احمد ..... برضه مش عاوزه ترد عليك يا حازم .
حازم ... والله لاوريها كان حصل ايه يعنى لكل ده .. الموضوع كان من الاول مجرد هزار .. ومش هاتصل عليها تانى خليها تتفلق بقى .
احمد .. اهدى بس يا معلم انا هاتصل بهدير واخليها تطمن عليها .
حازم ... لا مش عاوز اعرف عنها حاجه .
فجاه موبيل حازم رن .. و مسكه بسرعه على أمل تكون منه بس للاسف شاف اسم ( ماما ) على شاشه الموبيل .
احمد .. ايه منه ؟؟
حازم .. نقطنى بسكاتك دى امى يا مغفل .
حازم ... ايوا يا حاجه خير فى حاجه .
الام .. قالت لحازم على جوز خالته وأنه عمل عمليه وهايروحوا يشوفوه .
حازم ... طيب ما تخدى جاسر يا حاجه انا مش بحب جو المستشفيات ده .
الام .. بقولك ايه انا لابسه وجاهزة وجاسر اخوك مش فاضى عنده شغل كتير ولما يخلص هايجلنا .
اخلص وتعال بعربيتك وانا مستنياك اخلص . سلام .
حازم ... ايه ده شغل الغصب ده اووووف .. هو يوم باين من أوله .
احمد .. فى ايه يا ابنى بس .
حازم .. بعدين اقولك يالا سلام علشان خارج انا وامى .
احمد ... ماشى يا عم .. ماشيه معاك انت وامك .سلام .
حازم بعزم ما فيه مسك كوبايه كانت جنبه وضربها فى دماغ احمد اللى لحق نفسه بسرعه وبعد بعيد قبل ما تيجى فيه وتفتحله دماغه .
احمد .. يا ابن المجنونه .
________________________
الدكتور احمد والدكتورة سحر خرجوا اخيرا من العمليات وكان باين عليهم الإجهاد .
الكل جرى عليهم وريهام بصت ليهم والدموع محجرة فى عيونها واتكلمت وهى كلها خوف خير يا سحر ابنى حصله ايه ؟؟
سحر .. اطمنى يا حبيبتى العمليه نجحت والحمد لله وهاننقله على الرعايه المركزه اطمنى .
ريهام بكل ألم وحزن الحمد لله . عاوزة ادخله يا سحر .. عاوزة اشوفه بنفسى .. وعاوزة اشوف فريده واضمها لحضنى ... فريده يا منه فريده يا سحر .. فريده ضاعت منى .
منه ... عيطت جامد وخدت اختها فى حضنها واترجتها انها تدخل معاها وتودع فريده الوداع الاخير .
الكل كان واقف حزين ومتأثر من حاله ريهام ومن اللى حصل لها ولأسرتها .
الحاج ادهم خد ابوا ريهام واولاده وصلاح على جنب ... وبدأ يجهز كل شىء بخصوص الدفن والعزا وقرر أنه هايخدهم ويدفنهم فى مدافن القريه .. ويدفن اسلام مع والده .. ويدفن الحاجه سهير ومعاها فريده فى نفس القبر .
فى السرايه كان الحزن سيد الموقف .. بعد ما الحاج ادهم بلغهم باللى حصل ... الكل حزين .. والكل كان موجود من اهلهم والقرى المجاورة فى انتظار وصول الجثمان .. وحريم المنزل لابسه الاسود ... والقرأن فى جميع انحاء القريه حزنا على الكارثه المفجعه لكبير قريتهم .
الحلقه الرابعه عشر
Start from the beginning
