عمر .. انتى بتقولى ايه .. وامتى حصل الكلام ده .. وفين و ازاى .
ريهام حكت لعمر على كل اللى حصل مع اختها ..وعمر استغرب جدا من الكلام ده .. وبالذات موضوع ماكس . وانه ممكن يكون هو اللى عمل كده فعلا ووعدها أنه هايعمل تحرياته الخاصه وهايبلغها اول بأول باللى وصله .وهايبقى يعدى عليهم بعد ما يخلص شغله هو وسحر علشان يطمنهم لو وصل لحاجه .
فى الفيلا عند جاسر .. كان الضابط طلب من حازم أنه يخلى هدير وأحمد زميله يجوا هما كمان ويسمعهم ويشوف معاهم موضوع ماكس ده .. يمكن يكون فى حاجه مهمه وحازم مش فاكر من كتر التوتر اللى هو فيه .
وطلب من حازم أنه يجيب ورقه وقلم ويحاول يرسم وش ماكس ده وبأدق التفاصيل علشان يقدروا يوصلوله .
وفعلا قام حازم ونفذ اللى طلبه منه حضره الضابط واتصل بهدير وأحمد .. وبلغوه أنهم هايجوا على طول مسافه السكه .. وبعدها جاب ورقه وقلم وبدأ يرسم وش ماكس .
____________________________
فى شقه شادى كانت امل قاعده هى وام شادى وبيلعبوا مع حسام .. فامسكت امل موبيلها واتصلت على شادى علشان تتطمن عليه وتشوف هو فين لحد دلوقتي .
شادى كان قاعد هو وجاسر ومستنين حازم يخلص الرسمه اللى هو بيرسمها بتاعه ماكس .
موبيله رن ... فاستأذن وراح على البرنده علشان يتكلم براحته معاها .. ورد عليها لما شاف اسم امل مراته .. وتوقع انها بتتصل تتطمن عليه علشان أتأخر على رجوعه للبيت ونسى خالص أنه يتصل بيها .
شادى ... اهلا يا حبيبتى .
امل .. ايوا يا شادى انت فين كل ده يا استاذ جوعتنا معاك انا وماما وحسام ومش عاوزين نتغدى غير لما ترجع سيادتك وناكل مع بعض . الساعه بقت سبعه اهى وهايبقى عشاء مش غدا .
شادى بصوت حزين ... اتغدوا انتم يا امل انا مش هاقدر اجى دلوقتى خالص .
امل بأستغرب .. ليه فى ايه يا شادى وصوتك عامل كده ليه طمنى .. حد حصله حاجه .
شادى .. أهدى يا امل مفيش حاجه اطمنى .
امل .. اطمن ازاى بس وانت صوتك بيدل أن فى حاجه حصلت . قولى فيه ايه يا شادى لو سمحت .
شادى ... منه مرات حازم اتخطفت الصبح ومحدش قادر يوصل لها ولا نعرف سبب الخطف ده ايه .. وجاسر وريهام لما عرفوا وهما فى شهر العسل رجعه على طول من كام ساعه كده .
امل .. يا خبر . منه اتخطفت .. طيب مين ممكن يعمل كده ويخطفها يا شادى قولى .
شادى .. أهدى يا امل لو سمحتى .. واحنا لسه مش عارفين اى حاجه .. ولا عارفين مين يقدر يعمل كده .. اتغدوا انتم علشان خاطر ماما وعلاجها وعلشان كمان حسام زمانه جاع .. وانا هابقى اجى شويه كده .
امل .. ماشى يا شادى بس لو سمحت ابقى طمنى اول بأول لو وصلتوا لاى حاجه علشان خاطرى .. وانا ممكن اغديهم واجى عندكم علشان اكون جنب ريهام فى موقف زى ده .. زمانها محتاجه حد يطمنها ويهديها هى وطنط ام جاسر .
الحلقه الثالثه من نوفيلا همس الذكريات
Start from the beginning
