روان ( مُكتمله )

" الجزء ثاني "

جنات بأنكسار لان ماصدكت تنسه ويطيب الجرح ؛اوووف يحسام ليش تهيج جروح جانت ساكنه اسمعني يروحي صح اني ازغر منك بس أنته بنفسك دتكولهة اني كضيت سنين ابجي واقهر بروحي واتألم بس شنو استفاديت لا هشام رجعلي ولا حضيت بحبي بلعكس وكعت نفسي بمشاكل أكبر واكبر اني الوحيده الي تأذيت صدكني يا حسام الحقد والكره والغضب الي تدفنهن بداخلك راح يحرموك من اهواي شغلات وحتندم بعدين لان وحدك الي راح تنجرح وتنقهر وهاي حياتك بعد ..

حسام درت وجهي عن جنات وابتعدت عنها كم خطوة ماردت تنزل دمعتي كدامها حجيت بقهر وحزن متملك كلبي بس جنات أني حبيتهة صدك وبعدين منو ذاك حت تختاره وتفضله عليه بشنو احسن مني ومنين تعرفه واشوكت حبته وصارت تريده ؟؟؟؟؟

جنات بحده ؛أحمد خوش انسان واني متأكده حيسعد روان ومراح يأذيهة بيوم انته ماشفت دموعه اليوم من اجه لا وحسره كلبه وهو يشوف روان تبجي وتتوسل بأمي حت تسامحهة

حسام بغضب ؛انتي اخت منو !!!جنات لتخبليني من يوم الخطوبه وانتي ادافعين عن روان وهس جايه تحمدين بأحمد متكليلي شبيج شنو الي غيرج عليهة اشو كضيتي عمرج تكرهيهة وتشوفيهة دم سنونج هس جايه تدافعين عنهة انوب عكدت حواجبي واتقربت منهة وحجيت بكل جديه واني صار ع سنوني جناااااات شنو الي تعرفي وضامته عني ؟؟؟هاااا احجييييييييي

جنات بخوف والدموع تجري ؛حساااام الله يخليك بس اهدئ هس اسولفلك خليته يكعد وحجيته كولشي صار اشون تعرفت بأبراهيم عن طريق ناديه ومن حبيته ودزيتله الصور واشون روان ساعدتني واحمد هو الي تكفل بالموظوع وراح حاسب ابراهيم وخوفه وخلاه يعتذر ويسويلي الف حساب وراح هدد ناديه تبتعد عني ومن يومها اني تغيرت للافضل رجعت لسابق عهدي وطيبه كلبي بلا كره ولا حقد الي يعيش بكلب اسود حيشوف كلشي اسود ومراح يستمتع بالحياه باللحظه حيكبر سنه من القهر والسواد الي بداخله ....

حسام ؛بقيت مصدددوم وممصدك جنات شدتحجي معقول كل هذا صار لا واحمد هم يدري وهو الي ستر ع اختي واخذ حقهة ومافضحهة مدري افرح لأن اختي خذت درسها وتعلمت من اخطائها مدري انقهر واحزن لان فضلت الغريب يساعدهة ع انها تجي تصارحني وتطلب مساعدتي هيج جان حب روان عاميني عن اختي واهلي واعز ناسي بس لا هاي انانيتي روان مو السبب الخلل موجود بيه لو مجنت اناني واريد اعيش حياتي وبس افكر اشون ارتاح جان حسيت ع اختي اذكر جنات بقت فتره اسبوع لا تنزل تاكل ولا تكعد ويانه وحت من اشوفهة صدفه جانت مهمومه وحزينه ليش ما رف كلبي عليهة ليش مابيوم صعدت غرفتهة وسألت ع حالهة اوووف والي جرحني اكثر كل الي صار بيهة بسبب ناديه وحده تعرفت عليهة صدفه وصارت بينه علاقه انوب مليت منهة وتركتهة حالهة حال غيرها من مليت وعفتهن صدك لو كالو تندار تندار وترجعلك بعرضك يكولون حت تصحى من غفلتك وتتغير لازم تتلقه ضربه قويه يأما تكسرك وتدفنك بالاكثر واما تحييك من جديد ماكو شي يصير من العدم لكولشي اسباب ورب العالمين سبحانه وتعالى ميخلي شي عبث حشى لله