اعترافات الشخص السابع

التجربة الثالثة

اولا انا سعيد جدا اني أكون جزء من التجربة دي، يعني انا بحب القراية ولما قرأت تجارب الاتنين الي قبلي لقيت أنها تجربة فريدة من نوعها جدا وهنتعلم منها كتير مهما كانت مخيفة او حزينة بس أحنا بمجرد معرفتنا بحياة ناس تانية أحنا بنعيش أكتر من مرة وبنتعلم حاجات كتير.. مظنش أن اعترافي هيبقا مميز او ملفت زي باقي الاعترافات بس ده بحكم سني مبقتش عارف اه الي جيلكم بيحبه.. انا شخص تجاوز السبعين سنة ووحيد ف أي حاجة ممكن أحكيها هيبقا محدش يعرفها ف أنا هسيب الكلام هو الي يوصلنا لنقطة بداية ونقطة نهاية...

انا شفت بلاد كتير بس انا روحي متعلقتش ببلد زي اليابان.. بلد جميلة جدا وفيها كل الطبقات الفكرية حضارة وتاريخ وعلم تقدر تقول عليها عندها إكتفاء ذاتي.. من ساعة ما طلعت على المعاش كنت وعدت روز -زوجتي- اننا هنلف العالم ونزور اي بلد هي نفسها تروحها وفعلا سافرنا بلاد كتير ومن ضمنهم كانت اليابان.. بداية رحلتنا كانت معتادة بعد ما بننزل من الطيارة بليل بنروح الفندق الي حاجزين فيه إقامة لليلة واحدة بس - احنا بنقعد 30 يوم في البلد بس بنحجز ليلة واحدة عشان في خطة ورحلة طويلة مستنيانا- خطتنا بتكون أننا نشوف خبايا البلد الي أحنا مسافرينها دي مش المعالم المزيفة الي السايح بيروحو يشوفوها، الكنز كله موجود في الأزقة والغابات و القرى.. وكل مكان نروحه منقعدش فيه أكتر من أسبوع عشان الرحلة متضيعش على مكان واحد المهم اننا تاني يوم روحت أنا وروز نتمشى في شوارع طوكيو الجميلة.. مدينة متطورة فعلا بس مزدحمة شوية.. وبعدها اخدنا شنطنا وكلمنا رحلتنا لمدينة كيوتو وقعدنا فيها يومين بس مدية عريقة وفيها حضارات كتير وروز كانت منبهرة بالبلاط الإمباطوري والاثار اليابانية كلها..

وروحنا مدينة أوكيناوا الي تختلف تماما عن طوكيو بلد ريفية وبعاد جدا عن التحضر بس حلوة جدا واكتر حاجة  روز حبتها هناك هي أشجار الساكورا كنا في الربيع ف كانت كل الأشجارر مزهرة وبعض الورق بيقع منها ببطئ بيخلي الي ماشي تحت الشجر ده ينسجم معاه، بس مكنش في حد ممنسجم مع الشجردة أكتر من روز.. كانت ماشية تحت الأشجار ومغمضة عنيها والأوراق بتطير حواليها.. كانت جميلة جدا.. وهتفضل جميلة... ف اللحظة دي انا كنت حاسس ان روز بقت جزء من الشجر ده ف محبيتش أقطع اللحظة دي عليها وقعدت تحت شجرة وفضلت أبص عليها.. روز بعد دقايق بدأت تتلفت حواليها ولم ملقتنيش جنبها بان عليها القلق وبدأت تندة عليا ف رديت عليها ولما شافتني ملامحها أرتاحت وجت تقعد جنبي وهي مبتسمة.. طول عمري بعتبرها طفلتي الصغيرة.. مهما كبرت ف هي طفلتي ومحتجاني... روز قالتلي أنها حاسة أنها جزء من الأشجار دي انا ابتسمت للفكرة دي الأشجار دي جميلة فعلا بس روز أجمل.. بس عشان انا بهتم بكل حاجة بتقولها وبشوفها مهمه بالنسبالي جبتلها شاي الساكورا وقلتلها عشان يبقا هو كمان جزء منك.. روز فرحت جدا من الشاي بس انا عارف انها فرحت عشان أهتمامي بكلامها.. روز بتحبني جدا.. 

وكانت أخر مدينة نروحها في اليابان كانت مدينة يوباري قبل ما نرجع ب 10 ايام على غير العادة.. البلد دي مفيهاش حاجة ملفته ولا معالم سياحية، بالعكس المدينة دي أقل بدل فيها سكن في اليابان وبيسموها مدينة العجائز عشان معظم سكانها عجائز ومفيهاش اشغال كتير.. احنا كبرنا ف لو في مكان مناسب لينا ف هيكون المدينة دي.. أجرنا سكن صغير في عمارة  مفيهاش غير ساكنين او 3 تقريبا لكن المكان كان مريح نفسيا، وحست اني فبيتي.. اه صح انا مكنتش بفهم اللغة اليابانية غير كلمات بسيطة بس روز تعرف حاجات كتير في الياباني ده غير انها معاها معجم لو حاجة وقفت قصادها.. روز ذكية واذكى مني...

في يوم كنا بنتمشى انا وروز في المدينة بليل لقينا محل صغير بيبيع نوادروتذكارات ف دخلنا نتفرج على الحاجات الي فيه، كان في حاجات كتير جميلة من التراث الياباني.. العاب يابانية وسيوف كاتانا وآلات موسيقية وكان في حاجات كير مبهجة في المكان وروز كانت منبهرة بيها.. لفت نظر روز صندوق صغير عليه نقوش جميلة ف جه البياع وقالنا أن الصندوق ده بيسموه صندوق الذكريات لأنه بيحفظ ذكريات الأشخاص وكل ميفتحوة بيفتكروها، ولسبب ما روز قررت تششتري الصندوق ده.. وبعد مرجعنا فتحت الصندوق وطلع ميوزيك بوكس عادي بس ليه موسيقى جميلة ومريحة للأعصاب.. توقعت أن روز هتخليه ف مجموعتها في أوضة بيتنا على الرف بس أتفاجئت لما قالتلي انا جبت الصندوق ده عشانك.. عشان تفتكرني بيه...
انا مش محتاج صندوص عشان افتكرها هىي علطول فبالي واحنا مبنبعدش عن بعض..
بس تقريبا هي كانت حاسة أنها قربت من النهاية.. فيوم روز قالتلي انها تعبانة ومش هتقدر تخرج انهاردة وكانت طول اليوم قاعدة على السرير وفاتحة الميوزيك بوكس وبتبص على الشباك.. انا كنت مستغرب من حالها ف اليوم ده وكنت جنبها بسحاسسها بعيدة عندي.. واكتشفت أنها كانت فعلا بعدت.. روز ماتت جنبي وهي على السرير... 

أتدفنت في مقبرة في المدينة هناك وفي جنبها شجرة ساكورا.. وانا رجعت من السفر لأول مرة لوحدي...وبعد 20 يوم بالظبط هيكون عدى على موت روز سنة.. سنة نسييت فيها كل أشكال الحياة.. كل الي فاكره هو صورتها الي بتتجسد قدامي كل ما افتح الميوزيك بوكس.. انا هسافر بعد 10 ايام ليها وأتمنى اني اموت هناك معاها...