#ورود شائكة
همس ليل
البارت الثاني عشر
رفعت التلفون ويدي ترجف خايفة من الجواب
وقبل اي كلمة سالت
_شلونها بيبي
اجاني صوت خشن
_زينة اول شي دخلوها الانعاش ...
هسة احسن...
جريت نفس...وحمدت ربي
_خوما خايفين
_لا ليش نخاف
_قفلي الباب زين...واذا احتاجيتوا شي دكي علية
كلت وية نفسي هذا شبيه عايش الدور كلش
_الله كريم
سديته وصعدت نمت...وطبعا نومتي متعلعلة لان نور تكعد هواي...
كعدت على دك قوي على الباب...
نزلت اركض...واني اجر دشداشة البسهة فوك ملابسي
حتى افتح الباب عبالي صار شي...
من فتحت الباب شفت احمد
_شكو من الصبح ماتكول ناس نايمة هجمت
الباب
_والله ما ادري نومكم مال اهل الكهف...
صار شكد ادك بالباب
_وشكو ادكه ...عندك شي جان خابرت
_شوفي تلفون امج شكد داك عليج
_هسة شتريد
_اريد ملابس لبيبتج وغراض
_ربع ساعة واجهزها لك
طبيت جوة الم بالاغراض...
وعفته بالطرمة...
بس نور كامت تبجي وعمر هم نزل ...
دخت عليمن اتوجه...
صعدت جبت نور...وصحت احمد من المطبخ
دخل...
_الزم نور بين ما اكمل الاغراض
خليت نور بحظنه...ورحت اكمل...
وعمر مجلب بدشداشتي
_ماما دواعان
_هسة ماما لحظة واسويلك ريوك
رجع نفس الشي يلح...لحد ماكملت جنطت بيبتي
فارت اعصابي...
رحت للمطبخ انطيته الجنطة...واخذت نور
وهو جان يبوس بيها ويناغيها
وصلته للباب...
_عود اقفلي الباب ...مو دخلي احد
_شنو...شنو عيد الي كلته...
ادخل احد...تشايفني
_شمعرفج بية وكعديني بالمطبخ وانتي وحدج
فارت اعصابي
_انتة صدك واحد ماتستحي...
سديت الباب بوجهه...
هذا خبل والله لو بي حالة نفسية...
شلون نور جانت عايشة وياه ومتحملته
بيبتي بقت تلث ايام بالمستشفى...
واني اخذت اجازة...بس بعد مافتحت الباب ابد
حتى مرة اجى ودك الباب ورد دك التلفون
شفته رقم غريب ماجاوبت...
دزلي مسج اني احمد واكف بالباب...
افتحي...
رجعتله جواب...ما افتح لغربة...
هاي اكيد امي انطته رقمي لان دزيتلها موبايلها
وداخابرها اطمن عليها...
بقى شوية يلا دزلي النوب مسج...
_راح ابقي المسواك بالباب اطلعي اخذي
جاوبته...ما محتاجة رجعه وياك
ماجاوبني...
واني هم ما طلعت...
كملت تنظيف البيت...بس المشكلة بالطبخ
حاولت امشي اموري بلي اعرفه...
سمعت صوت تلفوني يدك...
شفته اسم ماما...رفعته
_هلو ماما شلونج
_هلو حبيبتي...ليش ما فاتحة الباب لاحمد
_وليش جاي مو يدري وحدي...وشيسوي جايب مسواك
_هو سأل كال اذا محتاجين شي...
وادري ماعدنا مسواك كتله يسوك
_اذا اريد اني اطلع
_والجهال وين تبقيهم
_ماما كلت اذا اريد هسة ما محتاجة
_يلا هو اليوم نطلع حظري غرفة بيبتج
_ترجعون بالسلامة...
رحت فتحت الثلاجة...صدك فارغة
هسة شنو الطيحان حظ مالتج جان خليتي يبقي المسواك بالباب...
مو هنا المشكلة...المشكلة نور خلصت حليب وحفاظات...
على الاقل لو كايلتله هاي بنته لازم يجيب اغراضه
ما انكر هو كل نهاية اسبوع يجيب جيس حفاظات جبير وكم قوطية حليب...
زين شسوي...
يلا قابل النسوان الي ماعدها احد.شسوي...
بدلت لنور وعمر واني هم بدلت...واخذتهم وطلعت
كلت نتمشى...المحل مو قريب....
بس لحد ما رحت ورجعت وغير هوسة الي سواها عمر بالمحل خبلوني...
عمر صح عمره فوك تلث سنوات واطلع بيه
بس احطه بالعربانة...والعربانة انكسرت
وهسة شايلة نور واكود بعمر ومن رجعنا زادت العلاكة...
بقيت انوكل بيهم ...وتأخرت ..
من قربت على البيت شفت سيارة ابابنا عرفتها سيارة احمد
هسة هذا شجابه...
نسيت امي كالت راح نرجع...
هية اكيد تندل وين انبقي المفتاح...
وصلت ونزلت الاغراض بالكاع وجريت نفس...
حارة الدنيا لان صيف...
داريد افتح الباب..راسا انفتح واجاني صوته قبل ما اشوف جهرته
_وين مولية بهالحر وتسحلين بالجهال
صفنت بوجهه متفاجاة بيه لان صار بوجهي من اريد افتح الباب...
جر نور مني ...واني دنكت اريد اشيل الاغراض وعمر دخل يركض...
_مو كتلج شتحتاجين خابريني...
لو هية شغلة عناد
التفت عليه بعد ماشلت الشغلات
_مو طفلة واعاند
_والله الطفلة اعقل منج...
على الاقل تفتهم شيحجون وياهة
هذا الحجي اني دخلت لنص الطرمة...
التفت عليه اجاوبه...
_محد كالك اتعامل وية الاطفال لعد
اذا عباله يستفزني ما انطي مجال حجيت وية نفسي
_بعدين شنو هالبنطرون الي لابسته
نزلت الاغراض من ايدي
_لهنا وكافي عاد...انتة شدخل...ابوية.. اخوية ...حتى دحشر نفسك...
_مو اكولج طفلة...وماتفتهمين
_عايفين الفهم لك
عفته ودخلت المطبخ ...
رحت كبل لغرفة بيبتي...لكيت ماما تعدل المخاديد وراها....وعمر شابك بيبتي...حيل يحبها
وطول ماهية بالمستشفى يكولي ائين نانا
_وخر عن بيبتي ...هسة رجع نور البيت...
دنكت بستها
_ياشمسنا وخيمتنا
شبكتني ...وكامت ادموعها ادير
كعدت يمها...هيج كارهة شوفتي
_اكره شوف نظر عيني
_ليش تبجين لعد...
مديت ايدي امسح ادموعها...
_ابجي على حظجن ...ما شفت بيجن وحدة انسعدت
_لا ...لا بيبي...مو انتي اتصلين وتعرفين هاي قسمة ونصيب من ربنا...
وبعدين شبينا مكابليج وكاعدين مو احسن ما نعوفج وحدج ...
وفوكها جبتلج زعطة يسيطرون راسج
ضحكت ...خلي يسطروني بس كون انتن سعيدات
بست راسها...نكول الحمد لله ربنا مادام انتو سالمين هاي سعادتنا
كمت على ماما الي ابد ماحجت وادري بيها تبجي وية بيبتي بسكوت...
_ها سلوى خانم ماصدكتي تظلين بالمستشفى عجبج الوضع
بستها وهية حظنتي...
من وخرت...
_وين جنتي
_رحت اجيب حليب وحفاظات
سلوى...وين الولد
_،مو هيانة...
اشرت على عمر الي نايم يم بيبيتي
_اقصد احمد
_بربج هذا الهرقل اتسمي ولد...
برة
_يا مو عيب ماما
_شسويله
ام مصعب...لا يمة عيب...نور وين
_يم ابوها
طلعت امي لكته راجع للصالة...
اني كعدت اجر بعمر اكوله وخر عن بيبي
وهو يكول ما ...ما هاي نانا...
نتشاقة دخلت ماما وياهة احمد وشايل نور...
بطلت راسا ووكفت على صفحة وهو يدنك ينطي نور لبيبي
وعفتهم وطلعت...
رحت للمطبخ واجت امي وراي...
خلي نسوي غدة...عيب الولد من الصبح يركض ويانة حتى يسوي الخروجية مال مستشفى
_هم كالت الولد...بابا هرقل مو ولد
فتحت الثلاجة...شو ماكو شي...
_انتي مو كلتي ماكو مسواك
سدت باب الثلاجة وباوعتلي
_ليش ما اخذتي المسواك من الولد
_هرقل...جنت نايمة
هزيت جتفي...
_هسة شنسوي غدة
_اذا علمود بيبي هسة اطلع اجيب جاهز
_ام هاجر...اجى صوته
_نعم ابو نور...
طلعت ماما تريد اتشوفه شيريد ...
واني فرغت العلاليك ...
دخلت ماما...روحي وية ابو احمد جيبلنا مسواك
_شكو وية احمد...اني اروح
_ماما لا تعاندين ..اني مابية حيل اطلع
والساعة اثنعش الظهر وين ترحين وحدج بهالحر
_ماما ترة اني يوميا ارجع ب٣ الظهر من الدائرة
_بالخط ...لا تشلعين گلبي
_لعد خلي هو يجيب
_قابل اكوله هيج وهيج نريد....يلا ماما
طلعت ماما تريد تاخذ نور منه...هو اجاني
_بدلي بنطرونج يلا تجين
_شنو بلة
_مثل ما كتلج...البسي شي طويل عليه
لو عباية جتف
ردت اجاوبه بس شفت امي وراه اشرتلي
خزرته بنظرة ...وصعدت لبست قميص لحد الركبة عليه
من نزلت لكيته طالع وصاعد بالسيارة...
صعدت يمه..
_هسة شبيه هذا لبسج...
درت وجهي على الشباك وماجاوبته
ساق فترة بدون مايحجي...
وصلنا لابو المخضر...
_شتريدون
_اني انزل
_ماكو داعي كولي واني اجيب
هزيت راسي علامة استفهام
_شكو جاية لعد
_لان امج استحت اتكولي شتريد...
_واني شنو راح اكولك...
_بكلشي لسانج طويل بهاي راح تستحين
_اما انتة صدك فد واحد
_ها دير بالج منة العالم ما اريد احرجج
عفته ونزلت...
رحت لابو مخضر...وبديت اشتري براحتي
بعد ماكملت كومة مسواك اخلي يم ابو مخضر
وهو يوزن ويخلي على صفحة...
تفاجات من اجيت احاسبه...احمد محاسبه مسبقا
من كتله شكد لابو المخضر خزرني احمد
شال العلاليك وصعدهن واني رحت صعدت
اول ما صعد
_ليش حاسبته...ترة اكدر ادفع
_حاسبته مو لخاطر عيونج...هاي لبيت عمتي
اولا...
وثانيا من شفتيني انطيته افلوس ليش اتسألينه شكد
_ليش يعني ما أساله
باوع علية...ورجع باوع لكدام وشغل السويج
_مين اجيبلج الفهم
ساق ...ردت لحم ماكتله....
بس هو من شافه وكف السيارة ونزل من غير ما يسألني...
اشتراه وصعده بالسيارة ورجع صعد
_بعد تريدون شي
_لا
حرك بالسيارة...مسافة وفاجاني بسؤاله
_انتي عليمن طالعة
التفت عليه
_شنو قصدك
جان يباوع لكدام ومايلتفت علية
_بيبتج...امج...خالج...حتى وسكت فجأة
عرفته راد يكول خالتج...كأنما اذكرها وظل ساكت ويسوق بس حسيته سرح بغير عالم
_شبيهم ذولة
انتبه علية والتفت عبالك نسى وجودي
_شنو
لويت حلكي ورجعت التفت على الشباك
لحد ماوصلنا
نزلت وفتحت الباب الخلفي شلت جزء من الاغراض
وفتحت بابا البيت دخلتهن...وخليتهن على الميز
اجت ماما
_عود حاسبيه ما اخذ فلوس...وين نور وعمر
_نور نامت...وعمر يم بيبتج
دخل وراي احمد شايل باقي الاغراض
هاجر...ماما راح اسبح واجيج
صعدت بدون ما التفت عليه...
سبحت ولبست دشداشة وخليت شال على راسي نزلت البيت سنطة
بس لكيت ماما بالمطبخ
التفت علية من فتت...نزعي الشال راح احمد
جريت الشال من راسي
_سوة فضل
_طبعا خطية من الصبح لسة ويانة تعب الولد
_قصدت سوة فضل من راح...
وبعدين محد جابره...
جان خابرتي واحد من ولد خالج مايقصرون
_وينهم ...مو يدرون عمتهم بيها جلطة ...شو محد اجى وسال بس علكد المستشفى
_انتي ماخابرتيهم جان اجوي
_لو بس اعرف ليش ماخذة موقف منه
جانت تشتغل وتحجي وياي
_خلي اشوف....بديت اعدها على اصابعي
كل ما اكول نقطة اطوي اصبع
متسلط...يريد الكل يمشي برايه...
شايف نفسه...حاشر نفسه بكلشي
هجومي....ماعنده شخصية...والاهم من هذا كله
جان سبب بموت نور
_استغفر الله...ماما هذا قضاء ربج
_الحذر سبق القدر...
لو مسويلها العملية من وكت جان ماصار الي صار
_وبعدين شنو ماعنده شخصية...احمد ماعنده شخصية
_غلاف خارجي....لو عنده شخصية جان مو امه كل هالفترة مشت كلمتها عليه
_تعرفين هاجر...انتي ذكية بس للاسف ماتكدرين تحكمين صح على الاخرين
صفنت على حجايتها...بس قبل ما اجاوبها...
بجت نور ورحت عليها
صادف براها جمعة وسبت واحمد ما اجى بس افتهمت من امي يخابر...
وامي هم خابرت خالي وانطتني التقارير مال بيبتي ادزهن له...
والاسبوع الي بعده خلص بدون ما اشوفه واتصادم وياه...
بالدائرة تمللوا من كثرة اجايزي وهمة مايعرفون وضعي بالبيت...
وظليت حايرة ما اكدر اخذ اجازة بعد اشهر...
ولا اكدر ابقي نور وعمر يم امي لان ماتكدر
عليهم وية بيبتي...غير الايام الي تحتاج تروح للمعاملة...
زين اذا اخذ اجازة بدون راتب ..راتب امي وحده مايكفي...
والبيت الثاني انباع جان يساعد بأيجاره شوية
وهسة انضاف علاج بيبي...
جنت كاعدة بالمطبخ وصافنة ...
دخلت ماما
_شبيج ليش صافنة
_لا وين صافنة
_فنجان كهوتج برد وانتي كامشته بيدج
باوعت صدك لازمة الفنجان ...
كعدت مقابيلي....شبيج ماما صاير شي
_ماكو شي لا دوخين نفسج
_خالد رجع يضايقج
طبعا خالد صار سنتين ونص تقريبا من اطلكنا...وقبله سنة محاكم...يعني بالتلث سنوات ونص
بس ما تعب يا يدخلي عن طريق الفيس احظره يسوي حساب ثاني ...تالي غلقت المتابعة عندي
يرجع يوميا يتصل من رقم...
تالي غيرت كل ارقامي وفيسي وكل وسائلي
وشكو واحد مشترك لغيته...
وحتة من يجي ياخذ عمر اخابر ام فهد من رقم امي يلا ارتاحيت منه
جاوبتها...لا صار مدة مرتاحة منه
_لعد شبيج
_بالدائرة كاموا يحجون من كثر الاجايز...
وحايرة شسوي...
_قدمي اجازة سنة بدون راتب
_وشلون نكمل الشهر...
انتي كملتي معاملة التقاعد ...يعني راتبج ماكو منة لشكم شهر...
_تقاعد بيبتج
_لمن ولمن يكفي
_ماما انتو متعلمين على الصرف...نلزم ايدينا
واني هم راح اسحب من فلوس البيت الي بعنه اخليها تحت اليد لحد مايكمل التقاعد
_خوش باجر اقدم اجازة شهر وبنفس الوقت اقدم مال السنة لان لازم موافقة وزارة
صدك ثاني يوم قدمت الاجازة وصيت عليها المتابع مال دائرتنا...
صح اني متعودة على الدوام...بس بالفترة الاخيرة
تعبت من قلة النوم...
مرات نور اظل للخمسة الصبح...وبعدها تنام
اني ما اكدر ارجع انام ادري بس اغفى يروح علية الوكت
صادف يوم اربعاء ونور عدها لقاح...
نزلت من الصبح تريكت وصعدت بدلت لها وبدلت
ومن نزلت مرة ثانية سمعت صوت بالصالة...
هذا شجابه...اليوم امي ماعدها معاملة
دخلت للمطبخ....خليت نور بكرسي مالة الاكل مالتها
وداسويلها ممة اخذها ...اجت امي
_ماما مو كلتي ماعندج معاملة اليوم
_اي ماعندي ...خلصنة كلشي
_لعد شعنده جاي من الصبح
_منو
_يعني منو غيره هرقل
ادري تعرفني شقصد بس تتعمد
ضحكت....وج ماما بطلي ...جاي يوديج للمستوصف
_منو عتب عليه
_بنتي ترة نور هم بنته...ومن حقه يشوفها ويتابع امورها
_ماكايلة شي...شنو منعته يشوفها...بس ما احتاجه يوصلني...وبعدين مين عرف بلقاحها
_اني كتله..
_ليش
_هو سال عن اللقاحات...كتله عدها لقاح الاربعاء
ما نسى وجة يوصلكم
_،فاعلة خير اسم الله عليج
طبعا علاقتي بامي غير شكل عبالك اخوات
ضحكت ....يلا ماما الولد ينتظر...
راحت واني جريت نفسه...اليوم ما انطيه مجال يستفزني
شلت نور وطلعت من باب المطبخ لكيته واكف ينتظر
_صباح الخير
_صباح النور...
اخذ مني نور بوسها
_صباحوو بابا شلونج
هية الادبسيز اتكيف عليه وتظل تشمر بيديها
طلعنا هو ظل واكف لحد ما صعدت...خلة نور بحظني
وسد الباب...
ولاف صعد من جهته...
ما حجى لحد ماوصلنا...
وهم من نزلت اخذها مني...
دخلنا المركز....مين قسم اللقاحات...
_مناك...
مشيت كدامه...من وصلنا الغرفة التفت اخذ نور حتة ادخلها للدكتور شفته خازرني...
من مديت ايدي اخذها همسلي...
_هو هذا هم لبس لابسته
جريت الطفلة...وكلت بكلبي اشتغلت رحمة الله
لقحناها وطلعنا جانت بس تبجي ...
راد يسكتها ماقبلت...لحد ما اخذتها...
وظليت اهزها على صدري يلا شوية سكتت...
من صعدنا بالسيارة...نامت بحظني
_امج ما اشوفج من اطلعين
التفت عليه...
_ليش مو جانت واكفة من صعدت وياك
_ماتكولج لبسج ضيك
جريت نفس...ومحد كايلك لا تتدخل ما لايعنيك
_من رأى منكم منكرا فلغيره
باوعت عليه مصدومة
_يعني شنو هسة اني منكر
_شسمين هذا لبسج بلازحمة
_ترة انتة حيل زودتها...واي تدخل بعد مامسموحلك
عرفت لو لا
_صوتج نصي...محد معلمج مرة عيب ترفع صوتها
_بعد شوية راح اتكلي محد مربيج
سكت لان وصلنا...جانت اكو حجاية على طارف لساني بس رجعتها
اول ما وكف السيارة..
فتحت الباب وبسرعة نزلت بس لان شايلة نور وهية نايمة ومن سرعتي....
من رفعت راسي نضربت بحافة الباب...
دخت ورجعت كعدت رجلية خارج السيارة
سمعت صوته عبالك جاي من بعيد
_خوما تأذيتي
رفعت راسي شفته واكف كبالي...
دنك اخذ نور ومد ايده يكومني
دفعتها وكمت...
راسا فتحت الباب ودخلت وصعدت لغرفتي وماما اتصيح وراي...شبيج هاجر
تمددت على جربايتي... وجعي من راسي مدري من مغثته
يمكن غفيت لان كعدت على صوت ماما
فتحت عيني امي فوك راسي
_شبيج هاجر خوما شي يوجعج
كعدت مسطورة...
_لا مابية شي
_لعد ليش نايمة بملابسج
مديت ايدي انزع الشال...
_ما ادري راسي يوجعني
_اوديج للمستشفى...احمد كال انضرب راسج بالحافة مال الباب
كتلها بگلبي كله صوجه
_مابية شي ماما...هسة ابدل وانزل
نور بقت يومين اتسخن شلعت گلبي
وثالث يوم يلا فكتها السخونة...
بحيث تعبت بالليل سهر وبالنهار عمر يريد اتفرغله
غير شغل البيت...همزين اخذت اجازة
ثالث يوم كعدت كلش متأخرة...
من نزلت اتريك....
صباح الخير سلوتي
_صباح النور...صارت الظهر هسة يلا كعدتي
اسكتي بالخمسة الصبح يلا نامت ...
عمر وين
_يم بيبتج...الله ينطيج ماما مداريتها عبالك امها وازيد
_اني امها...مثلها مثل عمر
_خلصي ريوك وتعاي بيبتج تريدج
_صار...
تريكت ورحت لبيتي
_يسعد صباح الحلو
دنكت بست راسها...شلون شمعتنا
_الله يسلمج بيببي..
نور وين
_نايمة
_كعدي هنا يمي بيبي احجي وياج
_صار وهاي كعدة
بيبتي من مرضتها الاخيرة...كامت قليل اتكوم من الفراش...
عدلت نفسها واني كعدت مقابيلها
_شوفي بنيتي واسمعيني للاخير
_اسمع بيبي كولي
_خالج حصل فيزة على تقاريري وولامج هم كمرافقة...
لان تعرفين هو بقى هنا تلث اشهر وحتى انذار اجاه من شغله...
يعني مايكدر يتفرغ تماما لي...
ومرته حتة لو خوش ابنية ...عدها جهالها وبيتها
سكتت لان صايرة تتعب من الحجي...وباوعت لامي
الي جانت كاعدة بالجهة الثانية من الجرباية ومخلية عمر بحظنها تلعبه ...
_بيبي تريدين اتكليلي شلون بيج وبوضعج
_اي يمة ...لازم نشوفلج حل خوما تبقين وحدج هنا وية الجهال
_اسافر...بس قنعي هرقل
_منو هذا
سلوى...هاجر شكلنا...احمد يمة قصدها
_يمة احمد ما ينطي بنته...ترة امبقيها لخاطري
وحقه هاي لحمه
_ومنو يداريها اذا اخذها...
امه الي ولا سألت عليها
لو نسوان اخوته
_وضعه ما يخصنا...
ونرجع لوضعج...
حتى لو سافرتي خوما نبقيج بتركيا وحدج ونسافر
صفنت عليه ...
_ابقى وحدي هنا ...اني مو صغيرة عمري ٢٨
_من كبرج...الناس هنا ماترحم...
صغيرة ومطلقة وماعدج لا اخ ولا اب ولاعم ولا خال هنا...
منو راح يخليج بحالج...
مو شفتي وضعج من داومتي ...
امي جاوبتني...
ام مصعب_صح كلام امج...ولا اكدر ادزج يم بيت اخوتي
كلهم احفادهم بطولج
هزيت جتفي....شسوي يعني
_لو ترجعين لخالد
قاطعتها...مستحيل الموت اهون
سلوى...بقى خيار واحد
_شنو
سلوى ...ازوجي احمد
وكفت...كل عقلكم
صاحت امي...عيب هيج تحجين وية بيبتج
_اسفة بيبي مو قصدي...
بس شلون ترضيها...ترة نور صارلها ست اشهر بس
حتى حزن مافكيناه عليها
واني اشر على ملابسي
ام مصعب...نور بنتي وانتي بنتي
اني ماحاسبتج حفيدتي...
ربيتج عمرج ايام...يعني نور مو اغلى منج
وهسة انتي بقيتيلي ...
افرط بيج ؟....
رجعت كعدت ...
_ادري بيبي بس هالخيار حيل صعب
_هذا الحل الوحيد...
_الا ازوج هالعكرة
_عندج غيره ...
بس لازم تنطيه بنته...
سلوى...يعني هو انسب حل...عرفناه...
وهم تربين بنت نور
هزيت راسي...مااكدر ..اعذروني
ابقى وحدي ولا ازوجه...
وبعدين خالي مو كال ارتب وضعكم بتركيا..
سلوى...اي ماما بس هسة وضع بيبتج مايتحمل
لازم تسوي عملية
_هم ما اكدر..شوفولي غير حل
مو اكو فيزة سياحية...
ادفع فلوس واطلع وياكم..ومن تخلص..ارجع لتركيا وهم اسوي فيزة النوب
سلوى..يرادلها وكت...ولو يقبلوها لو لا
واحنة حجزنا لبيبتج يم الدكتور
بقينا ساكتين...بس اني كاعدة على نار
_ادري شلون تقبلوها....هم زوج نور...وهم اروح اعيش وية اهله
هو نور ويحبها وماقاومت وياهم
سلوى...لا تعيشين وياهم
اكعدي بهذا البيت..
هزيت راسي...مستحيل...
ردت اطلع...
بيبيتي صاحتني...
_يمة لا ضوجين خلص ما اسافر
ماعوفج وحدج
ماجاوبت...صعدت لغرفتي...
لكيت نور كاعدة تلعب وتناغي
شلتها من فراشها بوستها
_صدك انطيج لابوج...شلون اكدر
هو اروح للدوام اشتاقلج
رجعتها للفراش وظليت اروح وارجع افكر
صدك صعبة ابقى وحدي...
بس قابل اعوف بيبتي بدون علاج
ولا اكدر اكول سويها بالشمال..
عمليتهة خطرة....
ماصحاني من التفكير الا صوت نور من بجت
غيرتلها ملابسها ونزلت اريكها
وبعد محد فتح الموضوع...
بس جنت احس بالذنب...هسة كلها اضحي
علمودي...ما اكدر اسويلهم شي بالمقابل
بس ما اكدر ...الا احمد
للمغرب طخت براسي فكرة...
ركضت صحت ماما...
تعاي يم بيبي عندي فكرة..
