الماضى المجهول

الفصل العاشر

وانتوا بقى ملكوش اهل تسألوهم ؟
نطقت عايدة بتلك العبارة فى حدة فاضطربت كريمة وهى تخفض عينيها الى الارض تخشى نظرات والدتها الغاضبة وسمعت صوت آنس يقول فى برود:
ما احنا بنسألكم اهو ياعمتى..ايه لزوم العصبية دى؟
قالت عايدة فى حدة:
وهو انتوا كدة بتسألوا؟انتوا جايين وواخدين قرار ..خدتوه فى لحظة مجنونة
واتجهت الى ابنتها تمسك كتفيها بغضب قائلة:
ازاى تعملى كدة يابنت انتى؟
ترقرقت الدموع فى عينى كريمة ولم تستطع الرد فى حين امسك آنس بيد عمته ليزيحها ببطئ من على كتف كريمة قائلا فى عصبية:
احنا مغلطناش عشان تعامليها بالشكل ده ياعمتى..هو فيه ايه بالظبط؟
ونظر الى عينيها مباشرة وهو يقول:
هو انا مش ابن اخوكى برده زى آدم ولا ايه ياعمتى؟
ظهر الاضطراب فى عينى عايدة وهى تقول:
اكيد ياآنس بس...
وصمتت لا تدرى ما تقوله فتكلمت جيدان التى التزمت الصمت من اول الحديث قائلة:
بس ايه ياعايدة..انا شايفة الولاد اتصرفوا صح ومغلطوش ..هما يعنى اتجوزوا من ورانا..ماهم جايين يقولولنا انهم عايزين يرتبطوا ببعض
نظرت لها عايدة فى حدة قائلة:
انتى بتقولى ايه ياجيدان ..ده اللى ناقص
اقتربت جيدان من عايدة قائلة:
متكبريش المواضيع ياعايدة وافرحى لبنتك..انا عن نفسى مبسوطة جدا
ثم التفتت لآنس وكريمة قائلة فى حنان:
مبروك ياولاد
ارتمت كريمة فى حضن جيدان ودموعها تتساقط لتضمها جيدان فى حنان ام افتقدته كريمة كثيرا..وابتسم آنس فى حب فى حين نظرت اليهم عايدة فى غيظ قائلة فى برود:
انتوا حرين
واتجهت الى غرفتها فى خطوات غاضبة تتبعها اعينهم فى صمت قطعه آنس قائلا:
متزعليش ياكريمة بكرة تتقبل فكرة جوازنا وتكون مبسوطة كمان
قالت جيدان :
اكيد ياكرملة..الف مبروك ياحبايبى فرحتونى والله
دخلت سارة فى تلك اللحظة فقالت فى فرح:
خير ياجماعة فرحونى معاكم!
نظرت اليها كريمة فى برود قائلة:
وانتى مالك انتى؟
هدر آنس فى قوة قائلا:
كريمة
نظرت اليه كريمة فى غيظ قائلة:
نعم
كانت نظراته صارمة وهو يقول فى هدوء حازم:
اعتذرى وحالا
كادت ان تعترض ولكن نظرته أنبأتها انها ان لم تمتثل لأوامره ستخسره وهى غير مستعدة لتلك الخسارة..لذا قالت فى برود لسارة التى احمر وجهها خجلا:
انا آسفة
ثم غادرتهم مسرعة الى غرفتها يتابعها آنس بعينيه..ذهبت جيدان لسارة وامسكت يدها فى حنان قائلة:
متزعليش منها يابنتى..هى قلبها طيب أوى
ابتسمت سارة فى حزن قائلة:
انا مش زعلانة منها ..انا زعلانة انى مقدرتش اوصل لقلبها
قال آنس فى مرح وهو يحاول ان يلطف الجو:
مش تباركيلنا طيب..انا وكريمة هنتجوز
ظهر الفرح على وجه سارة قائلة:
بجد ياآنس..مبروك..الف مبرووك
ابتسم قائلا فى سعادة:
الله يبارك فيكى..فين آدم عشان افرحه؟
ابتسمت قائلة:
خرج من بدرى راح الشركة
قال آنس :
ونؤنؤ؟
اتسعت ابتسامة سارة وقالت فى حنان:
فى الجنينة مع الدادة
اومأ برأسه قائلا:
طب انا رايحلها..عن اذنكم
غادر آنس فالتفتت جيدان لسارة قائلة:
اخبارك ايه مع آدم ياسارة؟
ابتسمت سارة قائلة :
الحمد لله ياماما
ربتت جيدان على يدها قائلة:
الحمد لله..ربنا يسعدكم يابنتى
قالت سارة فى حب:
ويخليكى لية ياماما..انتى حسستينى بحنان الام اللى انا مش فاكرة منى غير ملامح بس انتى عوضتينى عنه
ابتسمت جيدان قائلة:
وانتى من يوم ما رجعتى وبقيتى لية البنت اللى مخلفتهاش ياسارة
ارتمت سارة فى حضن جيدان لتضمها جيدان فى حنان وهى تقول فى نفسها:
ياترى أبقى شريرة لو اتمنيت انك تفضلى فاقدة الذاكرة علطول ياسارة
اغمضت عينيها وهى تتمنى..فقط تتمنى