من وانا في اوله ثانوي بحبك ياخ وانت ما شغال بي الشغله سغيل خلاص هسي بت زي بفوتوها لو عارف انا موقفه كم زول ورافضه كم زول عشانك ما كنت افتريت كده
يا سجم انتي بتتمتمي تقولي في شنو
بتكلم مع نفسي ساي ماف شي
يااااخ دا علي انا يا سمر اصلا تمتمتك دي ما بتجي الا لما تشوفي السيد الفاضل دا ماري قدامك
سهى عليك الله اختيني انا ما فاضيه ليك
امممم هو صراحه سمح ويستاهل يتمتمو عليه
يا بت الحلال انتي ما عايزه تختيني القاها منك ولا من بقيه البنات المشغلنها لي ديل مش ود خالك عرفيني عليه وما بعرف شنو التقول ما معيدي زي ما معيدهم وهو زاتو التقول ما لقى يكون معيد الا في جامعتي الحأقرأ فيها ولا الغلط ما منو الغلط في امي الشبكتي في الجامعه دي علشان معيد فيها
الغيره باينه عليك شديد وانتي بتحكي عنو نفسي افهم هو بعني ليك شنو
ولا عمرك حتفهي ولا ناويه افهم زول
امممم يعني بتحبيه
لا البينا ما حب الحب بيكون بين اتنين بحبو بعض وبينهم انجذاب وانا وهو نا كده
طيب البينكم شنو
ياخ عليك الله اختيني يا سهى مش قلت ليك ما ناويه افهم زول ياخ هو ما فاهم الباقين يفهمو لشنو اقول ليك حاجه انا ما حاحضر المحاضره الاخيره دي مع السلامه ماشه البيت انا
يا بت سمر استني اقيفي عارفه استاذ خالد دا سغيل وبركز مع الاتندس ياخ وما حاقدر اتندس ليك
ما مشكله المهم ماشه انا مع السلامه بعد تطلعي اتصلي علي
خلاص تمام يا زفته رسلي لي واتس طمنيني انك وصلتي
تمام تمام
وصلت البيت امي كانت ماف رسلت لسهى وصلت وقفلت الشبكه رقدت
طبعا ما عرفتكم علي انا سمر عايشه انا وامي بس ابوي متوفي من اربعه سنين انا البت الوحيده لامي وعايشين في بيتنا وناس خالي وخالتي عايشين قريب لينا وانا من صغيره متعلقه بود خالي المتوسط همام محمد الحسن اسمك الكبير دا
يلا تعالو اوصف ليكم همام يا جماعه سمح سماحه الجن قمحاوي عريض وجسمو رياضي شديد حواجبو عريضه وعيونو عسليه انفو عموديه وشعرو سمح شديد عمرو ٢٩ وانا ٢٠ عليكم الله ما مناسبين
غايتو الحيوان دا من اوله ثانوي وانا بحبو لكن هو ما مهتم بي وما حاسي بحبي المشكله اني ما حصل بينت ليه اهتمامي وبحاول اتجنبو ما عارفه اصلا حيحس بي كيف
بسببو في الجامعه ميك اب زي بقيه البنات ما بختو ولبسي كلو بيش علشان ما يقول انا وحده فاكه والمشكله هو ما شايفني اصلا في الجامعه ما حصل وقفني واتكلم معاي غير يوم التسجيل جابني هو سجل لي لانو ما عندي اخو وابوي متوفي وامي وصتو على اتخيلو طول المشوار ما فتح خشمو معاي وبعد دا انا زي الهبله كنت مبسوطه كونو انا كنت ماشه معاه ودا ما شاء الله خلا البنات اتلمو على زي النحل علشان يعرفو علاقتي بهمام شنو ولما عرفو اني بت عمتو اتخلعو وبقو يتبلبصو لي من اليوم داك ولحدي الان تلاته سنوات من البلبصه غايتو بنات فارغات كيف لكن ليهم حق يتدشدشو يا ناس انتو لو شفتوه وربي تتدشدشو برضو ياخ انا متكسره ومتدردقه واااي شي في الدنيا دي لكن ما قادره ابين كده قدامو
تخيلو انو انا رغم بهدلتي البسويها دي جميله شديد واولاد دفعتي كلهم بحاولو يتقربو مني لكن لي تلاته سنوات ما مدياهم وش هسي شايفاهم قنعو من محاولاتهم وبقيت صحبتهم كلهم طبعا 😂😂😂
المهم ما علينا يا جماعه احساس تحبي زول وهو ما شغال بيك دا حار شديد وكمان تشوفي البنات كلهم ميتات عليه دا احر بكون نفسك تموتيهم كلهم انا غايتو الموقفني انو اصلا ما مديهم فرصه فيه بتعامل معاهم برسميه تامه عفيت منك يا الاسمراني المدشدش كياني
يا سمر يا بت انتي جيتي متين
هلا بماما كنتي وين ما صدقتي انا مشيت الجامعه ولا شنو
😂😂غايتو بت مجنونه جن مشيت شربت القهوه مع ناس خالك مرتو عزمتنا انا وخالتك انتي مالك جايه بدري
ساي اجلو لينا المحاضره الاخيره قمت جيت
اجلوها ولا دكيتيها
يا ماما انتي بتعرفي اني بكذب كيف ليه كل ما اكذب عليك بتكشفيني
😂😂علشان ظاهر من عيونك انك كذابه
سمح المهم انا جعانه الاكل شنو
مالك ما مشيتي فتحتي التلاجه شفتي في شنو واكلتي
جيت يداب رقدت انا يا حجه ياااخ
يا بت ابقي انثى شويه اسلوب الاولاد دا شنو
معليش يا ماما انتي بس اهدي واوعدك حابقى ليك انثى واحلى من اي انثى
ياخ عايني في المرايه دي شوفي سماحتك دي وراعيها ياخ ما تهملي نفسك كده
يا امي بإهمالي دا حاني كم عريس يا حجه بتك بي بهدلتها دي شغاله
ياخ ما علشان العرسان علشان نفسك ساي البسي حلو كده واعملي مكياج ظابط واخدي ليك كم صوره وعايني ليها شوفي انتي ما شاء الله سحمه كيف
حاضر يا ماما بس ما هسي عليك الله جعااااانه انا ناكل اول وبعد دا نشوف حركات البنات دي
غايتو يا بتي ارح ارح اصلا دا الانتي فالحه فيه همك في بنك دس وبعد دا ضعيفه الاكل كلو ماشي شعر
يمى كدي الشعر دا والله انا جعانه
يا بت محسساني انا حارماك من حاجه ما تقومي تاكلي الماسك يدك من الاكل منو
سمح يا حجه قايمه
قمت مشيت صليت وسخنت لي بطاطس باللحمه ختيت منها في صحن وجبت لي بيبسي من الدكان وقعدت اكلت بمزاج ورقدت نمت
صحيت المغرب صليت وقعدت مع امي في الهول لقيتها فاتحه الشاشه بتحضر في قناه سودانيه طممت لي بطني لكن لو قلت ليها غيري بتزنني بالشبشب شلت تلفوني وصلتو في الشاحن ورجعت لسهى لانها اتصلت وكنت نايمه اتونست معاها مسافه كده واخر المكالمه قالت لي دايراك في موضوع لكن نتكلم واتس قلت ليها مظبوط وقفلت ورجعت ليها واتس
