نوفيلا أحببت صعيدي

الفصل الثالث عشر

احببت صعيدي الفصل الثالث عشر

لا نعرف كيف تسير الاقدار بنا فلربما نمر بقدر نظنه صعبا غير محتمل وهو في داخله النجاة فلنحمد الله علي اقدارنا كيفما تكون.....

بعيون دامعه بدأت رقية تحكي ليونس عن ما كانت تود ان تفعله تلك الليلة :يونس انا تعبت اوووي من يوم ما مات مصطفي سبت حياتي ودنيتي وجيت هنا كنت فاكره اني هلاقي الدفا الي اتحرمت منه وكنت فاكرة اني بوجودي وسطكم هلاقي الآمان الي دايما كنت احسه مع مصطفي كنت عايزة الاقي السند يايونس ليا ولبناتي وبس، انا كنت اقدر اخد بناتي واسافر لاختي برا مصر واشتغل واصرف عليهم بس مرضتش احرمكم من بناتكم ولا احرمهم منكم اتحملت معاملة ماما الي مش عارفه السبب فيها وكره فاطمة الي بشوفه في عنيها وكلامها وزينب الي بتسمعلهم وخلاص، وفرحت اوووي لما خديجة عرفتني وقربتلي وحبيتني وبقينا اصحاب، وانت كنت دايما واقف في ضهري وبتساندني حسيت انك انت وخديجه فعلا تشبهوا مصطفي ولما بابا قال اننا نتجوز خفت ايوة خفت اظلمك وخفت تظلمني، انا مش بكرهك بالعكس انت فعلا اي واحده في الدنيا تتمناك، والي عرفته انك بتحب وردة يعني قبولك الجواز مني مجرد تنفيذ لرغبة بابا مش اكتر ودا في حد ذاته اهانه ليا
يونس:طب ما انتي كمان بتنفذي كلام ابويا وبس؟
رقية:بس انا حتي لو اتجوزتك مش هكون مع غيرك عالأقل هحترم كوني بقيت مراتك فاهمني يايونس
يونس:بس برضه مقولتليش كنتي رايحه فين؟
رقية:كنت ههرب ايوه ههرب منك ومن الجوازة ومن البيت ومن وضع انا مش حابه اكون فيه ابدا ابدا، انا جهزت البنات قبل ما يناموا ولبستهم وقولتلهم ناموا وهصحكيم نروح مشوار سوا عشان في مفأجاه محضرهالكم بس متقولوش لحد ولما اصحيكم تصحوا من غير صوت ولما حسيت ان الكل نام قمت اطمن ان مفيش حد صاحي بس لقيت الي نازل عالسلم في الضلمه وجريت وراه وصرخت ولما حاولت اخد منه مريم واشد الشال من وشه  وانت كنت جاي من بعيد ضربني ومشي بس انا شوفته يايونس شفته وده الي خلاني اخاف علي زينب ليكون عملها حاجه
يونس:مين؟
رقية:علي يايونس
يونس:علي ازاي هيخطف بته ليه؟
رقية:انا اتفأجئت برضه زيك
يونس:الحمد لله انك بخير
رقية:قلقلت عليا يايونس
ارتبك يونس فهو حقا شعر بقلق بالغ عليها:كلنا قلقنا ، انا عايز اقولك حاجه مهمه قبل م الكل يجولك
رقية بااهتمام:هتقول ايه؟
يونس:عايزك توعديني انك متفكريش تهربي لاي حته وانا هعملك الي يريحك ولو فكرتي تهربي لمكان اهربي ليا انا وانا قسما بالله لأحميكي حتي لو من نفسي يارقية
رقية وقد شعرت بشيء ما حرك قلبها:يعني مش هتتجوزني وانت مضطر يايونس توعدني؟
يونس:اوعدك مش هيحصل غير لو انتي عايزة ده
رقية:وانا مش هوافق طول ما في حد ساكن قلبك يايونس انا مقبلش اكون مجرد امر وبتنفذه يايونس وانت متقبلهاش عليا
يونس:اوعديني يالا؟
رقية:اوعدك باايه؟
يونس:انك لو فكرتي يوم تهربي لحد اكون انا الحد  ده
رقية:اوعدك يايونس