بائعات الهوى

الجزء الخامس

الحقيقة..خفت من وجودي وياه...وردت املص روحي..بالرغم من ان كلبي مانطاني اعوفة واكوم...انوب كلبي خنكني بدكاته الزايدة ..كل ما احجي وية احمد ..او نتقابل..باي مكان اكول خل احجيلة على كلشي ما كايلتلهياه بخصوص ماضيي..وعائلتي..واصلي ونسبي..واللي ايصير يصير..واتراجع مرة ثانية..ابطل..واكول اخاف اخسره..واني بالكوة جلبت بيه..هوة اللي نورلي طريقي..هوة الشي الوحيد..اللي خلاني احب الدنية..
مشت الايام وحبنه..كام يزيد يوم عن يوم..وفد مرة كالي اريد اتقدملج..واذا قبلتي راح نزوج بداية العام الجاي..براس السنة..البيت جان مجهزة ومحضر روحة وما مخلي شي ناقصة ..كالي بعد ما اكدر اصبر..وانتي بعيدة عليه..اريدج ابيتي وتصيرين ام جهالي..بعد ما اكدر اصبر ..تفتهمين...احبج..احبج..احببببببببببببج...صاحهه بعلو صوته..كلامة هواي فرح كلبي..ويطيرني بسماه..بس بداخلي تنهيدة وحصرة بكلبي..وخوف من المستقبل المجهول..وخوف من اللي جاي..
رجع احمد للشغل مالته وقلت مكالماتنه وشوفاتنه..لان بالدوام ومايخلوه ينزل الا بايام الاجازة..جان من تصير فرصة عندة يتصل بيه..احسة يريد يطلع..ويشوفني..حتى بوساته..بالتلفون..احس بحرارتهه..وبلهفته عليه..من صدك حبني وحبيته..فوك متتصورون..اوووف يادنية فرحيني ولو مرة..وكافي..بجيتيني هواي..هواي
مرة تقابلنه بكوفيه..وجان يدخلن مجموعة مالت بنات..كحاب..يعرفن امي..من كارهه..درت وجهي عليهن..لان اعرفهن وهواي شايفتهن وية امي....
احمد كال عذه شلون شكولات لعد شكد ساقطات؟؟؟
اني سكتت..وسويت نفسي ما اعرفهن...بس استنتجت وية روحي انو احمد يحتقر اي وحدة من هل نماذج..
واني عود جنت مفكرة احجيلة على كلشي..وجنت استجمع شجاعتي وجرأتي حتى اصارحة بمصيبتي العضمى...بهل لحضة..وحدة منهن فاتت من يمي شافتني ..كالتلي..هلووووو ...زمن..اني وجهي احمر صار طماطية..يبوووو شكد استحيت..بوكتهه..
احمد بحلك عيونه..وحمرن وصفرن..كالي ..زمن...هاي منين تعرفج..؟؟؟كتلة..هاااا؟؟ هاي ساكنه بالمنطقة مالتنه..
وانته تعرف منطقتنه ملفية اشكال وارناك..وخصوصا من هاي النماذج..
كالي ديري بالج..تحجين وياهم ..وكالي اني اتخبل من هيج نماذج..ولو بيدي المهم كلهم وحرك..منعولات اللشة..ماعدجن..رجال يسترجن ..ويكمعجن..
ايييي ...اني خفت من كلامة..
بس كلت الله يعرف شلون يبدل من حال لحال...
فد يوم سوالي مفاجئة..واخذني لبيته..؟؟صحيح..اني ترددت قبل ما ادخل..بس هوة كلي..انو يحبني اكون مرته بالحلال..وعلى سنة الله ورسوله..وذاك الوكت..انام براحتي بحضنة واتلمس حنانه..
بس بيناتنه الحجي ...اني ضحكت..من الحجي مالته ..ما اعرف ليش..ولحد يسألني؟؟
من دخلت..انصدمت..بلي شفته..؟؟بحلكت عيوني..وضليت بس اتلفت؟؟هوة ضحك..عمري ماتخيلت..هيج يسويلي..
لكيته فارش الورد..بالبيت..وجايب كيكة..وكاتب عليهه..نورتي بيتج..يا حبيبتي..زمن..
حطيت ادية على حلكي من الصدمة وكمت ابجي..من الفرحة..حسيت الدنية ضحكتلي..وانطتني اكثر مما تمنيت..
شوفني البيت كلة حته حته..بدة بالصالة..والمطبخ..وبقية الغرف جانت تحفة..كلشي حلو..ومرتب..اخر شي شوفني غرفة النوم..صدك ولا بالاحلام..شنو من ثريات وتيبلامات..والفراش..ياخذ العقل..عجبني حيييييل..
كالي..ما نام على هل فراش الة بالحلال..ونشتغل شغلنه.ههههههه ضحك..وضحكني..استحيت ودنكت راسي..تقربلي وباسني من كصتي..كالي اموت ع المستحة مالتج..جان يطلع من جيبة علبة حمرة بيهه خاتم..وكالي ان شاء الله عن قريب راح يكون باصبعج..
تردون الحك...زورني الجنه..وعيشني بحلم ماردت اصحة منه..
رجعت للبيت لكيت امي تحضر روحهه..لسهرة شرب..مثل كل يوم..والله واعلم بيا مكان اليوم السهرة..ما حبيت اناقشهه..كلت نوب تردني بكلمة تغثني..وتفسد عليه فرحتي..دخلت كامت اتباوع عليه..وعوجت حلكهه..وتهز بركبتهه..حسيت.. ما عاجبهه حالتي..كالتلي اليوم من وكت راجعه..لازم حبيب الكلب ما عندة وكت..كتلهه وانتي شيخصج..طلعنة وتونسنه..بس حبيبي..صار عندة شغل مستعجل..وماحبيت اعطلة..طلعت راحت للموعد مالتهه..
اني نضفت البيت..جان عيني توكع على سندانه بيهه ورد..وتذكرت بيت حبيبي احمد..شلون الورد موجود بكل مكان..سرحت وية الورد..وصاحب الورد..وحلمت بدنية غير دنية..وجان يدك التلفون..رحت اركض كلت احمد حبيبي..رفعت التلفون لكيته اتصال من امي فتحت خط..كالتلي..الحكيلي زمن..اني تداينت كوم فلوس بالقمار وخسرت..وديهددوني بالسلاح..لو انطي الدين..لو يكتلوني...
اني كلت هاي امي ناصبة عليه..لو تريد شكم فلس..محتاجة..جان واحد ياخذ تلفون امي وكام يسب ويعارك بيه..ويشتم..وكالي باعي لج..ربع ساعة..اي ربع ساعة اذا ما جبتي فلوس..امج بخبر كانه..
كتله ماشي ربع ساعة..هية صحيح..لو تموت وارتاح منهه..ومن مشاكلهه..حتى الماضي مالتي وفضايحهه وشغلهه هم ينسي وياهه..بس..شما صار تبقة امي..
اخذت الفلوس الجامعتهن..وبدلت ع السريع..واجرت تكسي..وكبل ع الملهى..
جنت اكره جو هاي الاماكن كره العمى..بالرغم من انو اني عشت عمري كلة..بهذا الجو..اللي تعشقه امي..
مشيت لحد ما وصلت امي..لكيتهه باحسن حال..ومتونسة..والمصيبه امي لاعبة قمار علية..وخسرانه..اللي يطلب امي..كاللهه..الدين وصل..بعد لا اطلبج ولا اطلبيني..
اني تفاجأت..وصحت..لا..لا..امي باوعت عليه وكالتلهه الف مبروووك عليك ..كمت اصيح واعيط
.لا ..لا..يا امي حرام عليج..راح ضيعيني..ليش هيج اني مو بنتج..كافي اللي سويتيه بيه..كافي..اصحي على نفسج اصحي..
جرني واخذني..لعندة..بدون رحمة..وللحكاية بقية