبتسامه علشان كده بشوف لو عندك مشاعر اتجاه الشخص ما تخفيها ولو ما عندك تقولي ليه بكل صراحه وما تلعبي عليه او تختي احتماليه بكره اتعود عليه اصل الحب دا بجي بدون ما نحنا نفتش عليه
صاح كلامك هنا هو اتوتر وحسا انها حتقول ليه انو ما عندها اي مشاعر اتجاهو
بصراحه يا احمد انا من فتره طويله جواي مشاعر اتجاهك بس هسي لسه ما بقدر اسميها حب يعني ممكن تقول اعجاب انجذاب حاجه بالشكل دا
بإبتسامه عريضه ريحتي قلبي ياخ قلت يا حليلك يا احمد البت حتقومك من جنبها بشلوت ثلاثي الابعاد
😹😹لالا ياخ بالغت طبعا
اسمعو انا حازيع الاسماء والحاضر يرفع يدو
الاستاذ دا بايخ جدا ياخ خلينا منو ممكن تمليني رقمك
طيب اكتب عندك
ملتو الرقم وهم الاتنين باينه عليهم ملامح الفرح المحاضر طلع بعد زاع الاسماء وهم طلعو وودعو بعض لانو اصحاب احمد كانو بنادوه ولو ما مشى حيشغلوها ليه
طبعا انبسطت جدا كونو الانسان الهي بتريدو شديد وبتحمل ليه كميه من المشاعر من بدايه الجامعه لحدي تالت بعد طول انتظار جاء وصرح ليها بمشاعرو اتجاها بس في نفس الوقت حاسه بغصه في حلقي كونو انا بحب همام لي تقريبا اكتر من سبعه سنين وهو حتى ما حاسي بأي شي اتجاهي وما معبرني حتى 🙀💔ليه الحظ واقف ضدي دايما ابوي اتوفى وما عندي اخ ولا حبيبي مهتم لامري حاسه بكميه من العجز والنقص يعني ممكن اقول على نفسي انسانه بلا سند حتى ما عندي صاحب قريب مني شديد كل الاصحاب العندي ما قادره اتقبل واحد فيهم كسند لي كلهم بحس في نظرتهم في اعجاب ماف واحد مديني احساس انا اختو بحسهم كلهم عايزين فرصه يتقربو لي بيها
الحمد لله ربنا رزقني بسهى مبسوطه بيها شديد هي الوحيده في الدفعه الاتعاملت معاي بطيبه ولقيت فيها اخت لي بحسها هي الوحيده اللي لو احتجت حألقاها اول وحده بتجري علي بس رغم قربنا مع بعض علاقتي مع همام بحسها محظوره ما بقدر اتكلم فيها غير مع نفسي لاني اصلا ما قادره اوصل احساسي الانا حاساه اتجاهو لاي شخص كان
عارفين احساس لما الروح تتشحتف لما تشوف زول ولما تحس انك نفسك تنادي عليه وما تقدر ولما يكون اسمو دايما في خشمك وما بتقدر تطلعو للعالم الخارجي حتى انك بتخاف تنطق اسمو في حاجه غريبه ما قادره افسرها انا ما بقدر اتعامل معاه كود خالتي خالص من زمان وخصوصا بعد بقى معيدي في الجامعه كل موازيني اختلطت وبقيت بالجد بعيده كل البعد عنو احساس حار وموجع لما تكوني ما بتعرفي اي حاجه عن البتحبيه لا طبعو شنو لا الحاصل في حياتو شنو صوتو ما بتسمعي غير في المحاضره بالطريقه الرسميه ولمن تمشي بيتهم ماف تعامل بينكم حتى ما حصل سألك انتي الحاصل عليك شنو ولا حتى عاملك كاختو الصغيره بإعتبار انك بت عمتو الوحيده بت عمتو الما عندها اخوان ولا عندها سند بس الحاجه الخلتني اتعلقت بيه وحبيتو وحبو رسخ في بالي من الزمن داك انو لمن مات ابوي كنت حاسه انو هو اكتر زول اهتم بي امي هو الكان دايما بسأل عنها وعن حالها وابدا ما قصر معانا بس انا كنت خالص برا حساباتو رغم كده انجذبت ليه شديد ومن اللحظه دي من اوله ثانوي وتاني ما قدرت اشيلو من بالي هو الشخصيه المميزه الوحيده الفي حياتي الشخصيه العايشه معاها في احلامي
احيانا كتيره بسرح وبتخيل انو حيجي في يوم ويعبر لي عن مشاعرو اتجاهي وانو عايزني بشوف حياتنا في بيتنا بشوف عرسنا والفستان بس دا كلو في خيالي من زمان وللان ما بقدر اوقف نفسي من الخيالات دي وما حاسه انها في يوم ممكن تتحقق خايفه يكون في وحده في حياتو وانا ما عارفه هسي لو طلع في وحده في حياتو ولو اتزوجها ااااه يا رب الطف بي
يا سمر يا بتي انتي بكره عندك جامعه
بكره الاربع يا امي انا اوف ما شغاله
كويس علشان بكره ماشين ناس خالك ديل قالو تعارف همام
اااا طيب تمام شنوو تعارف منو يا امي
تعارف همام يا بتي قالو بكره ماشي يتقدم ليه لي وحده عندو علاقه معاها من سنه كامله
ربنا يتم ليه على الخير
قلت الجمله دي بأخر نفس عندي بعدها ما سمعت امي كانت بتقول في شنو رغم انها لسه بتتكلم وانا بحرك راسي على اساس اني منصته بس يشهد الله ما سمعت اي شي تاني غير بكره تعارف همام يعني مخاوفي اتحققت يعني ما حيكون لي في يوم من الايام يعني كل احلامي حتفضل احلام ربنا يداوي قلبي ويشيل حبك من فؤادي 💔
ما كنت متوقعه انو يحصل كده اول مره افكر في كده وبارك الله في امي جات وحققت لي كل الخايفه منو كيف حتقدري يا سمر تشوفي همام ببدله العرس لوحده غيرك كيف حتشوفي ابتسامتو ليها وهو ماسك ايدها وداخل على صاله عرسهم كيف حتقدري تستحملي الابتسامه المليانه حب ليه سنه كامله وهي ما ليك ااااه يا رب اااااه
يا بت سمر انتي حتمشي معاي ولا حتقعدي
قاعده يا امي امشي انتي انا مشغوله شويه وهسي مصدعه شديد داخله انوم
طيب خلاص اخدي ليك مسكن ونومي
تمام يمى تمام
كانو المسكن حيداويني ولا احستفيد منو الفيني اكبر من انو يداويهو مسكن يا يمى الفيني ما بتداوى الحمد لله على كل حال
دخلت غرفتي ومن قفلت الباب لقيت نفسي باركه في الارض جنب الباب اخدت بكيتي لاكتر من ساعه بعدها استغفرت وغسلت وشي وصليت العشاء وصليت ركعتين ودعيت ربنا يسوي لي الفيه الخير ونمت نمت بدون ما اشعر نمت من الزعل من الحزن من الغم نمت وشايله جواي كل الاحاسيس السلبيه كل الاحاسيس الموجعه نمت وانا داسه وشي في مخدتي والدموع مبلله وشي انا حتى ما عارفه انا كيف نمت المهم اني نمت نومه زول مرهق ليه سنين وشايل هم السنين وختى راسو على المخده ونام
*🌸يتبع🌸*
#تفاعلوا ✋
