مرة ماما طلعت مشت لمرت جيرانا اتصلت بيها قالتلها تعالي واني كان عندي اخت و خو اصغر مني بس وكانت عندي مرت بو المهم كنا نسكنوا فوق حوش اهلي يعني جدي وحنتي
وكانت شقتنا كبيرة وبعدين عمي دار حوش وطلع من شقتا وشقتا لاصقة فينا امشي احني فتحنا شقتنا على شقت عمي ولا حوشنا كبير واجد خليني نرجع للأحداث
ماما مشت لحوش جيرانا وكان عبارة عن دارين وصالتين ومطبخ ودار خزين وحمامين (حشاكم) وكان حوش قديم والصقف متعا زينقوا
ماما خشت فتحتلها مرت جيرانا وهيا عندها بنيتين بنت عمرها سناتين وبنت عمرها شهرين
المهم لما ماما خشت استقبلتها مرت جيرانا وجابتلها عصير وقالتلها اتفضلي ماما خدت العصير وسألت مرت جيرانا ليش متصلة بيها وقالتلها تعاليلي ضروري مرت جيرانا قالتلها اسمعي يا سميرة (هدا كان اسم ماما) بنقولك حاجة لكن متخافيش مني قالتلها ماما خيرك شن في قالتلها اشبحي فطومة راقدة (فطومة عمرها سناتين) وجنى تعالي انوريهلك وين وشدت ماما من يدها وخشت بيها للصالة التانية ماما كانت قاعدة طاسة العصير في يدها ولما شبحت شن في فسط الصالة التانية فتحت عيونها على وسعهن وطاحت طاست العصير من يدها ( يلي شبحاتا ماما كان عبارة عن مرا بلا راس ولابسة عباية وشادة بنت جيرانا الصغيرة ومش عارفة شن توكل فيها)
لما طاحت طاسة العصير من ماما انتبهتلها المرا يلي بلا راس وقدمت تلاها و ماما بعد قربت منها المرا هربت جت تجري لحوشنا فوق كان حوشنا فاضي اني وخوتي نلعبوا بحدا حنتي لوطا ومرت بويا في الجامع وبابا في العمل ماما قعدت خايفة واتنادي عليا في الحوش
ماما: احويوة اعليوة سوسو
لكن احني مش في الحوش مرديناش عليها
ماما خشت للحمام (حشاكم) وتبي اطلع سلة الدبش بتنشرا على الحبل ولما رفعت راسها شبحت حاجة خطمت قدام الشباك ماما قعدت خايفة وطلعت برا في البلكونة بتنشر الدبش وشبحتني اني وخوتي نلعبوا
ماما: احويوتي تعالي اركبي نبيك
اني : مزال ياماما نبي نلعب اني وعلي ولد عمي
بعدين سمعت صوت ماما تعيط ركبت نجري لقيت مرا في البلكونة وجهها مشوه وتشبه لمرت بويا شادا ماما واتقوللها معندكش وين تهربي مني اني كنت طفلة عمري 5 سنين لكن معرفتش شن اندير والبلاكونة تفتح عالمطبخ قعدت انعيط وانادي على سيدي(جدي)
وخشيت نجري للمطبخ من ورا المرا لكن شكلها ما انتبهتليش خديت الفكرونة (السلحفاء) متعي وجبتها للمرا قلتلها سيبي ماما وخودي فكرونتي (سلحفاتي) ظحكت عليا لكن مدامش ظحكها لان مرت بويا و سيدي خشوا يجروا بعد شبحتهم اختفت في لمح البصر ولت كيف الغبار وبعدين في الليل بعد روح بابا من العمل ماما حكتلا كل شي قعد يظحك علينا قاللنا تتخيلوا بس بعدين نسمعوا في تشكشيك في الشقة التانية متع عمي خشينالها لقينا الصوت جاي من الحمام(حشاكم) ولما خشينا لقينا المرا بلا راس ومصبيه في الشباك والشيشمة والشرشارة مولوعات والشامبوهات يطايحن بابا صدقنا بعد شبحها بعدين انقطع الضي وماما اتديرلنا في شربة عدس لان الوقت شتاء ولما ماما في المطبخ اني شادة في قفطانها وخايفة طاحن الطواسي وقعدن يتكسرن وبعدين الفكرونة(السلحفاة) جي ظلها كبير في المطبخ وبعدين معادش لقيتها بعد اسبوع لقيت كرع (قدم) الفكرونة (السلحفاء) بس في البلكونة
حكاية واقعية 🙈😖
أنت تقرأ
قصص رعب (باللهجة الليبية)
Horrorقصص رعب حقيقية وهيا من عالم الواقع هناك منها من حدث معي واخرى مع غيري ولكن لم يسمع بها او يقرأها إلا القليلون
