((محطات من الماضي))
#الحب_الحقيقي /الجزء الخامس والاخير //٥
...
الطريق كله صافنه ع الولد
سألته أخي هاي مو سيارة حسن
اي اختي
لعد شتسوي عدك وليش مااجه حسن؟؟
سكت ومارد
دقايق وصلني نزلت وراح بساع
شنو السالفه؟
ببالي الف سؤال بس ع الأكثر حسن زعلان مني
ردت اتصل عليه ومتردده
كملت اليوم بالدوام بصعوبه واحس بضيگ
طلعت شفت الولد نفسه
هالمره لازم اعرف شكو مااتحمل بعد
انته شسمك؟
عمار
اسمعني عمار احجيلي وين حسن
هم سكت
ولك تحجي لو اصرخ ألم العالم عليك اكللهم هذا ولد ماعرفة خطفني
وكف السياره والتفت عليه
هييي انتي شنو مخبله موزين دزني عليج حسن يخاف ترجعين تتبهذلين بالطريق وحدج تريدين تبليني ببلوه والله لو عايفج احسلي
لعد احجيلي ليش تسكت كلما أسألك
اسمعي كل اللي اعرفه حسن مريض شويه إنفلونزا
لا مو انفلونزا هاي اكو شي وشي جبير هم
لزمت اذانه جريتها حييل صرخ وظل يشتم
هديني ولج خرب عشيرتك حسن الله يصبرك ع هالخبله
هاا يعني حاجي لك عني وتعرف اني حبيبته
وخر ايدي ودفعني اااخ
اختي اي حاجيلي وحسن يحبج تره
نغزني گلبي من گال هيج
لعد ليش هيج سوه ووينه؟؟
عمار فدوه اروحلك وديني اله
اختي مااكدر تره يمه جماعه ولد وتسويله مشكله ومااعتقد يقبل
لعد شلون هسه
دبرني اريد اشوفه
راح اتصل بي واخلي يحاجيج
ايديه رجفت ماعرف ليش
اتصل بي وگله تريد تجي تشوفك سمعته يصيح
الله شكد اشتاقيت لزئيره وخشونه صوته هنه يومين وماشفته كأنما سنتين
سد الموبايل
اشو مانطيتني احجي وياه
اختي والله ماقبل سمعتي شلون يصيح لاتعرضيني لمشاكل وياه
انتي رجعي للبيت واتصلي بي
رجعت انتجيت ع الكشن وميته قلق وخايفه ماعرف شنو الموضوع وشكيت بظافر ماعرف يمكن اكو شي
اول مرجعت راسلته مافاتح نت
انتظرت ساعات وماكو
اتصلت عليه رفض الاتصال
لا الوضع ماينحمل بعد اكو شي
دزيتله رساله
اذا متجاوب هسه اجي عندك ماتحمل بعد
وره دقيقه اتصل
صوته تعبان كلش
حسن ليش هيج تسوي
حنين شكو مو انتي ردتيها
ماراسلتيني من رجعتي وشكيتي بيه ومارحتي للدوام حتى متشوفيني
شكو بعد شعدج
هيج تتخله عني بسرعه لعد والحب وكلامك ووعودك
ماتخليت عنج ولج بس تركتج ترتاحين ونفسيتج تهدة
باجر تعال انته اريد اشوفك بعد ما اتحمل
ماشي احاول
اسمع حسن اذا ماجيت اعتبر كلشي بيننا خلصان وطبگت الاتصال
مادري ليش حسيت اكو شي وقلقت اكثر
راقبته طول الوقت مافاتح نت
ولارد على رسايلي
الصبح طلعت من وكت ملهوفه عليه
صعدت بالسياره جان لابس نظارات شمسيه وشفقه
سلمت وصعدت رد بس مو بلهفه
حسن مشتاقتلك حبيبي
اني هم حنونتي
كذاب
ليش ولج كذاب
وكف السياره بمكان دا اجي يمك
وگفها ركضت صعدت يمه يحاول يخفى وجهه عني
جريته من قميصه ووخرت الشفقة والنظارات لطمت ع وجهي وشهگت
منو هيج مسوي بيك حسن شبي وجهك؟؟
اشششش اهدي حنين ماكو شي
شنو ماكو شي وجهك خريطه صاير
دنگ
حسن حجيلي الحقيقة دخيلك منو هذا ظافر هيج سوه ؟؟
شال راسه وحجه بعصبيه
اي ظافر بس وداعتج كسرتله سن من أسنانه وايده جبروها اله بالطوارئ لاعبالج غلبني النذل
بقيت الطم على وجهي وابجي
حنين اهدي وراح تتأخرين عن الدوام وتجيج عقوبه خل اخذج هسه ومن نرجع نحجي
شبگته حييل كل قوتي
صاح اااخ ولج
سوده عليه يوجعك؟
جان يوجع وهسه طاب بشوفتج وريحت انفاسج
بوست ايديه اثنينهم يالله شكد احبك حسن ماعرف شخطرلك وهيج سويت لازم تنتبه على نفسك مرة الثانيه ارجوك لخاطري اموت اذا صار بيك شي
تحسر
تحبيني حنين؟
مخبل انته امووووت عليك انته روحي وحياتي ومستقبلي كله
شفته فرح وارتفعت معنوياته
اخذني للمؤسسه وراح
روحي راحت وياه
كل شويه اتذكره واحن إله
ومن رجعت حجالي اللي صار رايح لظافر وگايله ع علاقتنه ومهدده يفضحه كدام زوجته ومحذره انو يتقربلي او يتعرضلي بعد ومتضاربين
الله ستر على حبيبي حسن والله ينتقم منه لظافر
رجعت علاقتي بحسن احسن من قبل واقوة تعلقت بي كلش ومااكدر ع فراگه بعد اللي صار
هو سندي وآماني بالدنيا
مرت الأيام واحنا متفقين على الخطوبه
بس نكّون نفسنه وحسن يكدر يشتري بيت ويخطبني من أهلي
..
(نهايه المحطة الأولى)
***انتهت حكاية حنين وحسن #الحب_الحقيقي
القصه حقيقيه من أرض الواقع مع تغيير الأسماء وبعض الأحداث
غايتي كانت من نقلها توصيل فكره وعبره لكل بنت مهما كانت تربيتها واخلاقها لاتقدر بل مستحيل ان تسيطر على غدر الزمن والذئاب اللي بالمجتمع
نصيحه لاتثقين بعلاقات الانترنت
لاتصدگين بأي شاب مهما كان يحبج ويخاف عليج ولاتروحين وياه لأي مكان وحدكم الشيطان شاطر مثل مايگلون وتفقدين عزة نفسج وشرفج بسبب لحظه ضعف
صيري قويه ومسيطرة نفسج ثم نفسج ثم راحة بالج والباقي اشياء ثانويه انتي ترتبيها وتسيطرين عليها
تحيه لكل بنت عراقيه ولكل شاب عراقي حبهم كان صادق وحقيقي
ترقبوا المحطه الثانيه مع احداث مختلفه
لاتنسون التصويت والدعم ومشاركة القصص
تحياتي #ملكه العاشقه
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
