ام جاسر ... خير يا ابنى فى ايه و رايح على فين وسايب اخوك لوحده .
جاسر ... معلش يا امى جالى تليفون مهم ولازم امشى دلوقتى .
ام جاسر .. انت بتقول ايه يا جاسر ازاى هاتمشى واخوك لسه حتى ملبسش عروسته الشبكه . اخوك هايزعل منك وعيب ما يصحش انت اخوه الكبير و فى مقام ابوه .
جاسر .. معلش يا امى مش هاقدر ادخل تانى . اعذرينى .
ام جاسر .. هى كلمه واحده يا جاسر خد بعضك وادخل معايا على جوه لحد ما اخوك يخلص يومه وناخد بعضنا ونمشى .. وتبقى تحكيلى على اللى زعلك وخلاك بالمنظر ده .
جاسر مسك اعصابه ومسك ايد امه وباسها وقالها .. حاضر يا ست الكل وماتزعليش نفسك انتى علشان صحتك وحقك عليا .
الام ... ايوا كده يا حبيبى .. ربنا يخليكم لبعض ويسعد قلبك وافرح بيك يا روحى .
عمر فرح اوى ومسك ايد جاسر وشده ودخلوا على جوه .
حازم كان مستغرب من اختفاء امه وجاسر .. واول لما دخلوا فرح واستغرب من جاسر ووشه اللى كان قالب وبيدل أن فى حاجه حصلت .
ريهام كانت دخلت على جوه بعد ما مسحت دموعها علشان محدش ياخد باله انها كانت بتعيط .. واتفاجأت بدخول جاسر تانى وهو ماسك ايد عمر . بس حاولت ما تبصش ناحيته خالص وبقت متجهلاه .
جاسر عيونه جت عليها وعرف انها كانت بتعيط من حمار وشها وعيونها .. وده اللى قطع قلبه وحن ليها اكتر .
عمر وسحر كانوا عاملين يتكلموا مع بعض فى حاجات كتير عن شغله وعن شغلها .. واد ايه سحر استريحت من كلامه . وعرفت اد ايه هو انسان محترم وذوق .
ام سحر كانت واخده بالها من سحر ومن الشخص اللى قاعد معاها وكانت فرحانه أن بنتها بدأت تتكلم وتفك الحصار اللى عملته حولين نفسها من ساعه موت خطيبها .
فقربت منهم وسحر عرفتها على عمر وصله قرابته من ريهام .
عمر وقف وسلم عليها ورحب بيها وقعدوا يتكلموا مع بعض شويه .
من ناحيه تانيه وزاويه تانى خالص كانت فى واحده بتراقب نظرات جاسر لريهام .. وعيونه اللى مش شايفه غيرها وسط الناس دى كلها .. وده اللى خلاها تستغرب وتسأل نفسها مين بيكون الشخص ده وايه سبب نظراته وقربه من عمر بالمنظر ده .
هند .. مين ده يا صلاح اللى قاعد على جنب ده ومعاه عمر ابن اخويا .
صلاح .. ده المهندس جاسر اخو حازم عريس منه . ليه فى حاجه ولا ايه ؟
هند ... لا ابدا بس شايفه عمر ابن اخويا فرحان بيه وعمال يلعب معاه بقاله شويه .
صلاح ... فعلا انا ملاحظ هزارهم مع بعض وشكله بيحب عمر اوى .
هند ... فعلا باين اوى عليه وتصرفاته مع عمر بدل على حبه ليه .
__________________________
الحلقه السادسه والعشرون
Start from the beginning
