حياة فقير

المقدمة

#حياة_فقير   المقدمة   شوفو شن كاتب ف نهاية ❤
قصة حقيقية
للكاتب: محمد مالك
.
2015
.
.

السلام عليكم معاكم مصطفي هادي قصتي من العنوان واضحه حتشوفو تجاربي الفاشلة بسبب كلمة فقير وقلة حظي ف الحياة معنديش ذنب غير اني فقير والحمد الله يا ربي راضي رضا تام الي اني فيه لانه كله قضاء وقدر وكل واحد ياخد نصيبه كل شاب حط احلام يبي يحققهها اني حلمي كان طب بس اتدمر لحظة مقتل خوي الكبير وحبس خوي الاصغر مني

نعرفكم ع روحي قبل كل شئ اني مواليد 91 اسمي مصطفي امي مريضة بالسكر والضغظ ربي يشفيها ان شاء الله
خوي معتصم الكبير م 87 توفى في 2012 ايام الثورة الله يرحمه

خوي سليمان م 97 اختفى مش عارفين دياره  هاده ولما سالنا عليه قالونا محبوس

اختي نيروز م 96 معندهاش ذنب الا انها من عيلة فقيرة تقراء ومفيش حد جي طق الباب طلبها

وبوي دار عيلة وخلنا ف حوش يقطر وحياتنا زي الزفت

_______
مصطفي فتحت عيوني ع تقطير المياه من السقف نضت من الفراش وطلعت للمطبخ لقيت امي تغسل ف الماعين: صباح الخير

امي: صباح النور
مصطفي: مشت نيروز
امي: ايه الباص راه يديرلها ف لقطات ما تصلح قالت
مصطفي.فنصت عيوني: كيف متقوليش
امي: لا غير كلمه انتا متتعاركش معاه معاش نلقو من يرفعها ويجيبها يا ولدي
مصطفي: غير ايجي هوا بس
امي تنهدت

طلعت برا قدام الحوش ف شارع لقيت صغار مقعمزين تحت الحيط مشيت شورهم لقيتهم يدخنو

مصطفي: حول الدخان واقلب وجهك انتا وياه

رمو الدخان ع الارض وناضو

نفسيتي مدمرة المنظر الي ساكن فيه بروحهه ساد بس ربي كريم وما ينسي حد

طلعت فوني واتصلت

مصطفي: صباح الورد
فاطمة: صباح النور شن صار مش بتجيلي ايفون
مصطفي: والله قاعد نستنا ف دوري ف الجامعية بس وحاضر
فاطمة: خواتي كلهم يهدولهم ومدلعينهم الا اني حظي هكي
مصطفي: والله الا حظك حلو عندك راجل يحبك ويخاف عليك
فاطمه: الراجل لازم عنده فلوس كان هاده ميهمنيش

سكرت الخط ع وجهي

قعدت واقف جنب السور نستنا ف الباص يوصل

نص ساعة وصل الباص ونزلت نيروز

مصطفي: خشي وسكرى الباب
نيروز..فهمت ع طول اني ناوي الشر : لا يت مصطفي فوتهه
مصطفي : خشي قتلك
نيروز طبست راسها وخشت

مصطفي خبط الباب : انزل من الباص

نزل صاحب الباص : تفضل يا خوي
مصطفي..:عندك اخوات ولا ؟
صاحب الباص: وانتا شن دخلك ؟
مصطفي..شده من حوايجه وضربه براسه

شوية ولقيت حد يضرب معاي تلفت لقيته خوي سليمان المختفي ليه ثلاثة سنين
اني وقفت ضرب وقعدت نشوفله مش مصدق الي نشوف فيه لثواني تجمدت والله ما نزيد عليكم ف حرف

حزونا الناس وقعدو يحضنو ف سليمان وكلهم يباركوله والحمد الله ع سلامتك خديته بالاحضان

ولما خشينا الحوش امي فرحت قريب طارت
ومن مشكلة ولت فرحه

شديت ف ايديه : احكيلي وين كنت دورنا عليك ملقيناكش

سليمان: رجعت وجبتلكم الخير كله
مصطفي..باستغراب :كيف ؟
سليمان: الخرابه هاده منقعدوش فيها يوم بعد اليوم

يتبع
طبعا المقدمة حبيت نعطيهالكم حنحاول نكتب فترة هادي عندي امتحانات يعني مرات التكمله بعد الامتحانات❤ يعني ع تفاعلكم معاها

رايكم وشن قصده سليمان وشن السر الي وراه ؟
وشن حيصير بين فاطمة و مصطفي
ونيروز شن حيصير في حياتها ؟

للكاتب: محمد مالك

لو عجبتكم نكملها بعد الامتحانات لو مش حلوة نجهزلكم غيرها لحد ما نكمل امتحانات نكون مجهز الحلقات كلهم