السلام عليكم ..
طبعا جدا جدا اسفة عن التأخير في تكملة القصة ...
واشكر حبيبتي ام اية على المنشور الي عزيتوني بي واشكر كل من عزاني في وفاة والدي ربي يحفظكم ويحفظ اهاليكم اميين يارب العالمين مقصرتوا والله ..... ويكفيكم كل شر اختكم وئام هادي البياتي...
راح اكمل باقي القصة لان محبيت اخليكم تنتظرون اكثر .....
#للنصيب_حكاية_اخرى
بقلمي وئام البياتي..
الجزء ٢٥
دك تليفونه جانت مروة جاوبها وطلع برة خرب روحج مروة بس لا تحجيله...
لملمنا الصينية وكفت داغسل مواعين وطب للمطبخ نار صاير عرفت كلتله..
سيف.. غلوة عوفي الي بأيدج وتعالي وراية ..
غلوة.. راح للهول كاعدين كلهم بس ضيف طالع طبيت جان يصيح ايمان ..بس اني شنو من يمي رجلي صارت خيوط اجتي مناك..
ايمان..ها عمر ايمان فدوة لحلكك من تكول اسمي ..
سيف.. كعدي..
غلوة..اني وكفت اباب الهول .خالة كاعدة وغيث شايل ابنه ودنيا على حس العياط..
دنيا..شكو غلوة..
غلوة.. مروة خابرته يمكن كلتله..
دنيا ..اي والله عاشت ايدها احسن مني المفروض اني احجي..
سيف..يمة منو اجة اليوم..
ام سيف.. مروة وسهى مرت ابراهيم صديقك ليش وليدي صاير شي ..
سيف..انتي كولي يوم شصاير هاي شمجفصة ....وياشر على ايمان ..
غلوة..ظلت تذب الوان ..
ايمان.. مكلت شي والله حبيبي دنسولف على الاطفال وانطيت رأيي ..
سيف.. وانت منو مصخم وجهج وطالب رأييج ..شوفي اعتقد وصلت حدها وياج لان متنعدلين ابد وتريدين تنهين حياتج وياية بأيدج بس صدكي ابنج متشوفي بعد لان اذا انتي وامج ربيتوا يطلع سكط مثلج ..
غلوة.. كامت تبجي وتتوسل بي متريد ترجع لاهلها ..
سيف..فوك جيفتج كلنا دنشوف منو شايل البيت امي ودنيا وغلوة وانتي بس اكل ونوم ..
ايمان ..اي غير حامل ياعيني..
سيف..دنيا هم جانت حامل ووحدها بلبيت وشايلته وحدها على راسها بس الخايس خايس..
ايمان..مقبولة منك ياعمري..
سيف.. هاي اخر مرة ..واخر مرة من يجي خطار تنزلين كائن من يكون متطلعين لان تخزين اكبر واحد زين لو لا حتى سلام متسلمين على احد لان بصراحة انتي مو واجهة ويكولون هاي مرت المحامي سيف
ايمان..يعني شنو ابقى محبوسة..
سيف.. والج عين تحجين كافي انلصمي ..
غلوة..اندارت عليه وظلت تخنزر ..
سيف.. هاي عليمن هيجي تباوعين تعاي لج تعاي ..
غلوة.. كام عليه غيث لان راد يضربها.. هي رأسن طلعت من الهول ..باوع عليه.. وانتي..انداريت عليه ونزلت دمعتي..
سيف .. تالي وياج غلوة ليش متحجين ..
ام سيف.. لان بت اوادم ومتريد تسويلك مشاكل عوفها لتلوثها خليها على طبيعتها اني احسد نفسي على دنيا وغلوة الله يحبني ونطاني هيج بنات..
غلوة.. طلعت من الهول خنكتني العبرة معقولة هيج اني صدك ليش اسكت عن حقي ومن وحدة اصغر مني عفتها بيد الله لان اني ماكدر احجي ماكدر اتقبل احد يضوج مني ..مو هي ابد....بس خالة وسيف وغيث وضيف ودنيا من اضل اتشكى راح تكثر المشاكل وماريدها تصير من وراية ...
مرت ايام وايام وحنية سيف مادري وين اوديها حبيبي مغركني بمشاعر وبحب ماكدر الزم عليه هفوة..بيوم خالة رادت تسبح وردت اني اطببها اسبحها لان داشوفها مالها خلك عدها ضغط على غفلة الواطي يهبط مقبلت لحت الا تطب وحدها ..كلتلها كلسه اصيح عليج عود..طبت للحمام شوية وسمعنا وكعتهارحت اركض الولد وياية بس ميكدرون يطبولها طبيت اني جانت واكعة وفاقدة يمكن ضغطها طبيت بدلتلها سيف حضروا السيارة ترة مواعية على روحها لازم نوديها مستشفى ..دنيا جبة وشال فدوة..طلعت لبست جبتها وشال وطلعنا نركض وديناها للمستشفى ..طلع عدها فطر بلحوض وماتت من الوجع بس تعيط وتبجي معفتها ابد تخيلتها امي كمت اداريها اكثر من اللازم حتى الله يصخي احد يداري امي ويدير باله عليها تبجي واني لازمتها معفتها لحظة خوش مرة ولسانها يخبل وكلش حنينة عليه مشفت منها الا كل خير...كتبولها علاج ومسكنات جبسولهيا ومتكدر تكوم جابولها كرسي متحرك وراح غيث يركض اشترالها واحد جديد واجة واخذناها ..بس طبت غرفتها بجت .. ها ها خالة ليش هلدموع.. سيف هم دمعت عينه وحتى غيث وضيف الشعنون ..خطية كلش حنان عليها هي انقهرت على نفسها وهم هم انقهروا عليه لان متكدر تكوم ..بعد جان الدوام مبادي وكضيته كله يمها معفتها لحظة وسيف عاذرني طبعا لان امه وهمة وياية وياية ودنيا هم ليل نهار .خطية تكول الله منطاني بنات انتن بناتي عوضني الله بيجن ..فتحولها الجبس واني حتى علاج طبيعي جنت اسويلها ..ايمان متطب الغرفة تكول نفسيتي تعبانة والحمل متعبني ماكدر اداري احد محد يعتب عليها لان الكل يعرفها....
محد عافها من عدنا علعلاج والمداراة والاكل الحمدلله صارت احسن وكامت توكف على حيلها وتمشي شوية شوية تحسنت حالتها ..واني حتى الحمل نسيته وهو حبيبي ولا فد يوم سالني عايفني واني مبطلت مراجعات ومقويات ومنشطات ..وخلص الشهر وهاي طبت بشهرها وتخبلت علينا بس هي حبلت وراح تجيب..وبدة دوامي ومو يومية اداوم لان بس كتابة والحمدلله سيف وياية بلمصادر والكتابة وفات اسبوعين وبيوم رجعت من الدوام وصلني سيف للكلية مطولت وخابرت السايق رجعني طبيت لكيتهم بلمطبخ خالة من تشوفني عيونها تضحك..
ام سيف.. هلا يبعد بيتي بستها من راسها ويوسف فدوة صار عمرة شهرين اخذته وكعدت بلكاع ابوس بي من حلكه وطبت امه سلمت عليه خطية ..وايمان جانت وراية اني ممنتبهة عليها..
ايمان ..اي هايهية كاعدين ونخدم بلرعن وسكتت ..
غلوة.. انداريت عليها ..هاي عليمن ..
ايمان.. انتي منو يمج...
غلوة.. تقدمت عليها ..منو الرعن ..
ايمان..اكعدي وانجبي كافي جيفة دكتوراه شنو هلرعانية خداديم عد حضرتج ..
غلوة..لاول مرة احجي ..والله ماكو الجايف والخايس غيرج بيج خير نظفي غرفتج ريحتها تذبح من التخمخم حتى سيف مهزوم منج ومن وصخج..
ايمان ..هاي عليمن بت الكلب انعل ابوج يابو الجابج علينا...
غلوة.. طبعا احس سطله مي بارد شمرت على راسي.اني بحياته مجبتله المسبه النوبة من يموت ..دنيا ضربت على حلكها وخالة مسكتتلها بقت تغلط عليها ..اني كمت ماشوف كدامي من جابت طاري ابوية الله يرحمه فقدت كمت عليها وحتى حملها مشفته لزمتها من شعرها وانطيتها راشدي وبقيت لازمة شعرها ..ظلت تصيح وتعيط تريدين تموتين ابني ..شوفي لج ساقطة يابت الشوارع تربيتج الزفرة متطلع براسي اذا جبتي طاري اهلي والله رجلج اكسرها طبعا شعرها معفته ونصة اجة بأيدي ..وهي العياط العيطته صدك مال ادبسزيات وطب سيف معبالي جاي وحتى لو اعرف ردة فعلي جانت بدون تفكير وهي تستاهلة ..من شفتها غلطت على ابوية ..طب بعلو صوته
سيف...غلللللللوة..
غلوة.. شمرتها على القنفةوانداريت عليه.. نعم ..
سيف.. هاي شنو الي سويتيه ..
غلوة.. الي تستاهله واذا تريد بعد تدلل لسانها اكصه ..
سيف.. انتي شنو مدتشوفين بطنها ..
غلوة.. ركضت عليه من شافته يدافع عنها ..
ايمان.. شفت حبيبي ضربتني على بطني تريد تموت ابننه تكولي حتى لو جبتي اموته مااخلي يعيش عفية هاي مخبلة اخاف من عدها..
غلوة.. طبعا خاله ظلت تصيح عليها ..
ام سيف ..ولج كافي جذب حرام عليج باجر عكبة تجيبين خافي على روحج خافي على ابنج ..ماكو هيجي حجي وليدي هاي جذابة ودتتبلى على البنية كلشي مصار..
سيف.. اعرف يمه ميخالف بس الي شفته لازمتها من شعرها المفروض تراعي حملها ..
غلوة..اني وياه عين بعين ..واسوي اكثر واكثر سيف بعد مااسكت على اي اهانة اني ممجبورة اعيش وية هيج وضاعة وقذارة حشاكم كلهم عداها هي.. تقدم عليه ..
سيف.. هاي عليمن..
غلوة.. على مرتك سيف.. لو اني لو هي للاسف راح اخيرك ..سكت .. هسة تختار لان اني بعد ماريدها كبالي ابد ولو لمحة .. طبعا كدام الكل داحجي وهي هم واكفة وصعدت للسما لان كام يدافعلها..
سيف.. لا وكمتي تتشرطين ست غلوة..
غلوة.. اولا اني غلوة..واختار سيف صار ٨ شهور مبقت كلمة مسمعتها اني ممجبورة على هلعيشة ..
سيف.. اني مااجبرج..
غلوة.. شلت راسي يعني...
سيف.. يعني براحتج ..
غلوة.. اوكي سيف براحتي عفتهم داطلع صاحتني خالة ..رجعتلها هايمة..
ام سيف.. وين رايحة بنيتي ..
غلوة.. بست راسها شاورتها خالة مداكدر اتحمل بعد تقبليلي الاهانة..وعفتها ورحت لغرفتي...لميت هدومي ودزيت مسج لساهر تعال اخذني ..ماكدر اخابرك ساهر بس تعال هسة ..طب للغرفة ..
سيف.. غلوة ماكو طلعة..
غلوة.. اسفة سيف ماكدر ابقى ابيت هي بي نهائي وبدون مناقشة ..
سيف.. دتتهدديني..
غلوة.. لا بس داكلك قراري ..
سيف.. اي مو متزوجة خركة...
غلوة.. لا حشاك بس اني ماكدر اعيش بهيج بيئة كلها مشاكل لان الي عشته كافي سيف وتعبت منه فأني ممجبورة اتحمل اهانة من احد بعد ابد..
سيف.. غلوة اذا طلعتي ترجعين برجلج اني مارجعج لان طبيت شفتج انتي جارتها من شعرها .اني اعرف هي متعدية بس مجان لازم ردة فعلج هيج مو صح...
غلوة.. لا مو صح ولترجعني سيف لان اني ماريد ارجع لان اني مااستاهل.. اخذت جنطتي وكتبي كلهم لميتهم ..داطلع اباب الغرفة ..
سيف...غلوة..
غلوة.. انداريت عليه نعم سيف ..
سيف.. ماكو طلعة..
غلوة.. لا سيف راح اطلع ومحد يكدر يمنعني ..تقدم عليه وانطاني راشدي وجهي على نفس الحطة نزلت دموعي انداريت عليه دموعي ملحكت عليها..تسلم سيف عاشت ايدك اخذت بطار امونة جريت جنطتي وطلعت ...بلمطبخ خالة تتوسل بيه .. خالة بعد ماكدر ابقى صدكيني وهو مساندها لان راح تجيبله الولد واني عاكر شيسوي بيه بعد ..
سيف.. كافي خريط لا بكيفج تخربطين ..
غلوة.. مجاوبته ..
دنيا ..صلوا على النبي يمعودين ..
غلوة.. هي طفرت بعد محد شاف شكلها طب غيث وياه ساهر يباوع بلوجوه يستفسر يريد يفتهم ..سلم على الكل وسيف هم بوسه ..
ساهر.. ها غلوة ماكو شي حبيبتي ..
غلوة.. لا بس اريد اروح لبيتنا واخاف اطلع هيج وكت ..
ساهر.. اي سيف عادي اخذها وياية ...
سيف.. لا والله ساهر واني كلتلها اذا طلعتي من البيت بعد مترجعين ..
غلوة.. يحجي واني اباوع عليه وبعينه ولانزلتها عادي سيف مارجع انسى..
ساهر.. عيب هلحجي غلوة..
غلوة.. مجاوبته ..
غيث..يابة شنو السالفة غير نفتهم شصاير..
غلوة.. هو ساكت ميجاوب ودنيا اجتي يمي..
دنيا ..ادري وين رايحة حتعوفي الها ..عفية اني ماكدر تعودت عليج وماكدر بلياج ..
غلوة.. هو مالتها حبيبتي من البداية والمفروض اني اوعى لهلحجي ..وكلشي بدايته صعب بعدين تتعودين ... دموعي موكفن راسي بدة يون.. يلة عاد ساهر راح اوكع والله كعدت ع الكرسي فعلا بدة الضغط. اجاني ساهر وسيف يركضون..فدوة دنيا شوية مي جابتلي شربت وكمت على حيلي يلة ساهر لتفت كلبي ..
ساهر ..درتاحي خاف ضغطج صعد ..
غلوة.. عادي عادي مو جديد ..
غيث.. ادري يابوية غير نفتهم شنو السالفة..
غلوة.. والله ياابو يوسف كلش تعبانة وامي هم مالها خلك ..صاحتني امهم كمت سندت روحي على ساهر ورحت يمها وكعدت على نفس كعدتها ..
ام سيف.. ليش بنيتي تعوفيني ..
غلوة.. وداعتج اجيج زحف من تريديني بس هسة ماكدر وداعتج مترضيلي الاهانة والغلط مو..
ام سيف.. لا والله متستاهلين غير كل خير بست راسها وكمت جريت يوسف ابوس بي جان بأيد ابوه شايله انطيتهيا ..عيني ابو يوسف دير بالك على سيف ادري بي راح يتأذه بس مو بيدي والله ..
غيث..صار خيتي صار شدة وتزول..
غلوة.. طلعت هو اباب المطبخ باوعت عليه من دااطلع .. راح اشتاقلك سيف والله .. دار وجهه داطلع لزم ايدي لتروحين غلوة ..
غلوة.. ماكدر والله مو بيدي وخرت ايدي على كيف وطلعت وساهر جان يحجي وياهم طلع وراية ..شمرت الجنطة مداكدر بعد اشيلها اجاني ساهر لزمني لان من صدك وكعت هو جان بعده مطالع بلطرمة واكف غيث اجة يركض .
غيث.. ها ساهر وكعت ..
ساهر..اي والله خوية .....
غلوة..فتح السيارة وصعدت ليورة..هو هم اجة يركض ...ها غلوة اني بعد لا ايد ولارجل صعدوا هو وغيث وطلعنا للمستشفى احس على ايده الدافية محاوطني ويفرك بأيدي ووجهي ويحجي بأذني غلوة لتعوفيني وتحطمينا اثنينا ..وصلنا المستشفى وكلعادة الضغط اخذت المقسوم وطلعنا صعدت ليورة وهو يمي وغيث بلصدر وصلهم لبيتهم ..
سيف..يلة غلوة انزلي كافي عاد....
غلوة.. طلكني سيف.. حسيته انصدم جرني من ايدي ودارني عليه صدك صايرة لا تطاقيين ...نزل وركع باب السيارة وراح على ساهر بوسه واعتذر منه على ركعة الباب وراح طب جوة نزل غيث سلم وطلعنا ..
ساهر.. ليش هيج غلوة وصلتيها لهلدرجة..
غلوة..احسن حبيبي حتى لا اربطة بأنسانة عاجزة اني مااعتقد راح اخلف بيوم ليش ديتحملني متكولي ..
ساهر.. هو كلج..
غلوة.. لا مانتظره يحجي .....دك تليفونه انسام مرته..
ساهر.. ها حبيبي جاي ...منو واحد اسمه ظافر...
غلوة.. ظافر شنو عزة بعينة هذا الخ..
ساهر..استلمي..زين زين حبيبي هسة جايين اني وغلوة....
غلوة.. ياظافر هذا ..
ساهر .. اخوج اكو غيره ..
غلوة.. هاي هية كملت السبحة ..
طلعت من بيتك سيف هذا اسؤء يوم بحياتي متوقعت راح اطلع من بيتك بهيج طريقة متوقعته يتعامل وياية بهيج اسلوب يلة يجوز مل قابل يضل يحبني العمر كلة واني لانفع ولا دفع حتى خلفة ماكدر اخلفله وانسانة سلبية ومن قررت اخذ حقي الوحيد الي وكف بوجهي ومقبل على تصرفاتي لان ممتعود ..
سيف..طبيت واني غادي نار لا صدك تصر انو متجي واني ماكدر بلياها طبيت امي على نفس كعدتها وغيث وراية ودنيا هم كاعدة ..
ام سيف.. ها يمة شلون صارت كعدت يم امي ..غيث جاوبهم ..
غيث .. زينة الحمدلله احسن..
ام سيف..ليش هيج يايمة ليش هاي غلوة اني اوصيك عليها ..
سيف.. عجبج الي سوته..
ام سيف.. اي يايمة غير هاي البومة غلطت على يمة وابوها ميت..
سيف.. غلطت شكالت يوم حتى تمد ايدها اني ماريد يصيرن مكافش بيناتهن بعدين تكبر يمة..
ام سيف.. لا يمة كلتلها بت الكلب وكومة حجي وفشار ولك عيني احنة ماعدنة هيج واحد يغلط هاي منين متعلمة ..زين وليدي يعني هسة انت تقبلها على ابوك وهو ميت ..
سيف..اني هيج سمعت صدك صرت نار كمت جان تطبت تبجي لزمت لج انتي شلون هيج تغلطين ولج شوكت تجيبين واخلص منج ..جان توكع وتبجي وتعيط ..هذا صوتها العالي خرب ضميرج شكد عايقة ..يمكن صارت عدها ولادة جرها غيث من ايدي لان صدك فقدت عليها ..
غيث..كافي سيف هاية راح تجيب ..
سيف.. اخذناها ورحنا للمستشفى خابرت امها وابوها لحكونا وخابرت دكتورتها هم اجتي ...طبت يمها الدكتورة شوية وطلعت ..عيني منو والد اطفل حتى يوقعلي على تعهد لان لازم قيصيرية واني بلغتها من اجتي قبل اسبوع ترة الطفل مو طبيعي وماكدر اولدها طبيعي وهسة بلسونار ابد وضيعة الطفل مو مطمئنة ...انداريت على امها وابوها ..راسن امها دنجت ..شنو دكتورة..
الطبيبة.. انت ابو الطفل ..
سيف..اي بلي..
الطبيبة.. اي اخي الطفل ترة عنده هواية مشاكل ومشوه للاسف.واني مبلغة ام الطفل وامها وعدهم علم بكلشي.. وهسة ترة راح يختنك لازم اولدها بسرعة ..
سيف.. وقعت واني راسي طبل هيجي اني مغفل خربت حياتي ومعرفت اتصرف من البداية يعني لشوكت راح تضمين عليه...رحت على امها وابوها ..يعني بتكم حطمت حياتي وحياتها ليش محد حجى..
ابو ايمان.. والله ياابني اني هسة سمعت حالي حالك ..
سيف.. سهلة تطلع من العملية وتدلل ..انداريت على امها .وطبعا انتي تدرين واكيد نصحتيها لتكول مو...بقيت اروح واجي غيث يمي ميعرف شيحجي اباوع عليه غيث وهذيج الي طلعت وبعد مترجعلي ..
غيث .. سهلة خوية خلي تخلص هلمصيبة بعدين ترة غلوة كلبها طيب وتحبك تدري من دتطلع اجتي يمي تكلي غيث ديربالك عليه راح يتعب من اطلع..
سيف..اوووف ياغلوة كافي غيث لتحرك كلبي اني معطب هسة ..نص ساعة وطلعوها بلافاقة طلعت الدكتورة رحتلها اريد اشوف الطفل وعفتها اهلها يمها.. رحتلها لغرفتها وغيث وياية ..ها دكتورة بشري وضعية الطفل شلونها.. ..
الطبيبة .. عيني مرتك تريد تبليني وتبلي المستشفى مرتك شاربة حبوب حتى تموت الطفل ترة الطفل حالته جدا خطرة وهي السبب. بوقتها من فحصتها كلتلي اريد اذبه ماريده بس اني مقبلت لان الطفل جبير بلثامن ..كعدت تتوسل هي وامها كالت اشرب شي واخلي يموت اني شسوي بي مشوه .بس اني لاقبلتلها ولاقبلت اسويلها شي لان هذا روح مو مشكلته ترة ذنبة امه اسمحلي غبية ذنب هذا الطفل بركبتها وشلون طفل يخبل بس للاسف فحصه طبيب الاطفال وكال مراح يكدر يعيش هو هسة بلحاضنة منكدر نطلعه..
سيف.. يعني صدك لو اني بحلم هم اكو هيج شي ..هاي شنو من كلب ..حتى الطبيبة معرفت اجاوبها..
الطبيبة.. اكيد متعرفون مو ... مبين عليك..
سيف.. اباوع على غيث ماكدر احجي ..
غيث ..لا والله دكتورة كلشي مندري ..
الطبيبة ..بس اسمحلي هيجي مرة شلون تأمنلها تريد تكتل ابنها استغفر الله ياربي ...
عافتنا وطلعت....
سيف.. غيث هاي شديصير ..
غيث..والله ياخوية ابتلاء ولازم نتحمله ....
سيف.. كمت اريد اشوفها واشوف امها طبيت لكيتها دتتوجع وبس تبجي انتجيت ع الحايط مجتف اباوع عليهن الدكتورة يمها ودتحجي وياها وغيث يمي.. ابوها وامها واخوها واكفين يمها بقيت ساكت طلعت الدكتورة والممرضة جانت ناطيتها مسكن ونامت سديت الباب ورجعت على خالي كدام امها واخوها ..لهنا وانتهت بعد ..خالي اني ماأمن بيها ردت اطلكها واخذ الولد لان مو أهل لتربيته وسبحان الله مشايف ام تريد تموت ابنها حتى لو الطفل مشوه ..اندكت الباب طبت الممرضة.. العفو منو ابو الطفل ..نعم تفضلي ..بس دكتور الاطفال يريدك ممكن تجي وياية ..رحت عرفت صار بلطفل شي غيث وياية طبيت ..كلي البقاءلله ...ترة هو حتى لو عاش جان عاش عليل ..الحمدلله على كل حال انطانيا ملفلف اخذته منه واتعس موقف صدك دمعتي نزلت شنو ذنب هلطفل ذنبه امه متخلفة والتخلف مو بلشهادة ولا بلدراسة التخلف بلتفكير وطريقة حلها للامور...اخذته ورحت دخلت بعدها نايمة خالي رأسن كام ..شفت خالي كتلته بأيدها من تكعد عود بشرها..اباوع على امها ارتاحيتي موانتي وياها..راح اخذه ادفنه وبتك تاخذها وياك بعد متصيرلي مرة لو تصبولياها ذهب عفتهم وطلعت اجة غيث وياية ماعرف وين اروح وشاسوي شلون ابتلاء ..اخذناه دفناه ورجعت لكيت امي كاعدة تنتظر..
ام سيف.. ها وليدي بشر شلون وليدك ..
سيف.. ابتسمت شأكولج يوم انداريت على غيث سولفتلهم وعفتهم ورحت لغرفتي اني وغلوة ..اوووف ياغلوة حبج لعنة ماكدر اعوفها اعرف اذيتها هواية بس اني اصلا ...اجيت متعارك وية زينة اجتي للغرفة وسوت حركات تلعب النفس خلتني اعوف الدائرة واطلع والنوب شفت هلموقف كدامي تخبلت بلزايد بس طلعت قهري بيها اكيد هسة متدمرة مو ....
غلوة.. طبيت للبيت واني بلكوة امشي طبينا لكينا العينتين كاعد وحده مجايب احد وياه..من الباب..
ظافر ..هلا بلعروس هااا العريس هم جاي على ساهر..
غلوة...راح ساهر سلم عليه انا باوعت عليه ودرت وجهي ميعجبني اسلم عليه رحت كعدت يم امي ..
ظافر .. ها ولج صايرة مرة ودتكمل دكتوراه مو عليه فاهمة ..
غلوة.. لا حبيبي عليك وعلى غيرك ..
ظافر .. كافي لج احترمي نفسج ..
غلوة.. الحمدلله ومو انت الي تفتي ..امي تباوع عليه وتبجي ..شكو جاي وشرايييد مو طيحت حظنا وخلصنا منك شرجعك ..مرت ساهر خطية راحت خابرت ريام ورجلها ..
ظافر.. هلا هلا كلها اجتي شكو يمعودين ترة مراح اكلكم اني..
ريام.. شرايد ظافر شتريد بعد...
غلوة.. يأشر عليه..
ظافر.. هاي تطلك لان عمار رايدها ..
غلوة.... هههههههههههه ضحكت ضحكة بصوت عالي خليته يتنرفز ..
ظافر.. شبيج لج..
غلوة.. اضحك عليك لك انت بيك داء العظمة والله انت مريض زين انت مو جنت بأمريكا معالجوك دروح بابا روح عالج روحك ..
ظافر ..هاي عليمن لج..
غلوة.. عليمن على ابوية عليك طبعا اني دالوب راسي بعده من الوجع والضغط .. امي تبجي وتكله كافي حسبي الله ونعم الوكيل مراضية عليك لادنيا ولااخرة ..
ظافر.. شوفي ترة هسة اكوم والله اكسر راسج تطلبين الطلاك الولد متدمر عليج مادري على شنو عابت هلجهرة عود يتعاركون عليهة تطلك من وراية مو هو بكيفج ..
غلوة.. استغفر الله العظيم ياربي..
ظافر.. شبيج لج ويامن داحجي ..
غلوة..ظافر اطلع ماريد اشوف وجهك بعد لان ميعجبني واتنرفز من اشوفك ..كام ديريد يضربني وكامله ساهر وحسام ساهر تلاوه وياه يريد يدفعهم ويجيني .وامي وكعت تخربطت تضاربوا .
ظافر.. اوكفيلي اذا ماطيحت حظكم
غلوة...طلع ..حرنا بأمي لا ايد ولا رجل والله عرفت جيته وراها مصيبة....
