مشاعر_مطرطشة (باللهجة الليبية)

حلقة 32_بارت 2

في الوقت الحاضر

حنين : شن قصتك انت اليووم
مازن : كني
حنين : كل مانسألك حاجة تسرح وعقلك يمشي في وادي آخر
مازن : يخطرن عليا ذكرياتي
وقعد حضنها مازن ويهدرز امعاها
,,,,,
نرمين ماسكة نقالها وسرحانة
ماكنتش متوقعه تووصل بها هكي
علاقتها مع فارس
,,,,
فارس سرحان ويفكر ويعاتب في نفسه
" غير شن درت في روحك يافارس
معقولة مش عارف تأخذ قرار في حياتك "
,,,,,
نجاح كانت في سابع نومه في حضن امّها
وكانت أمها تمسح علي شعرها
وتحكي مع روحها
"حندير المستحيل عشانك يانجووحتي
مهما درتي حتقعدي بنتي
مش حنقدر نستغنى عنك
او انخلي الناس يعرفو قصتك
صح انتي اذنبتي واكيدة نادمة علي ذنبك
لكن انتي اكبيدتي لازم نقعد امعاك
عشان تطلعي من المحنه امتاعك "
'''

ثاني يوم الساعة 10:00 صباحا

قاعدين فارس ومازن في السوبر ماركت
مازن : شن جو الشغل الأيام هذينا
فارس : امكسدة عارف انت سيولة مافش ,, الحكاية امكسد اشوية
مازن : الحمد الله على كل حال
نصبروو وخلاص
سمع نقاله يرن
طلع احمد
مازن : صباح الخير ياغالي
احمد : أي صباح تريحت شن قتلك انا
مازن : كنك تحكي هكي عالصبح شن صار
احمد : صورتي انا وياك
حرقت كرتي الله ياسامحك وخلاص علي تسكيرة راسك
مازن : غير اشوية وسّع بالك
احمد : غير افتح الفيس شوف امنزلين صورتي وصورتك
لكن إسماعيل كان مش باين
لو كان باين راهُ انحرق وقتلوو الجماعة
مازن : غير وسّع بالك كنك درت موضوع
احمد : انت مش فاهم حاجة
عيني عينك قاعد انتعامل امعاك
مازن : مرات عبارة عن صورة وخلاص
مش حدير ضجة إعلامية
احمد : انقانك الا مسكين شكلك انت لانك
ماعندكش عالفيس لاشي
مش عارف الضرر اللي ايجيبة الفيس
مازن : تي خلاص وانت اتعيط عليّا عالصبح
راك نفختهن مش هكي خلاص
يمشوو ينحرقوو يقوولوو اللي يقولوو
واللي في عقله حاجة انجيّف امّه
احمد : المهم حيسألوك دير روحك عبيط وماتحكش أي حاجة
مازن : من يقدر يسأل العقرب علي حاجة
مافش راجل يقدر يستفسر منّي
أحمد : خلاص توا خليني كيف انلم الموضوع
" واحد امصور العقرب واحمد بدون مايفطن
لكن إسماعيل مش باين
والصورة انتشرت في علي مواقع التواصل الاجتماعي
الصورة انتشرت في لمح البصر
" رئيس مكافحة المخدرات مع اكبر تاجر قديم للمخدرات "
" الافندي أحمد والعقرب "
" انكشف السر الذي كان يخفيه رئيس مكافحة المخدرات عن الطريقة التي
كان يقبض عليها باللصووص "
" هل هناك غرفية عمليات بين الافندي احمد والعقرب "
" العقرب كان تاجر حشيش فهل الآن يعمل لصالح الشرطة "
وخبر وراء خبر علي جميع صفحات الفيس بوك
,,,,,
معاوية قاعد في مقر الحزب
فرحان قريب اطير
شاف الخبر امتاع احمد والعقرب
معاوية : الحمد الله يارب
هكي اريحوونا اشوية
كنت شاك في العقرب من الأول
غير يطلع الباشق حنشعفكم عاليووم اللي تحالفتوو في مع بعضكم
وبيناتنا الأيام حنوريكم من يطلع معاوية
" نقاله معاوية رن
قال في باله اكيدة معاذ يبي يحكيله
علي الخبر اللي منتشر
طلعت مايا
معاوية : نعم
مايا : الناس يقوولوو صباح الخير مش نعم
لما نقعد صاحبك ولازميلك في العمل قولي نعم
معاوية : صباح الخير
مايا :صباح النور
معاوية : نعم شن جو المعهد الجديد
مايا : توا عطانا الأستاذ ابكير
معاوية : ابكير اسماها
مايا : هههههههه شن باهي أستاذ قالها عالسريع
معاوية : اسماها ابريك
مايا : اوكي يانجليزي انت
معاوية : مايا قاعد في الحزب توا حنكلمك بعدين
مايا : خلاص امتى مانبي انروح حنرن عليك
معاوية : غير انتي اطلعي حتلقي وحدين يرجو فيك
تو يروّحو بيك للحووش
مايا : خلاص خلاص ابكير كمل .. خشو الطلبة للقاعة
ابكير ولا ابريك كلا واحد
معاوية : ديري بالك ع روحك
مايا : حاضر
,,,,,
فاطمة امكسدة عالفيس
شافت صفحة اسماها ديندار الوحيشي
فاطمة : قصدك هذي صفحة شوورة
خشت للصفحة قعدت تقرى في المناشير
فاطمة : حي عليا ضلمتك نحسابك سكّرت وفتت الروايات
انقاني ضلمتك في هذي
طلعوو همّا امهكرين ايميلك وممنوع من النشر في القروبات
واي ايميل اديرة جديد يسكّرووو فيه لكّي
اووو امنزل الحلقة 30 و31 من مشاعر مطرطشة
مزلت ماقريهنش حنبدا نقراهن انمشي بيهن كساد الصبح
نرمين : فاطمة فاطمة خشي علي صفحة عاجل بنغازينا بسرعة
فاطمة : كنك
نرمين : خشي صورة خونا مع خو حنين
فاطمة : حي شن هذا تعالي ياحنين تعالي ياماما شووفن
,,,,
مروان كان عند لؤي اطمن عليه وبعدها مشى شور
سوبر ماركت
مروان :شفت يالعقرب شن جايين عالفيس
مازن :شفت اها
فارس : خلاص عليك شعب ماصدّق ''
اللي في عقله حاجة ايجينا لعندنا
حنطربقووووه
العقرب : خلّك منهم ياقوبعة ,,
مروان : لا المشكلة مش في العقرب
المشكلة في الافندي احمد حيققو امعا
مازن : الافندي احمد يعجبك حيعرف كيف يطلع منّ الموضوع هذا
نستأذنكم , تو انجيكم عندي مشوار ضروري
رد بالكم عالسوبر ماركت
فارس : اسلاحك تحتك يالعقرب
مازن وهو مبستم : كنك خايف عليا
مروان : هههههههههههه
فارس : كيف صار كم عقرب عندنا
مازن : هيّا انستو بعضكم
وطلع مازن ماشي شور المساكن
وصفّتله نجاح وين يقعد اغلب وقته رمضان
,,,,
احمد قاعد في المكتب
جا تليفون من الوزارة الداخلية
وقالّه اتبرر موقف
واتقول هالكلام صح ولا غلط
مانبّووش المندسين والخونة يستغلو الموضوع
ويحرضووو الشارع علينا ''
,,,,,