#البارت السادس عشر
#ذنوب لاتغفر
#للكاتبه《روزاية》
بركان ملتهب من المشاعر
ينتظر قدومك...
لتضغط على الجرح فأثور..
وتحتضنني❤
لحظات هدوء وسكون الكل يترقب ردة فعل ثابت...
الانظار تنتقل من ثابت اليه واني ما ادري شكو ..
اشوف امه تتوسل بي بنظراتهه ومخليه ايدهه على كلبهه..
شفته يباوع لامه اعتقد هاي الحركه هو الوحيد الي يفهمهه..
وعبالك تكله لخاطري لاتسوي شي..
ماحجه شي دار وجهه وكال اصعدي كدامي..
اني امشي وهو يمشي وراي...
الكاعدين ما اسمع صوتهم ...
دخلنه للغرفه رحت اخذتلي دشداشه ابدل بالحمام وهو يغير ملابسه..
طلعت لكيته واكف ينتظرني غسل وكال يله ننزل...
هدوءه قاتل ومستفز لويحجي ويتعارك على الاقل الواحد يفتهم ردة فعله...
نزلنه سوه ولاكأنما شي صاير...
كعد بكل هدوء وهيبه ولابس تراك اسود واللحيه محدده صدك حلو وشخصيته بعد احلى رزن حيل ..
انقهرت على علي اخو يباوعله مثل الطفل من ينتظر رد امه..
شفت ثابت ابتسم ابتسامه مزيفه لاخو..
وهذاك قابله بأبتسامه شكبرهه
كالت ام بسمه.. شلونك خاله ثابت
.. كالهه هلا بيج خاله ..
.. مبروك الزواج ماصحتنه فرصه نجي..
.. الله يبارك بيج..
.. تعرف وضع الانبار شلون صار يخوف وماعدنه احد بس اني وهاي البنات وكلت اجي يمكم..
اذا ماعندك مانع..
.. لا خاله هلا بيج البيت بيتج وما انسى انتي خاله علي وعامر..
.. رحمه الله والديك ياخاله..ماتقصرون ولد الحجي..
هاي امهن هي هيج فقيره لو تتمسكن ؟؟
وحده من الكاعدات مانزلت عينهه عن ثابت ابد وتباوعله بحسره بس هو نهائي ما اهتملهه يسولف وي امه ومنطلق ولاكأنو شي صاير..
وخطيه علي وعامر من شافو يسولف انطلقوا وفرحانين..
بدينه نصب بالعشا ونشيل على السفره بنات علي يشيلن واحنه نصبلهن..
السفره جبيره وهواي الموجودين اجيت لكيتهه كلهه كاعده لان تاخرت ادور على كلاصات...
كعدت بنهايه السفره ...
باوعت ثابت كاعده بصفه امه والجهه الثانيه بنت عامر فروحه عمرهه 10 سنوات..
كال تعالي تقوى هنا ...
كمت من مكاني كالهه فروحه عمو شوي سوي مجال ..
كعدت بصفه والوجوه ماتتفسر بلذات هاي البنيه وكل هذا وما اعرف شكو ؟؟
اشوف فاطمه تبتسم بشماته وانسام عيونهه بكصتهه...
اني هم عجبني الوضع ارتجيت على رجله واكل...
حسيت نفسي طفله ومدلله ..
استحي اشيل راسي لان كلهه تباوعلي..
كملنه الاكل وشلنا..
ثابت كال راح اطلع محتاجه شي يمه..
.. كالتله لا وليدي اريد الله يحفظك...
طلعت ورا لباب المطبخ التفت عليه كال محتاجه شي؟؟
سؤاله مفرح حيل..
كتله لا سلامتك ...
هوطلع واني رجعت كعدت يم الحجيه...
كالتلي وحده من البنات اسمهه بسمه ..
.. شكد عمرج انتي؟؟
.. كتلهه 22
.. والله الصراحه مصدومه شلون ثابت متزوج بعمرج ..
.. ليش مصدومه الحب مايعرف اعمار؟؟
.. ضحكت بصوت عالي.. انتي تحبين ليش شوكت عرفتي الحب وانتي كلج 22 ؟؟
