عشق البدوي

١٠

..مصطفى انساها
كلتها اله واني مو مقتنعه لأن جربت  انساه بتفكيري من يوم. العمي ياسر حاجاني الهذا اليوم اريد اقتنع احنه مو البعض مااكدر وارجع احلم بالمستقبل واحلامي رافضه بديل اله

تنهد بضيق وكال

..اتناسه ميخالف قابل اگضي عمري انوح لا اول وتالي اشوف حياتي واتزوج

..ارتاحيت من شفته قوي وحجاها بقوه حته ملامح وجهه مرتخيه

شجعته وبقينه نسولف اتذكرت امي رادتني اشوفه شبي نزلت اطمنها هيه وابوي الي سد باب غرفته بقوة بعد ماسمع التكسير ماادري كاره وضعه لو كاره ضعفه
لگيت زينب سانده هيثم وتگعده  وهوه خجلان. منها يگلها بطلت مااريد عوفيني
جاوبته ليش مو ردت تكعد وتشرب مي انت متحبني اكون قريبه عليك ليش تطلب من الكل وعادي اذا ساعدوك واني لا تره اني مو غريبه راح يصيرلي شهرين متزوجه بابا وتره والله اني مو زوجة اب اعتبرني صديقه

ابتسم الها منصي وهوه خجلان
كلها لا بس اني مااحب اي واحد يساعدني ولو بابا موجود  ع طول مااطلب من غيره

..براحتك حبيبي بس هالمره انطيني فرصه اساعدك

حسيته وافق سندته واخذت گلاص مي مليته وقربته اله اخذه بأيده

..شكرا خاله

..سمعتها وحيل افرحت

علاقتي بكميل زينه بالبداية متحسسه كلش من سكوته وطلع هوه هذا طبعه وي الكل بس وي هيثم ينطلق من اشوفه يهتم الابنه حيل افرح اتمنى فد يوم يكلمني بموضوع نتناقش نحجي هوه لو يقره لو يوجه اخوته لو امه وابو طلبو شي ينفذ واني حاسبني حالي حالهم لو ردت اطلب واتي ممتعوده اطلب شي ابد
من اني صغيره حته يوميتي اذا ماما نست منطتها الي اخجل اكلها انطيني هذا طبعيواخلي متعودين عليه ويعرفوني حته
المرحوم قبل مجان ينتظرنييشوف شنوو ناقصني يجيب من. غير المصرف ينطيني كل شهر

كميل مخلي المفتاح يمي وكال القاصه موجوده شنوو تحتاجين اخذي وهاي صار اشهر اني هيج اكو شغلات نسيتها وجانت متفاركني اكلاتي المفضله احتياجاتي
اما العطور والشامبو والغسول ذني هوه كل ضهر يجيب المرام اخته وجبه واله والي هم بدون ميسألني شنو اريد جاب نفس الي استعملهم الظاهر يعرف شنو استعمل

رغم هذا كله صرت اتعود عليه احب صوته من يقرأ قرءان وبنهاية قراءته يهدي الروح زوجته ومن يذكر اسمها احس بي الهسه يموت بيها ويشوفها بابنه علاقته اكثر من علاقة اب وي ابن
حبيت علاقتهم واتمنى يجي يوم واشوف هالجانب واشعر بحبه الحقيقي مو حب زوج الزوجته
اتذكرت بيوم چنت متوتره كلش وضايجه ع وضعي وحالتي وناويه هالمره ابتعد ليش ميحجي ليش ميعبر
اتمددت بسريري وتغطيت غمضت عيني من سمعت خطواته وهوه يتقدم.  انفتحت الباب وقفلها