الجــزء >> 9 <<
اليوم الثاني " أول يوم من شهر 6 " طبعاً العروسين سافروا وإللي وصلهم للمطار سايق أم فارس لإنهم مايبون يتعبون الشباب ..
الساعه 9 الصباح .. جا أبو خالد لـ بيته وقال : وين وسن ؟؟
أم خالد استغربت : ذا الحين بتنزل ..
إلا هذي وسن نازله .. طبعاً أخوانها ماهم فيه إلا خالد جاي مع أبوهـ وجهه مايبشر بـ الخير .. وسن : أحلى صباح ع أحلى ناس .. وباست أبوها واخوها وامها ..
أبوها أنعصر قلبه لما شافها وشاف إبتسامتها .. خالد مايناظر فيها ..
أبوها : حبيبتي جيبي عباتك وامشي معانا .
وسن بـ أستغراب : وين ؟؟
أبوها : روحي جيبيها وتعالي اقول لك ..
وسن طلعت الدرج تركض مسكينه مستعجله ع المصيبه إللي تنتظرها ..
أم خالد تناظر زوجها وولدها وبخوف قالت : شـ السالفه ؟؟
أبو خالد : ذا الحين تعرفين لكن آبيك تكونين قويه ..
أم خالد حست إنها مصيبه قويه من بعد كلام زوجها وسكتت ماتبي تستعجل ع مصيبتها ..
نزلت وسن تركض قالت بفرح : جيت .. يلا وين بنروح ؟؟ { ياحياتي عليها مستانسه ع بالها بتروح مكان يفرحها }
أبوها واهو كويس يطلع معاهـ الكلام : حبيبة أبوك .. كل شيء قضاء وقدر وإحنا من قبل لا نطلعع للدنيا مكتوب لنا كل شيء وما أحد مننا يعلم الغيب .. متى ماجا جا وإللي علينا كونا عبيد لله ومؤمنين به وبقدرهـ لازم نرضى ولا نعترض ..
وسن عقدت حواجبها ما تدري ليش أبوها يقولها كذا أول مرهـ بحياتها تسمع هـ الكلام .. وقف أبوها وتقدم لها ومسكها من كتوفها وقال : الوافي صار عليه حادث واهو ذا الحين بـ المستشفى .. ويبي يشوفك ..
وسن بعدم تصديق : الوافي متصل فيني قبل ساعتين وسولفت اـنا واهو ولا فيه شيء ..
خالد تقدم لها : يلا ياقلبي أمشي معانا .. مانقدر نتركه بروحه أبوهـ مسافر وبلغناهـ وبيوصل بعد 4 ساعات وأخوهـ مشغول شوي ..
وسن مابعد أستوعبت إللي سمعته ومشت معاهم من غير لا تتكلم .. أمها لما شافتها طلعت جلست تبكي لإنو الواضح عليهم إنه خلاص ..
بـ المستشفى كل شباب ورياجيل عائلة سُلطان موجودين .. أبو خالد أتصل فيهم يحضرون عشان يوقفون بجنب أسامه أخو الوافي إللي لما عرف طاح عليهم مغشي عليه ..{ الموجودين : أبو فارس وأبو سعود وأبو تركي وتركي وعزام وبدر وسعود وحمد وياسر وفيصل وحاتم ووسام وراكان وزياد لإن أهلهم مابعد رجعوا للرياض وكانو نايمين بـ مجلس العائله ولما أتصل أبو خالد فـ حاتم كان عندهم وطلعوا مع حاتم } طبعاً فواز كان عندهـ إستلام بـ نفس المستشفى .. أبوخالد لما عرف وضع الوافي قالهم يجلسون هنا واهو بيروح يجيب وسن تشوف الوافي وخذا خالد معاهـ ..
