نار الغيرة تحرق رجل واطيها

تكملة الجزء الاخير

وكمــل بنفس الصـوت الغريب " والثقه انزرعت فيني من ألحين يا ريم "

مرت سنه وخلال هالسنــه :

خالد ومها : مستقرين بالسعوديه ..كل خميس وجمعه لازم يزورون الكويت , عشان مها تشــوف اهلها .
صار عندهم ولد اسمــه جاسم ..ماخذ قلوب الكل بخفـة طينته .
مها لازالت على دلعها ..وخالد لازال غير قادر على مقاومة هالدلع .
حبـهم لبعض ما يمنع وجود خلافات بينهم تمنح حياتهم نكهـه ..وتخلي الصلح احلى واحلى .
لازالوا كل واحد فيهم يغار على الثاني بينون .
في بداية رجوع مها لخالد ..على الرغم من تأكده من حبـها له إلا انه بالأيام اللي يشتد فيها الخلاف بينهم ..يتوقع انه بيرجع ويشوفها تاركتــه , لكنه ما استسلم لعدم الأمان اللي هو حاس فيه , وتصرف معاها على طبيعته ..
ومع انقضاء ايام السنـه بدى إحساسه بالأمان يستوطـن

عمر وريم : رجعوا من مصر للأستقرار بالكويت , عندهم بنت سموها حنان تشــبه ريم بكل شي , مجننه ابوها عمر , اللي مدللها اخر دلال , اما ريم فمرتبطه في بنتها بصـوره اهي ما كانت متخيلتها .
ريم لازالت غيــوره ..وما ينافسها بغيرتها إلا عمر , اللي لازال يغار من فيصل على الرغم من كلام ريم لأنه كان عارف انه لو انترك الموضوع لعمه حمد جان زوجها غصب..
اما ريم فمازالت تغار من سام اللي مستمره بإتصالاتها المتباعده مع عمر , وهذا من اهم اسباب خلافاتهم مع بعض .
نوره مالها طاري ..لأن ريم ما تبي تذكر انه في وحده شاركتها بزوجها بيوم من الأيام .
بينهم خلافات طبيعيه مثل اي اثنين متزوجيـن , عمر يتعامل مع الخلافات ببرود , وريم بتفجـــر ..
وغالبا ما تكون مغتاظه من بروده ..
لكن عمر مو دايما بالخلافات بارد أو مستهـزأ , في احيان كثيــره ما يقدر يمسك اعصابه , وينفجـر , وبهالوقت ريم تحاول تمسك نفسها لأنها تخاف بوقــت غضبـه المتفجر هذا .
لكنها متأكده و واثقه انه يحبها وهالشي يفرحها

ساره وقتيـبه : تحت اصرار قتيبـه ..تم الزواج , واخيــرا صارت ساره له ..ساره سعيده بالوقت الحالي مع قتيبه اللي اثبت انه رجال والنعم فيه .

موضي :كل يوم عن يوم تحب مها اكثــر وتتقلبها اكثـر , اما جاسم سمي زوجها فأهو اغلى عليها من روحها ..وينطبق عليها المثل ما اعز من الولد إلا ولد الولد .

فاطمه : على حالها ما تحب مها , ولا ممكن تتقبلها .

سمر : في مشروع خطبـه ..لكن ما تم حتى الأن .

بدر : سعيـد انه صار عم .

غانم : بعده على حاله , لكن في تغيــر بسيط , انه تعلق ببنت عمر , لما كان عمر في مصـر , كان غانم يتعنى لحنان مخصـوص على الرغم من انه عمر كان يزور الكويت كل اسبوع , ولما رجعوا للكويت واستقروا , صار كل يوميـن ياي لحنان .

الجد سعود : راضي جـزيئا عن احوال الكل ..ما عدا غانم ..
وفاقد وجود حفيدته مها لكن التليفون اليومي والزيارات الأسبوعيه مهــونه عليه هالشـوق .

حمد (ابو ريم ) : علاقته مع ريم بعد ما ساعدها بموضوع الإتصالات قـوت بصوره بسيطه , لكن انشغاله بأعماله يمنعه من تكوين علاقه اقوي من جذي .

بعد انقضاء السنـــه ..الكــويت ( عمر وخالد ) :

كان عمر توه راد من مصــر بعد ما صارت الشركه بوضع ممتاز , وقــوي ..
ضبط وقت ردته لمصـر , مع وقـت زيارة خالد ومها للكويـــت ..
ومثــل العاده كلما تواجد بالكويت لازم يـزور قبـر نوره ..الله يرحمها ..
نوره كانت شخصيه مرت بحياته ..مثل عابرة سبيل ..لكن علمته وايد اشياء بالحياة ما يقدر يناسها أو يوقف عن زيارتها مهما كان ..
هالمره كان معاه خالد ..لكن خالد استأذن وراح لقـبر عمه محمد (ابو مها )...عمر كان قاعد قرب قبر مرته المرحومه .
بعد ما سلم عليها ..ودعا لها ..
بدى يتكلم معاها ..
احساس داخله ادفعــه للكلام لأول مره بزياراته لها ..
قال بصــوت هادي ومتـأثـر " نوره ..انا أبو ألحيـــن ..عندي بنت صغيره ..سميتها حنان .."
سكـــت للحظــه وبعديــن قال " وخالد ومها صار عندهم ولد .. جاسم .."
كمــل واهو مستـغرق بأفكاره " انا متزوج من مرتي الأوليــه ..ما تكلمنا عنج ..ابدا ..علاقتي انا وياج راح تظل للأبد بينا ..علاقه خاصــه .."
وكمــل بجمله وجهها لنفسه أكثر من انها موجهه لنوره .." تزوجتها لأني ما قمت اقدر استحمل وجود خطابها , لأني احبــها ......الغيــره نـار يا نوره "
خالد كان يشوف عمر ..
مــرت عليهم سنــه تقريبا , والحيــن استقرت امورهم تقريبا ..
قرب من صاحـــبه ..
وسمع اخر جمله قالها عمر (الغيره نار يا نوره )
عمر سمع صــوت خالد يقــول بنبره هاديه , ولكن واضح منها ان الشخص عارف معنى كلامه عدل " ونار الغيره تحرق رجل واطيها "
سمع عمر كلمة خالد ..
ما في اصــح من هالكلمه ..
ابتسم عمر بذهـــن غايب على كلمة صاحبــه " اي صــح ..نار الغيره تحرق رجل واطيها "
قام من مكانه وقبل لا يروح للمكان اللي خالد فيــه , قال " مشكوره يا نوره على كل اللي علمتيني اياه ...مع السلامه "

النهايـــــــــــه

تمت بحمدالله وفضـــله رواية نار الغيره تحرق رجل واطيها