(( محطات من الماضي))
المحطة الأولى /الجزء الثاني //٢
...
آخر شي جنت اتوقعه
مستحيل ...!!
مدري اضحك مدري ابجي
مدري اصدگ
ست شهور ؟؟
شنو هاي احلم اني !
شرجعه هذا وشرايد !
حتى نسيته ومتوقعت يرجع أبد
بدون تفكير دزيتله رساله كتله مااعتقد كرامتك تسمحلك ترجع بعد ماهنتك آخر مره
شرايد؟؟
تأخر يلا فتح الرسايل
بكد ماجنت خايفه بكد ماجنت متلهفه اسمع رده وشيريد ووين جان وليش اختفى
ساعات مرت الرسالة مانفتحت
توترت .. قلقت ..
شغلت نفسي بمسلسل باليتيوب طلعت اجه الرد منه بوقت متأخر من الليل
اتذكر الساعه بال٢
گلي ممكن اتصل
كتله لا مااكدر اجاوب
رد مثل اسلوبه القديم المتسامح واللي دائما يقدم اعتذارات
اسف ..
ممكن تسمعيني للأخير واذا ماعاجبج الكلام حضريني
تفضل استاذ
اولا اني مو استاذ وتعرفين شنو اسمي كلش زين
ثانيا اني أحبج
وماعدي غيرج
ووفيت الج كل هالمده صبرت عليج
سافرت وكونت نفسي واشتريت شقه النه اني وياج وانتي ح تجهزيها من كلشي و ع ذوقج وصدگيني حنونه رجعت علمودج حبيبتي
..
بقى ساعه يحجي ويتوسل ويقدم أعذار
واني صافنه عليه شنو هذا متتدرب ع الحجي
كأنما انسان متعلم ومثقف ومتمكن بشكل مو طبيعي
كدر يخليني اصدگ بي بطريقته الخاصه
كأنما دارس علم النفس او القدره على السيطره على الآخرين بشكل مغناطيسي
ماجان عندي حل غير اصدگه وارجع وياه وأثق بي من جديد
رسملي حياتي رسم وكلما احجي كلمه يگلي كلشي مخطط وكلشي مدروس انتي الاميره ومملكتج جاهزه بس انطيني الموافقه وآل أوكي
يوم وره يوم وليله وره ليله يتصرف وياي كأنما مجنون وعاشگ اكثر من قبل
كل يوم يطلب يشوفني ونطلع واني اتحجج بحجه شكل لحد ما بيها مجال بعد
دبرت نفسي الصبح الساعه بال٧ كلي اجي بسيارتي اخذج ونروح لمكان ووعدني الف وعد مايتقربلي ولا يجبرني ع شي
اني كلش خايفه جنت منه
احساس بداخلي ممرتاحه
جانت بدايه العطلة الصيفيه والعائلة كلها نايمه هالوقت مايصحون
اخذت مفاتيح البيت وبدلت وطلعت
شفت سيارته صعدت وراه
شفته عيونه حمر ونار صاير
ملهوف ومشتاقلي
حجينه طول الطريق
ع اساس ننروح مكان عام بس اخذني لشقته اللي ع اساس مشتريها الي
گلي هنا نرتاح متردين تشوفين مملكتج وجبتلج ريوك
كلشي جاهز
خفت انزل من السياره
بس مابيها مجال بعد ارجع
نزلت والشقه فوك كوه صعدت الدرج
بالبدايه جان لطيف وياي ورقيق كلش وراهه انگلب وحش وصار اللي صار ....
...
شگد كرهت نفسي وحسيت بالقرف تمنيت الگاع تنشگ وتبتلعني
وره ماعرف شكثر من الوقت ..
عافني وگام لبس ملابسه
يلا حبيبتي حنونه لمي غراضج ولحگيني منتظرج بالسياره
نزل بسرعه وعافني واني بالگاع عاريه
بوضع حقير ورخيص
ايباااه شكد حقير وشكد نذل وشكد مثّل وابدع بالتمثيل حتى ياخذ اللي يريده مني بكل تفنن وبراعة
مادري شلون لبست ملابسي ونزلت من الدرج سديت باب الشقه وراي
بقت ببالي حتى ماحضنني ولاحجه كلمه طيبه تتطيب خاطري المكسور
حالي جان اشبه بالطير المكسور جناحه
حالتي تفطر الصخر من الالم اللي حسيت بي وقتها
ادري اني المذنبه واعرف مني الصوج
لأن وثقت بي واجيت وياه لهيج مكان ووحدنا ميفيد الندم بعد شيفيد
طول الطريق يسولف ويضحك وفرحان واني ساكته وابتسم اله ابتسامه مزيفه وداخلي ينزف من الخزي والعار
عاين ببوجهي
شبيج حنونتي
ظل يلح
مابيه شي راسي يوجعني
نزل يم محل اشترالي ببسي ونساتل ومي بارد
ورجع للسياره
فكرت انزل واشرد منه
وين اروح
مااندل هنا ووحدي
رجع يسولف وكلي اتصلي بيه ونطلع ونروح كل مايصير عندج مجال
ومن كل عقله بعد اللي صار اعاين ببوجهه لو الي نفس اشوف خلقته
اصلا كرهته كره أعمى
بين كلامه مدري شنو خطرلي كتله ظافر نزلني هنا يم هاي المستشفى
شنوو؟؟
خيرج حبيبتي شتسوين بالمستشفى
تعبانه شوي اگص باص وآخذ علاج راسي مصدع
حنونتي عندي شغل تره مااكدر انتظرج ولااجي وياج
دخل ارجعج للبيت وبعدين روحي انتي
لاااا وديني نزلني هنا وروح لاتنتظرني روح أني ارجع بتكسي وحدي بس اطيني فلوس ماشايله
لااا شهالحجي
مترجعين وحدج وتكسي
هالجمال كله والانوثه تصعد يم ابو التكسي
ااااخ منج وغمز لي
ابتسمت بس اتمنى افلش راسه بحذائي
باعي حنونه راح انزلج بباب المستشفى واتصل بولد صديقي ثقه اطي رقمج من تكملين انتظري بالباب يجي يوصلج ويروح
و طمنيني عنج
اوك حياتي؟
اوك ماشي ..
بس شلون اعرفه هذا صديقك
معليج اول مره اني اتصل بيج وراح اطي رقمج وهو يتصل بيج
..
نزلت من سيارته ماصدكت اتنفس اختنكت ركضت لجوه بسرعه رحت لمغاسل المستشفى غسلت وجهي وطگيت بجي
شنو هاي حنين شنو هذا اللي سويتي
سديت حلگي بكف ايدي وحبست دموعي مااكدر بعد احد هنا يحس عليه
مسحت وجهي وعدلت نفسي وطلعت كعدت بحديقه المستشفى اخذت نفس وماشوف احد كأنما محد هناك غيري والكارثه اللي صارت بيه
فكرت انتحر
اي لازم انتحر راح اصعد لأعلى طابق واشمر نفسي مناك
هيج اخلص من حياتي بسرعه وماتعب اهلي وياي
ظافر مايعوفني بعد اللي صار
بهالاثناء بين هالافكار السوده دگ الموبايل فزيت وايديه رجفت
هذا ظافر !
رديت عليه
حبي حنونه دزيتلج هذا الولد حسن اسمه بباب المستشفى منتظرج طلعي راح يتصل عليج هسه
هاا يلا ماشي يلا طلعت
توجهت للباب ومشيت ببطيء
منكسره ومتألمه كلش نفسيتي
دگ الموبايل
الوو
خيتي اني بالباب وينج
شهالصوت الغريب !
صوته ملفت للانتباه لان خشن كلش
رديت عليه وإني صوتي مبحوح وتعبان اي اني هم بالباب
زين شايله شي بيدج حتى اعرفج
اي جنطه ..
جوزيه؟؟
صدك ضحكت لان جنطتي بيجي لونها وصدفه ماكو بنات شابات بالشارع
الوو ..
هاا اني هنا لابسه كابوي وجنطتي بيجي
ايي عيني شفتج تعالي
اشرلي شفته
تمشيت وصعدت بسيارته وراه
عالگ تبريد واني عرگانه وحالتي حاله
منتبهت لشكله بس سلمت وصعدت
بس طلع هو منتبه لكل تفاصيل جسمي وملابسي من اول ما شافني وحتى ملامح وجهي
لفيت نفسي جنت لابسه قميص كابوي وبنطرون كابوي ازرگ والجنطه بيجي لونها والحجاب بيجي
وحذاءي هم بيجي احب انسق بالملابس ويلوگ عليه كلشي
تجيت راسي ع الكشن وبالي كله باللي صار اليوم كل شوي اغمض اتحسر واخذ نفس قوي وارجع اتحسر
ببالي شراح يصير بعد اللي صار تفكيري مشتت بعدها انتبهت للسايق
حسن شاب ضخم وطويل كلش وعنده وسامه غريبه عيونه بالمرايه مالت السياره مانزلت عني يمكن يسوق وعيونه مركزه عليه
التفتت حتى ادلي بالبيت شفت عيونه الكحيله مركز و يعاين عليه ارتبك
مديت ايدي واشرتله ع الشارع اللي يدخل بي صفن ع ايدي وحسيته داخ
ارتبك اكثر
حسن اندليت؟؟
حسن؟؟
هاا التفت وعاين ببوجهي وابتسم
لا والله ماندليت
حسيت قلل سرعه السياره
ورجع باوع عليه وركز اكثر ببوجهي
اني هم ركزت واللي لفت انتباهي صوته دخيل الله تكول أسد من يزأر
لحضات بيننا ثواني بس بيها معاني هواي
وصلني وكف السياره نزلت امشي ومتاكده عينه ع كل ذره بجسمي
فتحت الباب بالمفتاح بعده كاعد بالسياره وصافن عليه دخلت سمعت السياره راحت
رجعت للحمام رئسا سبحت وقررت انسه اللي صار وافكر احذر من ظافر تحلفت له بداخلي وحقدت عليه كلش
بعدها تصرفت بشكل طبيعي لأن ماعرفت شسوي وماكو حل غير هذا مؤقتاً
لازم اغلس عنه والا انكشف و انفضح
فتحت موبايلي تفاجأت ماراسل بيومها
لثاني يوم دز سلام بس رديت السلام وعفته
ثالث يوم افكر بحسن
نظراته
صوته
عيونه الكحيله
حفظت رقمه بالجهاز طلعت عنده واتس اب راسلته بين افكار انتقام ببالي اريد اعرف منه كلشي عن ظافر بما ان صديقه بس معرفت منين ابدي وشلون
كتله اريد اطلع للسوك واريدك تجي تاخذني بسيارتك جانت حجه حتى اسأله عن ظافر
الغريب حسيت انو جان منتظر هالرساله
وفرح كلش
اسلوبه مختلف عن ظافر
قليل الكلام وكلامه بي معنى
بينما ظافر يحجي ساعات وماحس بشي ولاتتحرك مشاعري ابد
دبرت طلعه وطلعت ثاني يوم صعدت وي حسن اللي جان مثل الملاك ونظراته الي حلوه مميزه
حتى سوالفه دافيه وهادئه رغم خشونه صوته
بقيت ساعه وياه بالسياره نسولف طلب مني كلما احتاج توصيل اتصل بي
حسن رجال شهم بي رجوله ماشفت منها عمري كله
طلب يعرف اسمي كتله حنين ابتسم
شنو حسن محلو اسمي ؟؟
بالعكس اسمج حلو ولايگ عليج ومبينه حنينه ومدلله
انته هم اسمك حلو
تنحنحت ..
حسن ممكن كم سؤال
تفضلي ..
من شوكت تعرف ظافر؟
وگف السياره ع جهه والتفت عليه ونظرته غضبان
انتي من شوكت تعرفين ظافر؟؟
هااا هيج جان دازني ع وضيفه وتعرفنه
رجع دار وجه للشارع وتحسر
ظافر صديقي من سبع سنوات
شغل السياره وحسيته ضاج كلش
مكدرت اسأله بعد فشلني
درت وجهي اني هم وسرحت لحد ما رجعني للبيت ذبني وراح
رجعت وبقيت مستغربه لاختفاء ظافر
غريب !!
توقعت راح يطلب مني كل يوم ياخذني للشقه
لو يظل يلح ويراسل
شنو هالتصرف معقوله اكتفه مني وبعد اللي أخذه ماعاد يهتم
كل شويه يروح بالي يم حسن
ماعرف هالرجل مميز وظهوره بحياتي بهالوقت بالذات
بليل حسيت بنفسي مخنوكه ماتحمل بعد وقررت انهي كلشي وي ظافر ...
....
يتبع
...
تفاعل حتى اكمل البقيه
لاتنسون التصويت ومشاركه مع محبين القصص
