نـــــــــــــــــور
الجزء الرابع
كل ما اتصلت نوره على خليفه حصلته مشغول لين ماتملكها الخوف وعقب الغيض
نوره:وبعدين معاه هذا يلعب عليه ولا ياخوفي اليهال صار الهم شي وعلى اخر الليل اتصلتله
وكان ميت يبا الرقاد
خليفه:الوووووو
نوره:انتظرت وايد ومحد يانيه
خليفه:.....................
نوره:الو......الو
خليفه:هلاااا
نوره:انته قاعد تلعب عليه....مسوي عمرك راقد عشان تتهرب من اتصلاتيه
خليفه:هااااااااه منو انتي؟
نوره:انته شوووووتلعب باعصابي؟
خليفه:لا والله انتي الي قاعده تلعبين بقلبي
نوره:استاذ خليفه ...ممكن اتصحصح معايه انا خلاص تعبت من الي تسويه فيه
حس خليفه ان الصوت الي يكلمه معصب
خليفه:الووو منو معايه؟
نوره:يا الله وبعدين يعني
خليفه:انتي منو؟
نوره:انا نوره
خليفه:شبلاج معصبه؟
نوره:صحصحت؟
خليفه:انا صاحي منو قالج انيه راقد؟
نوره:ليش ماطرشت اليهال مثل ماوعدتنيه؟
اتذكر خليفه السالفه
خليفه:صار عنديه ظرف
نوره:وانته كل حياتك ظرووف
خليفه:وبعدييين ....اسمعينيه انا تعبااان بكلمج باجر
نوره:زيين بنشوف شو اخرتها معاك
سكرت نوره وتم خليفه ايطالع التيلفون ويحاول يتذكر اهو متى شل السماعه
.........................................
اتصل بدر لزايد مثل ما اتفق معاه
زايد:هااه شو سويت؟
بدر:قلتلهم انك مستعد تاخذلهم بيت وتفتح الهم حساب واتوفر الهم كل شي مقابل انغير جوازها ماطاعت
زايد:كيييف سوت الها جواز اماراتي؟
بدر:عمك الي سواه والريال كان دائمن يجدده عن طريق اصدقاءه الي يعرفهم اهنيه
زايد:انا لو ايطيح الجواز في يديه قطعته الها....بس تدري انا البارحه فكرت في الموضوع وايد اخاف انهم
ايكبرون اليه السالفه وتكبر عند هل الاشاعات
مافي حل غير انيه ايبها عنديه اهنيه مثل ماتريد وانا اعرف كيف عقب اسيطر على الموضوع
بدر قلها انيه اباها تي بشرط ما ايي معاها اي حد من الي يقربون الها
بدر:زايد انته متاكد من الي تقوله؟
زايد:هيه متاكد...ابا كل شي تحت يديه وبرويك بنت الباكستانيه وين بعقها...مفكره اهيه بتي بتحصل حلال ابوها اهنيه
انا اعرف شغلي معاها
بدر:انزين وان اصر قريبها ايي معاها
زايد:محد ايي غيرها...وشف رتب الموضوع في المطرات عشان ماينتبهون للاسامي المتشابهه ...حاول انته تمررها بدو مايحسون...بدر انته قدها
انا بصراحه الموضوع مارقنيه واريد اخلص امنه
بدر:ان شالله
سكر بدر وتم زايد ايفكر في بنت العم العله مثل مايسميها....."انا زااايد اخر زمانيه اتكون عنديه بنت عم امها بكستانيه الله يسامحك ياعميه
هذي وين بوديها باجر ان يت...ماعليه والله لاخليها تكره اليوم الي فكرت تي فيه الامارات
نزل زايد للدور التحتي ونده على هنيه مدبرة المنزل الخاصه عنده
زايد:هنيه...ياهنيه .....هنيه
زايد يعرف هنيه من ايام ما كان يدرس في مصر لانها كانت تيهم الشقه تهتم بتنظيفها واكلهم
وبعد ما رجع زايد للامارات يابها وعينها مدبرة المنزل وياب بعد معاها زوجها وعيالها
هنيه:ايواااياباشه
زايد:تعالي اهنيه
ركضت هنيه لزايد وهيه تمسح ايديها في المريله
زايد:اسمعينيه ياهنيه
هنيه:ايوااا انا كلي ودان يابااااشه
زايد:عقب كم يوووم بتي خدامه يديده
هنيه:ليه ياباشه دا الخير كتير؟
زايد:اسمعينيه انتي
هنيه:ايواااا
زايد:هذي الخدامه احنا مسوين خير في ابوها كان من زمان يشتغل عندنا..وانا ماريدهااتسوي شي بس خليها عندكم في ملحق الخدم
وشوووفي ترا مااااريد اشوف ويهها اهنيه في الفله...تسمعين؟
هنيه:حاضر ياباشه
زايد:واتحملي تطلع برا ولا اتكلم حد من برا اباج اتراقبينها زين
هنيه:ليه يابااشا هيه فيها حاجه؟
زايد:مالكيش دعوه انتي باأ
هنيه:انته تؤمر ياباشا
التفت زايد بيروح فوق عقب رد والتفت الها
زايد:اخبار فريد شوقي؟
هنيه:الممسل
زايد:انتي مب ولدج اسمه فريد وريلج اسمه شوقي
هنيه واهيه تفكر:اااه والله تسدق انا ماكنتش عارفه
زايد:اظاهر انه استفحل عندج
هنيه:هو مين؟
زايد:سلامتج سلامتج...المهم لاتنسين الي وصيتج عليه
هنيه:من عنيه ياباشا
ركب زايد السلم وهو ايفكر ان الي بيسويه هو عين الصواب على الاقل يضمن ان البنت مايوصلها حد غيره ويفضحه
كان يشوفها نكره على حياته فقراره الاخير انه يحبسها عنده ويقطع اي اتصال الها بالعالم احسن طريقه
خصوصا الحين لين ماتعدي فترة الانتخابات
.................................................. .........................
دخل مروان واحد من الدكاكين الي اتكون في وسط البيوت السكنيه... كالعاده بشورت وفانيله كت
ومروان واحد طويل وجسمه رياضي ومعضل
سلم على راعي الدكان وقعد على الثلاجه وكل شوي طلع له ايسكريم وكله تم فتره طويله
وراعي الدكان حس بضيق منه
صاحب الدكان:جييب فلوس
مروان:بعدنيه ما خلصت
صاحب الدكان:شووو خلص ياله رررح
مروان:تعال دكان ابوك هذا اتروغنيه امنه شبلااك انته؟
صاحب الدكان:انته في واحد ساعه يجلس بس اكل اكل مافي يدفع فلوس
مروان:انزين يوم بطلع بعطيك
هز صاحب الدكان راسه مش راضي بالوضع هذا
مروان:ههههه
نقز مروان وخذله علبة بيبسي وخضها بدون ما يشوفه صاحب الدكان وفتحها عشان اطيش في كل مكان وتخيس الدكان
حينها زدا صريخ صاحب الدكان وهو ياشر لمروان يطلع
مروان:ما بطلع قلتلك يوم بخلص بطلع
صاحب الدكان:انا بيكلم شرطه
مروان:اوكيه سوي كلام مافي مشكله
عصب صاحب الدكان اكثر واخذ يشتم ويسب
رجع مروان وقعد على الثلاجه وهو مش مفتكر في كلام صاحب الدكان الي تقرب من مروان وتم ياشر له يطلع
صاحب الدكان:خلاااص روووح ما يريد فلوس
مروان:بعدنيه ما خلصت
صاحب الدكان:انته واجد مشكله
مروان :شووو مشكله...انا في قاعد
صاحب الدكان:ياله روووح انا مايريد انته منيه
مروان:ايييه مافي سوي مشكله انته نفر سرسري حرامي
عصب صاحب الدكان زياده وقعد يدز مروان من على الثلاجه مسكه مروان ودزه دزه وحده خلته يطيح على الارض
قام حينها صاحب الدكان ومسك عصى طويله وتقرب من مروان في محاولة ظربه وقام له مروان وظربه هو بظربه قويه
ثانيه طيحته بعد مره ثانيه
صرخ حينها صاحب الدكان مستنجد بشخص كان في لستور التابع للدكان وطلع الهندي الثاني
وصارت المواجهه بين مروان والهندي اكل منها الهندي ظرب ما اكل مثله في حياته وانتهت الظرابه بكلبشات
طلعهن مروان من جيبه وكلبش فيهن الهندي وهذا هو الي كان مروان ايريده...انه ايطلع الهندي
هذا من المخبا الي هو فيه لانه من يومين ايراقب الدكان وشاك انه في هذا الدكان
مروان ضابط شرطه في التحريات عصبي زياده فوق اللازم مرااات يكون مرح ومرات ما يعرف الي جدامه
وهو اخو بدر و يصغر عنه بسنه ونصف
دخل مروان مخفر الشرطه وتم يضرب الهندي لين حب الدبس واعترف لمروان بكل حاجه كان ايريدها مروان
.................................................. ....................
طلع فهد من الميلس ايودع ربيعه وبعد ما طلع ربيعه من الحوش التفت عشان ايروح داخل البيت واتفاجئ
باليازي قاعده على السلم الي جدام البيت رجع والتفت للميلس مكان ما كانت سيارة ربيعه واقفه
ورجع والتفت الها تقدم منها كم خطوه
فـهد:انتي كنتي اهنيه يوم تطلع السياره من الحوش؟
رفعت اليازي نظرها صوبه ورجعت عقب اطالع جهه ثانيه
فـهد:اكلمج كنتي موجوده اهنيه يوم تطلع السياره قبل اشوي؟
قامت اليازي الي لاحظ فهد انها مطلعه غرتها عادي والتفتت اتريد تدخل داخل
صرخ عليها:انا اكلم منوووه؟
وقفت ورجعت تلتفت صوبه
اليازي:اتكلمنيه انا؟!!!!!!!!!ّ
تم فهد ايطالعها مستصيب يعني منو بيكلم غيرها
فهد:اتشوفين حد اهنيه غيرج؟
اليازي:وانته اتشوف فيه اربع اريول عشان اول ما تطلع السياره وقبل لا تلتفت ايي اقعد اهنيه
فهد:تطنزين حضرتج....يعني كنتي موجوده؟
اليازي:وشو المشكله؟
فهد واستغرابه ايزيد منها:لااااا عادي عندج يعني؟
اليازي:اصلا انا ما افتكرت فيكم؟..عاديه قعدتيه مافيها شي
فهد:لا والله.....اتسمين قعدتج مجابله الريال وانتي ظاربه بالقذله عاديه ومفيها شي ...وبعد ما افتكرت فيكم
اليازي بنظرات غيض:شو بتسوي بتضربنيه ياله تعال اضرب
كانت نظراته شرار وهو ايشوفها واقفه تتحدا واول ما صعد السلم سلمتين ركضت اهيه داخل ولحقها معصب
على طول راحت وازبنت ورا يدتها الي رفعت العصى اتهدد فهد
فهد:تعالي اهنيه تتحسبينيه ما اقدر اوصلج
الجده:ااييههها يافهيدان انته شبلاك مصبح جنك ارضي
فهد:هذي بنت ولدج تبالها تاديب ومحد بيادبها غيريه
اليازي:سر ركب نظرات اول شي عشان اتعرف اتفرق بين الناس
فهد بغيظ:وقسما بالله ان مسكتج اليوم ان محد يقدر ايفجج منيه
اليازي واهيه اطلع لسانها:ها ها ها ماتقدر
نط فهد ورا يدته ومسكها من شعرها
صرخت اليازي بصوت عااالي تستنجد والجده اتصارخ وتضربه بالعصى وماتركها فهد الاونصف شعرها في يده
فهد وهو يطلع مولع من الغيظ:كلبه حقيييره انا برويج
اليازي بصرااخ:انته الحقير انته الكلب يا حيوااان
التفت لها:انجبي والله لا اذبحج
الجده:حسبي اللــــــــــــــــــه عليك يا فهيداااااان حسبي اللــــــــــــه عليك يا فهيدان ذبحت لبنيه لا عينت خير
اليازي بصراخ:انا ما اريييييد اقعد اهنيييييه اريد ارووووح بيت خالوووووه
فهد بعصبيه:هيييه حق لهياته اهناك من مول لمول تتحسبينيه ما ادري عنج
الجده:انقلع برا انقلع وواللـــــــــــــــــــه لا اخبر عليك زاااايد واخليه ايسنعك يالخمااام
فهد:خليه اول شي ايي ايسنع الخايسه هذي
اليازي:حرمتك الخاااااايسه يالخايس
فهد:جـــــــــــــــــــــــــب
دخلت ام فهد على اصواتهم العاليه:اذكرو الله شبلااكم
الجده:تعالي سنعي ولدج لحمار جتل المسكينه يتيمه ومتفرص فيها
طلع عنهم فهد وهو ايهدد
الجده:هذا كله منج ومن دلعج الزايد له
ام فهد:حشى عليه انا دلعته؟
الجده:هييه عيل انا .....مب انتي الي كل يوم اتقولين له ادبغ خواتك
ام فهد:انا يا عمتيه؟!!!!ّ
ام فهد:جب جب قومي انتي قومي وبس صياح ...وعليه رفجه انتي انه اليوم يتسنع
ام فهد:لا حول ولا قوة الا بالله
الجده:هيييه ادعي عليه بالموووت ادريبج ما دانينيه
ام فهد:يا عمتيه انا متى دعيت عليج
الجده:ما اسمعج وانتي اتقولين لا حول ولا قوة الا بالله تبين ربيه يجتلنيه
هزت ام فهد راسها ماتقدر اتقول كلمه عشان عمتها ما تفهم غلط
الجده:هيييه خبلا انا اتهزيليه راسج
قامت ام فهد وحبت عمتها على راسها:يا عمتيه انتي الخير والبركه وانا الخبلا الي ما اعرف شي
الجده:زييين يوم دريتي بعمرج
التفتت عقب لليازي:قووومي انتي وبس صياح
.................................................. ............................
دخل خليفه للبيت وطلب من الخدامه اتجهز اليهال عشان ايوديهم الحديقه
وبعد ما وداهم وهم راجعين اتصلت نوره
خليفه:لحووووه نسيتها هذي.....الوووو
نوره:متى بتيب اليه اليهال؟
خليفه:الناس اتسلم اول شي؟
نوره:قلبيه محرووووق ابا اشوفهم وانته دوم تتهرب ماتبا تيبهم
خليفه:لا والله...انا انسى سالفتج المهم وين البيت احنا رادين من الحديقه بمربهم عليج
ابتسمت نوره:صدق
خليفه:هييه عطيني العنوان
اعطته العنوان وقالت له انها بتنتظرهم برا
بعد ربع ساعه وقف خليفه السياره جدام البيت وطلعت نوره بسرعه وما حس خليفه
الا باليهال يتناقزون محولين من السياره بسرعه وراكضين صوبها
حول من السياره وعينه على الانسانه الي متكومين عليها اليهال وهيه قاعده على الارض وحاضنينها كلهم
خليفه وبعده نظره عليهم الا انه ما قدر ايشووف نوره قفل سيارته وسحب سويجه وتقدم منهم
كان يسمعها اتصيح واهيه مطوقتنهم بايديها
تاثر خليفه بالموقف وصد بنظره بعيد عنهم بعد اشوي عدلت نوره نقابها ورفعت نظرها للشخص الواقف قريب منهم
ينتظرهم ايخلصون من اللقاء....نوره اول ما طاح نظرها على خليفه حست بدقات قلبها الي بدت ادق بقو
كانت متخيله عمهم كبير في السن لاكن الي جدامها غييير عن الي تخيلته....ابتسم خليفه وذااابت نوره من ابتسامته
وصرفت نظرها بعيد عنه
خليفه:السلام عليكم هاااه ارتحتي الحين
وقفت نوره واهيه مرتبكه:جزاك الله خير والله بردت عليه افاديه كنت احاتيهم
خليفه:لاا اليوم هم احسن عن امس....اليوم صارو يسمعون الكلام عشان جذيه وديتهم الحديقه ويبتهم لج
دانووه:خالوه انتي لازم اتلوحين معانا
نوره:انا لا حبيبتي انا بتم اهنيه وانتم تعالو عنديه كل يوم
دانووه:لا لا انتي تعالي معانا انا ما بروح معاهم عيل
ضحكت نوره ونزلت تحت عندها
نوره:حياتي الدان لازم تسمعين كلام عموه وتاكلين وايد وانا كل يوم بشوفكم باذن الله
خليفه كان مستغرب اهيه ليش ما قالت الهم يدخلون داخل
تمت نوره تهمس الهم وتضحك معاهم وخليفه واقف قريب منهم
طلع واحد من شباب البيت وشاف خليفه وقربه للميلس
سكتت نوره وما تكلمت وتمت مع عيال اختها تحت الشيره الي جدام البيت ما حبت ادخلهم داخل
لان البيت فيه يهال وايد وتدري انهم بينشغلون معاهم وما كانت اتريد اتضيق باهل البيت بعيال اختها
بعد نصف ساعه طلع خليفه وكان مبين على ويهه علامات الضيق
خليفه:ناصر يالله ركب اخوانك السياره
دانوه:انا اريدخالووووه
خليفه بغيظ:ناصر دخل اختك السياره
مشت نوره معاهم لين السياره وركبتهم فيها وهيه اتوصي هند على خواتها وناصر بعد
واول ما التفتت عشان ترجع وقفها خليفه الي تم واقف برا
خليفه:ليش ما قلتي اليه؟
التفتت نوره له:اقولك شوووه؟
نزل خليفه راسه تحت:انج تميتي بروحج ومالج حد
انصدمت نوره انه عرف:ا ا انا ا انا ما مادري يعـــني...ا
نزلت راسها تحت وتمت ساكته
خليفه:قاعده عند ناس ما يقربون لج؟
نوره وبدت دموعها تنزل:شوووتبانيه اسوووي
التفتت للجهه الثانيه ودخلت يدها تحت النقاب تمسح دموعها
خليفه:جاان قلتيليه
نوره:اقولك بصفتك شوووه؟
خليفه:انا عم اعيال اختج ولازم بكون مسؤل عن خالة عيال اخويه
نوره:الي يسمعك ايقول وايد الفرص الي كانت بينا عشان اقولك وانته كل مره...تستعجل في تسكير التلفون
خليفه:ما كنت ادري انا شفت يوم العزا ناس وايد حاضره تحسبت انهم من اهلكم
نوره:انزييين شو بتسوي الحين ترا ويهيه منقطع من هالناس
خليفه:تعالي معانا
نوره:عندك حرمه في البيت
خليفه:لااا اليهال موجودين وهم محتاجينج
نوره:انا اسفه ما اقدر اروح معاك ...حتى لو كانو اليهال موجودين
خليفه:وليش شو المانع؟...متروعه منيه؟
نوره:المانع سمعه يا استاذ....انا ما اريد اتعرض لكلام الناس
خليفه:وانتي وين حضرتج قاعده الحين
رفعت نوره نظرها له وحس خليفه بشي غريب من نظرة عيونها
نوره:على الاقل البيت هذا فيه كذا عائله...مع انيه احس ببعض الحريم فيه متضايقات من وجوديه
خليفه:وشو الحل يعني؟
نوره بترجي:خل اليهال ايردون معايه البيت...احنا كنا عايشين فيه وا
سكتت ما كملت كلامها لانه تذكرت ان الوضع تغير وايد ونزلت راسها تحت
خليفه وهو رايح للسياره:عطينيه مهله يومين وانا بحل هالمشكله وبطلعج من هالبيت يالله فمان الله
ركب خليفه السياره ومشى وهو ايحس انه بعده متضايق من الي عرفه
خليفه:ناصر انته هب ياهل ليش ما قلت اليه ان خالتك ما عندها حد
ناصر:قلتلك وانته ما صدقت
خليفه:جان فهمتنيه؟
ناصر:هذولا ما يقربون لخالوه عيل؟
سكت خليفه وما رد عليه...لااازم يقنع اميره تتزوجه وتي اتعيش عندهم عشان نوره ترضى اتيي وتعيش معاهم
وبعد ما فتح خليفه الموضوع مع اميره ثارت اميره معصبه
اميره:ان شالله تبانيه اسكن حرمه غريبه في بيتيه
خليفه:هذي خالة عيال اخويه
اميره:انا لين الحين مش متقبله عيال اخوك تيب اليه خالتهم
صرخ خليفه:اميييره وبعدييين يعني معاااج...على الاقل بتفكج من تربيتهم وانا ببني الهم ملحق في البيت الهم والخالتهم شو تبين اكثر من جذيه
اميره واهيه اتفكر:وخالتهم هذي شو كبرها؟
خليفه:حرمه كبيره على ما اعتقد
اميره:لاااا ما اريد اتزوج الحين صرف اليهال وخالتهم اول شي وتعال عقب قل اريد اعرس
سكرت اميره التيلفون في ويه خليفه الي عصب من حركتها
خليفه:زيين يا اميره تحملي عيل الي بيصير
اتصل خليفه على نوره وبعده معصب
نوره:الوووو
خليفه:اسمعينيه زين ما في حل غير انيه املج عليج عشان تين اتعيشين عند عيال اختج
وتقطعين كلام الناس
بلمت نوره من كلامه وما عرفت شو تقول
خليفه:انتي معايه
نوره:هااااه انا ا ا
خليفه:مافي حل غير هذا اليهال محتاجينج وانا تعبت معاهم بس بشرط الزواج هذا بيكون بس على الورق لانيه خاطب وبتزوج
عن قريب وانتي بتعيشين مع عيال اختج معززه مكرمه انتي بتقدمين اليه خدمه وانا بقدملج خدمه بالمقابل....هااه شو قلتي بعطيج فرصه اتفكرين
واتردين عليه عقب
نوره:انا ما فهمت انته شو تقصد بالضبط
خليفه وهو يتنهد خلاااص تعب:بتزوجج بملج عليج يعني بتكونين حرمتيه بس جدام الناس ومافي اي حقوق بينا غير الاحترام وتبادل المنفعه
الي اهيه انيه استر عليج واخليج اتعيشين في بيتيه باسم زوجتيه وانتي بالمقابل تعتنين بعيال اخويه
نوره:هذولا عيال اختيه ومن الاكيد انيه بعتني ابهم
خليفه:راضيه تكونين زوجه بس بالاسم وتعيشين عندنا قد ماتريدين واذا طلبتي الطلاق في يوم انا ما عنديه مانع
كان كلامه قوي عليها وضايقهاا وايد لاكن ما بليد حيله
نوره بدون تفكير:انا موافقه
خليفه:مابتفكرين؟
نوره:ماعنديه خيار ثاني
خليفه:حياتيه الخاصه مالج خص فيها
نوره:ماليه خص في حد الا العيال وبس
خليفه:يعني فهمتيليه
نوره:فهمتلك ومشكور انك قدرت اتلاقي حل للوضع الي انا فيه
خليفه:انا خاطب وبتزوج قريب
نوره:الله ايوفقك انا ماليه خص في حد الا العيال بس ...خطيبتك الي بتتزوجها بتكون راضيه؟
خليفه:ماعليج انتي ...انا بتصرف...خليج جاهزه بيب الشيخ وباييكم الحين املج
نوره:الحين؟
خليفه:هيه الحين لعيال محتاين لج والريال الي استقبلنيه في البيت الي انتي فيه ما قال اليه
سالفتج الا لانه اكيدمتضايق من وجودج اهناك
سكرت نوره عنه بعد ما خلص كلامه وهيه متضايقه على الاخر
##
##
##
ودمتم وديمه العطا
