قصص رعب (باللهجة الليبية)

حكاية البقرة/ واقعية

كان يا ماكان في قديم الزمان😣

مشيت اني وماما لحوش اختي لانها كانت مريضة كان حوشها كبير وقديم ومظلم ونص الحوش مش مصقف هيا شاريتا من ناس منعرفهمش
المهم اول ماخشينا عدينا طول لدار اختي وراجل اختي كان مسافر وخويا طلع برا من الحوش لقيتها مقعمزة على سريرها وباين عليها تاعبة ماما قالتلي نوضوي ديري حاجة تتكل
قلتلها شن اندير قالتلي ديري كسكسي ولا مكرونة ولا شربة او اي حاجة
قلتلها باهي وبرقت في اختي قلتلها وين المطبخ قالتلي امش طووول تو تلقيه
اني قعدت نمشي في الممر وكان الممر طويل وبلا سقف وكان الوقت ليل قعدت نمشي بالشوية واني خايفة وكملت طريقي واني نحرك في كرعيا (رجليا) بالقوة لاني قعدت انحس فيهم ثقلوا واني نمشي قعدت نشبح في حاجات معرفتهمش شن هما حاجات سود زي البخار ومرات يجن على شكل انسان ويرقن فوق وكيف ماقلتلكم مفيش سقف قعدت نشبح فوق وفي حاجات يمشن من جيهة لجيهة وكانن سريعات منجيبش شكلهن المهم واني نشبح فوق في قطوس سودة كبيرة نطت من فوق اني عيطت بصوت عالي وهربت نجري للقدام طوووول والطريق حسيتها طويلة ومعادش تمت قعدت نجري لين وصلت لي مكان قلت اكيدة المطبخ لان كان فيه حاجات زي الطناجر وغيرها اول ماخشيت شبحت على يساري كانت في لامبا حمرا تولع وتطفا وكانت بين حاجات مش عارفة شنهيا وكيف تولع وتطفا
المهم مشيت خديت الطنجرة والكسكاس والبصل والكركم والملح وطماطم الحكة ومكونات الطبيخة المعروفة وجيت بنديرهم وتجي حاجة تاخدهن من ايديا اني انصدمت و وخرت للوراء وقعدت نشبح فيهن قعدن يتطايرن في الهواء وتخلطن وقعدن يرقن يخبطن الصقف ويطيحن واني من الصدمة معاد قدرت انتحرگ
بعدين بعد ماتخلطن بـ15ثانية حاجة هكي تغيرت حركتهن قعدن يطلعن الصواني والكواشيگ(الملاعق) من الدولاب وغمضت عيوني لاني حسيت حاجة قربت مني
بعدين فتحت اعيوني 👀لما حسيتها تبعدت وشفت لقيت مقعد الكسكي واااتي حاجة ميتخيلهاش العقل اني خديت المقعد وحطيتا مع النعمة وقلت خليني اندير مگرووونة وقلتها بصوت مسموع وتبدا الحركة يلي صارت مع الكسكسي وخرت جيت بنطلع وتجي هديگ اللامبا الحمراء قدامي وتولع في ضي قوي اني استعذت من الشيطان وهربت نجري🏃.
وبعدين قعدت نسمع في صوت امية تصب فرحت☺ قلت اكيدة خويا الكبير جي مشيت لمكان الصوت ولما قربت منا حسيت بحاجة على گتفي شبحتلها ولقيتها يد✋ مقطوعة شادتلي گتفي خبطتها ليين طاحت وقعدت انتبع في الصوت لين وصلتلا وبرقت فيه لقيتا ظل بقرة🐄 يشرب من المية هوا ظل بس يشرب ويدير في صوت والمكان مفيشي بقرة لا فيه شي كان المگان فااضي خفت قعدت انعيط امشي الظل التفت جيهتي وطفا شيشمة المية وقعد يقرب مني واني انوخر لعند قرب مني واجد وقريب يوصلني انفتح باب الحوش ولقيتا خويا هوا يلي خش والظل اختفي ومشيت نجري لخويا تعنقتا وقعدت نبگي قالي خيرگ امشي حكيتلا گل شي صار معايا امشي قالي اكيدة تتخيلي تعالي نطلعوا شوية ولما طلعنا واحد من الجيران قعد يشبحلنا ومستغرب وجانا قاللنا انتم شن اديروا هنا قلنالا هدا حوش اختي استغرب فينا وقاللنا الحوش هدا مهجور من زمان لان اهلا انقتلوا وهما فيه واي حد يخش للحوش هدا يطلع ميت والحوش هدا ديما نسمعوا في عياطات فسطا امشي خويا خش داخل وطلع اختي وامي وسيبنا الحوش.

مع تحياتي الگاتبة حواء عبدالسلام 😍Hawywa Ab👑