ام زوجي الظالمة (حماتي المستبدة)

الجزء السابع

#حماتي_المستبدة
البارت السابع...

بقلمي...
#همسات_الليل(ام آيه)

تاره....ها دكتوره طمنيني فدوه...

الدكتوره....شوفي حبيبتي ...
مااعرف شلون ابدي...

فدوه دكتورة قلقتيني احجي.....
يابنتي انتي تعانين من تشوه خلقي بالرحم....
ورحمج بعده صغير وهيج حاله مثل حالتج يسمون الرحم بيها...
رحم طفولي ..

شلون يعني دكتوره فهميني...
يعني عندج رحم وبي مبايض بس بعده صغير ...

وهسه قست ابعاده وراح انطيج علاج تستمرين عليه كم شهر ونشوف....

اذا الشهريه انتظمت خير ان شاءالله ...
واذا لا منا لوقتها الله كريم...
هسه استعملي العلاج ويصير خير منستبق الاحداث....

ام مروان....
اسمع كلام بنتي والدكتوره ...
مصدومه ودمعتي بطارف عيني...

الوم بنفسي ...اني وين جنت عن بنتي ...
اكو ام متعرف بتها بلغت لو لا ....
التهيت بخيانة الرجال ونزواته ...
وصرت انانيه...فكرت بنفسي...
وعفت بنتي حبيبتي ...

مايوم حجيت وياها بهالموضوع و لاسألتها....
زين حتى اللوازم الي تحتاجها كل بنيه شهريا...
مخطرت على بالي ولا اتذكرت واشوفها ...

سواد وجهي عليج يا مي عيوني ....

ام مروان....
بتنهيده....زين دكتوره وهذا الشي يأثر على الزواج يعني علاقتها بزوجها....

لا حبيبتي ميأثر....
تزوج عادي و ماكو مشكله كلشي يكون وضعه طبيعي...

بس احتمال الانجاب يكون عدها ضعيف او معدوم ...
وهاي الشغلة بيد الله....

تارة....
فاتحه عيوني وكامت تجري دموعي ...
انقهرت من اخر جمله كالتها...
لان عمار مولع بجهال اخوته ويحب الاطفال بشكل مو طبيعي...

الدكتورة....
حبيبتي لتبجين ترى الطب تطور وكلشي لكوله حل...
وان شاءالله ينزاح همج وتنحل مشكلتج...

بس نصيحة يا بنتي اذا داخله على زواج وهاي حياة جديده....
فالافضل تصارحين خطيبج بكل شي حتى تواجهون المشكله سوة...
وبلكت يطلع خوش ولد ويتفهم حالتج ويرضى بوضعج ويساعدج.......

ام مروان....
الله كريم دكتوره...

دكتوره ...
هذا العلاج تستمرين علي بالمضبوط ...
وشهرين وتجيني نعيد السونار والفحوصات.....

ان شاءالله شكرا دكتوره...
العفو عيني...

طلعت من الدكتوره مهمومه وشبعانه قهر على عمار وعليه وعلى فرحتي الي متدوم ...