عشق البدوي

مقتطفات

اليوم اني فرحانه حيل رايحه البيت جدوو واخيرا بابا سمحلي اروح لان امتحاني باقيله يومين وبابا حاول يمنعني بس شاف دموعي نزلت وافق حبيبي ميرفضلي طلب اكيد تنزل دموعي هوه اني اكدر افووت هاليوم اووف اليوم عدهم الاجواء غير
اجواء محرم
الليله سابع محرم رغم الألم الي يجتاح انفسنه والشعور المؤلم الي نحس بي لكن نتحضر بلهفه الهذا اليوم بالذات لكن من صغرنه نجتمع كلنه النساء ابيت جدوو وعمامي واولاد عمهم يسوون العزاء ابيت عم ابويه فرق بيتين عن بيت جدوو.

الحد ساعه 12بالليل النساء تروح ويبقن بس امي ونسوان عمامي
ويبدون عمامي بالطبخ يسهرون همه وبعض من عماتي للصبح ويبدلوهم الناموو بالليل امي دائما شغلها الصبح هيه الي تشرف ع الصب واحنه البنات نوزع عادي منطقتنه كلها اقارب وناس تعرف ناس محد يتعرض الوحده بينه ابد اصلا ولد المنطقه همه الي يحمونه ومنو المارايدته امه ويگرب صوبنه
طبخنه بالليل واني وياهم عيوني راحت من ثرم البصل وكل شويه ويجي مصطفى يقلد عليه

..لچ يرادلچ تانكي من العطور انغطج بي ومتروح منج هالريحه

..هيهيه نننه عيبت عليه مدام اني مسويته الوجه الله وبثواب سيدي ومولاي ابا الفضل ميهمني ولا اهتم الك انت حير بنفسك وبعدين انت مو اقل مني شوف ريحة الدخان البيك تسطر جنت تحضرلهم الحطب موو

..ههههه لچ اي غير الدنيا اطوورت والعالم وين صارت وحبوبتج بعدهي ع القديم ماتطبخ الا على نار ياريت لو هيه التطبخ صدگ بس حزامها وجفجيرها بيدها اليكول هيه ام الطبخ  وعمامج رايحين بيها

..حبوبه وجودها كافي لك هيه الاسست هالمراسيم وولدها يسوون على خطاها يارب تنعاد كل سنه بوجودها وسلامتكم كلكم

..امين حبيبه ..نامي ارتاحي باجر ورانه توزيع انتن الشارع بيتين وتكعدن واحنه يودونه المنطقتنه والمناطق المحيطه بينه وهنوب عمي ياسر السنه بدوامه العوائل المتكفلهن السنه صارن مسؤليتي اني وكميل

..ها الله يقويكم انت بس لاتتذمر وخلي هالشي بثواب الامام والوجه الكريم راح ترتاح وماتحس بتعب

..ان شاءالله ..يلله روحي نامي امي وصتني عليج

..ياخويه شوصتك هوه وين انه غير بنص اهلي روح نام وبالك مرتاح انه مانام لمن يخلص توزيعنه وشغلنه يلله
حاجانه عمي احمد

..بابا بدون ضحك وسوالف الليله ليلة عزاء هذي الليله ليلة الكفيل استمعوو للزياره وبس

ركزت مشغلين زيارة عاشوراء سمعتها وگلبي ملهوف الزيارتهم بس الصوت راح يخليني انعس
اخذت الهتفون وشغلت قصائد الملا باسم
اخذت النومي اسوود اطحنه احنه نسمي نومي بصره ليش ماادري
شويه وريحة الطبخ بدت تفوح طابخين عجل على تمن بحشوو ومرگة طرشانه بس تخبل المنطقه كلها تنتظر طبخنه كل سنه بهذا اليوم
من الصبح اجوو الجيران خلوو يمنه جداري عليها اسمائهم احنه اتصلنه بيهم بيت بيت حته نحجزلهم وعلى راحتهم ياخذوه
والباقي احنه نوزع الهم
صار التوزيع اخذت وجبه ونبراس بنت عمتي وجبه وطلعنه كل وحزه لزمت جهه من الفرع
اني امشي واتذكرت اووف هذي القطعه الجانت مصدر رعبي وشكم موقف صايرلي بيها صارت ڤله وبدل ماجنت اغمض من الخوف من اشوفها صرت بس اريد اشوف جمالها
بالعافيه ع الساكنها شنو هالجمال والترتيب
دكيت الباب
ماكو رد رجعت دكيت
سمعت صوت قرب ع الباب بس يتصل

..يالأخوو انت ظل معي لاتسكر خلني اشووف واردلك

استغربت اللهجه حسيت الباب انفتح دنگت راسي وگلت

..السلام عليكم
..واعليكام السلام ورحمة الله
..هذا ثواب من بيت العلويه للامام العباس عليه السلام

..عسنه واصل والنعم من ابن البدويه

..ظليت واگفه وهوه واگف ربكتني نظراته ..عفيه بس الصينيه حته ارجع اوزع بيها الصحون خلوها يمكم عادي

..ناديت ميثه ميثه  اكلطي هان.. خذي من يدي هذا ثوابن من وين گلتي يابنت

..هاا من بيت العلويه

..ايه گلتيلي لكن نسيت يلعنها من ذاكره جيبيلها الصحون ميثه
صديت صوبها

..وش اسمچ يبنت

..ها ..متفاجأه ومامصدگه هذا شنوو عراقي لو شنوو اشوو مسمعانه بلهجته ابد ولا عندي فكره عنه

..گلت وش اسمچ

..مرام

..عز انچ ع المرام

يتبع..

السلام عليكم حبايب عظم الله لنا ولكم الاجر بحلول شهر محرم الحرام
شهر انتصرت به الدماء على السيوف

هذي القصه ابدي بيها بعد الخذلان 
من تكلمت بيها صاحبة القصه والهسه احداثها ادور براسي حبيت انزل منها مقتطفات اشوفها تعجبكم لو لا يعني تحبون تقرون هالنوع لو ابتعد عنها بس تره احداثها كلش كلش حلوه

الي تعجبه يضيفها للمكتبه حته من انزل توصله

حبابي تصبحون على الف خير