بقايا حلم

الجزء10 والاخيييييير

مساءكم سعادة حبايب

رجعنا وامي تلح ع الزواج واني هم لاحظت يعني صدك قبل اخو سالي ولاجان أحد يجي يخطبني يجوز جان جسمي يخلي العالم متوصل لو معقولة لعنة زيدون ملاحكتني واني هم مجنت اريد مالي خلك لان مداكدر انسى واستمر بحياتي الي كلشي مشفت منها ولاحسيت بطعمها ولا أحس سويت شي شي بحياتي لان اني ضيعت الأول والتالي وخلوني إنسانة مكسورة كئيبة متحب الحياة ولايعجبها تعيشها وعاشت ايدهم نجحو بلي رادو حطموني والي عرفته انو اخت سلوى الي رادها قيصر ورا كل الي صار وهي وزت اختها لان احنة مردناها لاخوية ههههه ياختي شنو هلانانية الي حطمتي بيها 3 وذنب هذولة الأطفال بركبتج لان مشاكل متنتهي وهي متندمة وهو الي مرايدها ودائما يريد ينفصل عنها بس خالي وامه مديخلو عيب من العالم والجهال يضيعون. ...
صفحة سلوى وزيدون شكيتها مو بس طويتها وداحاول بكل الوسائل اطلعهم من بالي وبس احس راح ارجع وافكر بيهم اتذكر حياتي الجاية الي لازم اتلاحكلها أسبوع واجتي سالي هي وامها وأختها وخالتها ديشوفوني امها تخبلت لج وردة وصدك وردة وتبوس بيه وامي مكيفة تهلل وتمرحب بيهم حجو وية امي وطلعو واني المفروض شنو لازم اقبل لا ميجي احد ولا يدك بابي هذا حجي امي. ...
ام وردة...انتي تريدين تموتيني كافي عاد قسمتج واكفة وهذا خوش ولد شتريدين مثلا منو يجيج الاميرة ديانا...
وردة...راح قيصر وسال ع الولد اني صار عمري 32 سنة وهو عمره 38 ضابط وعنده مشتمل بصف اهله اني مشايفته ابد اسمه مهدي التهى بلدراسة خريج ادارة واقتصاد ومتطوع وصاير ضابط وبشغله وناسي روحة وميامن بكل وحدة لان شايف أشكال وألوان ع حجي سالي آخر شي امه كامت تلح عليه راح تصير ب 40 وبعد محد تقبل بيك آخر شي مقتنع ومخولهم يختارون حددو يجي الخميس حتى اشوفه ويشوفني ....
وحلم كل ليلة الي مديفاركني حلمي بزيدون يكون إلي حتى سلوى مالها وجود بحياتي حتى مجرد صديقة انمحت احتمال هذا الحلم الي أتمناه بعقلي الباطن إلى مديستوعب الي صار حب زيدون حلم وراح يبقى حلم لا يمكن يتحقق حلم راح وكعدت منه ولازم انساه راح اصير بذمة رجال حرام عليه يجي ابالي اصلا تعتبر خيانة حتى لو بلمشاعر ربي يحاسبني عليها ...
قررت اقبل حتى اسعد الي داير مدايري امي وقيصر ومعمر وشهد كلهم يتوسلون بيه هم يلة تلحكين تخلفيلج ولد بنية هو شباقي بلعمر بلكي الله انسى واطلعهم من حياتي للأبد ثاني يوم اجة عمي قبل ليبدي كلتله بكيفك عمو براحتكم امي كيفت ظلت تهلهل وظلت تبوس بيه والله إحساسي راح تنسعدين وتشوفين كل الخير حبيبتي ...
وردة..ان شاءالله يوم ان شاءالله اهم شي تكونين انتي راضية عليه ...
عمي..عفية بنيتي ...
وردة...تسلم عمو اخوتي باركولي وحددو الخميس يجي هو وامه وسالي بدلت عدلت روحي شهد وسالي وياية بس بدون واهس وخايفة من الي منتظرني وتمنيت وكاعدة وابتسم لو الي ابالي صار سبحان كلشي اله بيها حكمة احتمال جان تأذيت منه وكرهته وكرهت عمري وياه وسعادتي وحياتي راح ابديها صح وية اخو سالي ...
طبيت سلمت ع امه وسالي وياية عرفتني عليه هو يباوع واني موتني الخجل كلش استحيت لان شكله يخبل طول بعرض وشكل هيبة سلم عليه واني بس الحمدلله وراسي مرفعته من المستحة رحت كعدت يم امي شفتهم التهو باوعت عليه هو هم جان ديباوع يمة نظراته تخبل بلحضتها نسيت العشيرة كلها حتى اخوتي ههههه كعدت اتفقو اظاهر عجبته وحدد الخميس اليجي كعدت الزلم وامي كلبت الدنيا بلهلاهل وشهد وامه همين وباركولي وهو كل شوية يباوع سلمو وطلعو حسيت راح ابدي حياتي من جديد وبلكي اضوك طعم السعادة الي ماعرفه شلونه اجة الخميس وجان قيصر مخابر خوالي اجة سلوان وخالي ابو زيدون وخالي فرحان وابنه محمد وزيدون ع اساس عنده خفارة ومكدر يجي بعد احسن ...وعمامي وولدهم كلهم كاعدين وجاب سيد وياه حتى اذا اتفقو راسن نعقد وفعلا اتفقو وعقدنا عقد سيد وسالي انطتني تليفون من عنده وكلتلي انتظري منه تليفون بليل ترة هو استأذن من اخوتج يخابرج فكيها عيشي حياتج خلصو الزلم وطلعو واتفقت النسوان باجر نطلع نشتري الذهب ونطو امي فلوس الجهاز انتو جهزو ....
كعدو عمامي وخوالي يحجون وياية واني بالي مشتت ماريد زيدون يجي ع بالي لان مهدي ميستاهل مني الخيانة حتى لو بمشاعري لازم اول افكر بي النهار كله حتى انسى ...
قيصر كلي راح يخابرج لازم تتعرفين عليه وانتو موصغار عود جاوبي عيب ...وفعلا صارت ب10 خابر حاط اسمه بتليفون حبيبي ههههه بعد بسم الله شمدريك حبيتك يلة نجرب شعدنا احنة بلوكت الضايع. ...
فتحت خط سلم يمة صوته ربكني كمت اخربط بلحجي حتى ضحك عليه هاي شبيج يمعودة باجر ورة الذهب اخذج ونطلع مو تكولين مكلي واني متفق وية قيصر ع كلشي كملنا التليفون واني محاجية كلمتين من الخجل معقولة راح تتغير مشاعري بهلسرعة مجنت متخيلة راح اكدر انسى .. ثاني يوم اجوي علينا هو وامه وسالي واني وامي وطلعنا ع الذهب اول شي كملنا وهو حجيه كله موزون بس بحرشة وكل شوية يذب حجاية سطرني ابن الاوادم بقينا نفتر شترينا كومة سوالف صار وكت غدة تغدينا بمطعم وراها وداهم لبيتهم وامي هم بقت يمهم ..خالة اني استاذنت الولد اخذ وردة ونطلع ....اي يمة بعد هي مريتك ليش تستأذن طلعنا والطريق كله فاتحلي اليسا ههههه كعدنا بمطعم وكعد كبالي الطريق كله كلمة منطق بس بلمطعم بدة يحجي ....
مهدي...وردة اني اباوع عليه الكلمة متطلع مني طبعا اني ما اكلج محبيت ومخطبت لا كومة شغلات وكومة محطات مرت بحياتي وراح اعتبرها ماضي ومراح تجي ع بالي من يوم الي شفتج بي واكيد انتي هم مو وسالي حجتلي شي بسيط عن تجربتج ....
وردة...عززززة بعينج سالي يمة انهبطت هبطة ...
ع اساس ابن خالج جان اكو حجي و خطوبة بس مصارت واني هم راح اعتبره ماضي ومراح اطالبج بأي تفسير لان مو من حقي بس من يوم الي صرتي ع ذمتي لا راح نكعد ونتحاسب اوكي ....
وردة...ها اي طبعا اكيد ...
مهدي...طبعا اني من يوم الشفتج طيرتيلي عقلي بصراحة جنت حاط ابالي الزواج التقليدي الي عن طريق الاهل يكون بكلشي تقليدي بس من شفتج لا كلبي دك واحسه لاول مرة دك بصدق واتمنى تكونين وياية ع الخط ...اريد ابني حياتي وياج ع حب وتفاهم واريد استقر واكون احلى عائلة بس أهم شي جهالي عيونهم تطلع عليج ....
وردة..يمة موتني بحجيه مرت ايام واحنة يومية تليفونات وصدك ملا عليه حياتي طلعنا اختارينة غرفة وأثاث بيت كامل لان  راح نعزل من البداية بيت وحد وبدينا نجهز لكلشي وعقدنا محكمة ...
كاعدين فد يوم عصرية بلمطبخ واندكت الباب قيصر طلع واسمع صوت زيدون يمة بهتت طب سلم ع امي وباس راسها ...
زيدون...شلونج وردة ...
وردة..الحمدلله بخير بيت خالي شلونهم ...
زيدون...الحمدلله كلهم يسلمون عليكم ..
وردة...الله يسلمهم كمت طلعت وخليت امي تحير بي رحت للهول شوية واجوي كلهم وكعدوا سوالف  ..
زيدون...مبروك وردة اسف لان مكدرت اجي بكعدة الزلم ....
وردة...لا عادي اخوتي مقصرواتسلم . عيني ع التلفزيون واجاوبه شوية واندكت الباب امي طلعت.. ام سعدون بلباب يوم... اي يمة جاية ... وراها بشوية دك تليفون قيصر اني ابتسمت وجمعني الوكت بيك وحدي وبلا موعد طلعوا وبقيت وحدي وياه عيني منزلت من التليفون واكلب واحس بي عينه منزلت مني بس ولا درت بال ماعرف يمكن جبروت يمكن كبرياء يمكن تصنع حتى أثبت لنفسي انو اني قوية ومهزمتوني ومحد منكم قهرني ولا اثرتو عليه بسوايتكم وهو العكس صحيح بس مبينتله شي شسوي كاعد كبالي وماريد أضعف ماريد اتالم كدامه وكسر الصمت بصوته ...
زيدون...وردة ...
وردة...رفعت راسي عيني بعينه نعم ....
زيدون...فرحانة ...
وردة...اكيد ليش لعد....
زيدون..تستاهلين كل خير.....
وردة...تسلم ابو حسام .....
زيدون..ها اشو ابو حسام وين راح زيدون...
وردة..مجاوبته عيوني جاوبته .....
زيدون...العريس خوش ولد ....
وردة...اخوتي سألو عليه ....
زيدون...وانتي ...
وردة...اني شنو...
زيدون...مرتاحة ...
وردة...الحمدلله شكو عندي ....
زيدون...اكيد ماكو شي ؟؟؟
وردة..لا طبعا ماكو شي ....
زيدون...عقدتي ....
وردة...اي الحمدلله ....
زيدون...ماشوفج فرحانة وردة ...
وردة...شنو لا بلعكس اكو واحد يهم روحه بهيج ايام بس اني ماحب ابين فرحتي لأحد اخاف من العين ....
زيدون...من عيني ....
وردة...لا مو قصدي عليك ...
زيدون...وردة اني اسف ....
وردة...هههههه ضحكت ضحكة حتى هو ظل صافن عليه ...
زيدون اطلع من حياتي وللابد واتمنى ماسمع عنكم شي بحياتي بعد لا انت ولا غيرك تفهم قصدي راح ابدي حياتي ولو متأخرة وان شاءالله انسعد...
زيدون....وردة اني ما دابرر شي لان مو وكت تبريرات بعد بس انتي محاولتي وتحجيلي الي صار ....
وردة...رجاءا زيدون اني هسة زوجة لانسان محترم جدا ولا يمكن في لحظة اقلل من احترامه أو افتح اي موضوع يأثر ع علاقتي بي وانت وغيرك صرتو ماضي ماريد أتذكره بأي شكل من الأشكال واتمنالك السعادة بعيد عني واتمنى حتى بلمناسبات ماشوفكم ولو حتى صدفه لان ممستعدة الماضي كله يأثر ولو بهفوة على حياتي الجاية الي راح ابنيها بأيدي وبدون اي تأثيرات من اي احد كان ...وانت صرت بلنسبة الية بقايا حلم وبمرور الزمن انساه ولا يجي ع بالي والي راح يشغلني حبي وحياتي الجاية وية الإنسان الي يستاهل فعلا ....اترخص تسمحلي عفته وكمت بس شنو كاعدة كباله وارجف بس احس كلبي فرغ وارتاحيت وسلمت المهمة هسة لكلبي حتى يستوعب حياته الجاية بدون معوقات من الماضي ...طبيت غرفتي اعصابي فد مرة متوترة كعدت اتنفس سريع لحد ماهديت وبجيت كومة لحد مارتاحيت صفنت الحمدلله كدرت اسوي شي ماريدهم يتشمتون بضعفي بلياهم بقيت بعد ولا نزلت بليل نزلت اكلت وصعدت جانت شهد جاية وهي مبتلشة بلعشا وصعدت نمت وغفييييت ولاول مرة محلمت بي وطلعته من بالي همين كعدت الصبح ملكيته طالع مرت ايامي اعتيادي بين تحضيرات العرس وبين سالي الي هم دتحضر لعرسها سولفتلها كيفت بلي سويته مهدي احتواني لان كبار وتفكيرنا ناضج ومضغط عليه بأي شي ولاجبرني ع شي ودائما نتفق يلة يتصرف حسسني بانوثتي وبشخصيتي وبكياني الي دمرتهم الفترة الي راحت ...كملنا كلشي وامي عزمت الدنيا كلها جماعة البصرة كلهم اجوي وسلوى همين صارت الحنة الكل ظل صافن معقولة هاي وردة محد مصدك وامي اطكطك حرمل ولازمة ورقة وابرة ومن عين فلان ومن عين علان خربتنا ضحك لعد شكو عزمتي الكل...لج معبالي هلكد تطلعين حلوة .. سلوى اجتي باركتلي مبروك وردة. ..الله يبارك بيج ...
مبين عليها مقهورة عبالها ترتاح من اخذته طلع مدمرها لان عارف كلشي وسامعها من شوهت صورتي كدامه وهو موقفه اتعس من صدك بيها وعافني وراد يضربني بيها وفعلا كدر وتذكرت كلشي بليلة عرسي ياربي شلون مراح اكدر انسى ...وراح يبقى زيدون غصة بكلبي حلمي وراح لغيري وراح بغدر الخيانة من اختي وصديقتي الي طعنتني بصداقتي بيها وعافني انزف وحدي لحد ما ماتت كل مشاعري اتجاههم ....
كافي لازم انهي كلشي بهوسة الحنة ورحت خابرت مهدي ردت اسمع صوته ردت اطلعهم من بالي وفعلا هو الوحيد الي كدر ...
وردة...شلونك مهدي. ..
مهدي...هلا يابعد بيتي ولج شطالعة سالي دزتلي صورتج. ..وهسة راح اعوف الهوسة كلها واجي اشوف عيونج. ..
وردة...وين صدك ...
مهدي...لعد منو يحني الاميرة. ..
وردة...مو خالة كالت اني احنيج متكدر انت تجي. ..
مهدي...بعد ماشفت صورتج وسمعت صوتج هسة لو اعرف اعوف عمري اليوم اني اجي احنيج.... ضحكت ....
ها ياعمري ليش تضحكين ...
وردة...وين جنت عني تاخرت هواية مهدي ...
مهدي...بس المهم اجيت مو. ..
وردة...اكيد ربي يحفظك الي واكدر أسعدك. ..
مهدي ..شوفتج هي الي تسعدني ياروح مهدي يلة حبيبتي انتظروني ربع ساعة واني يمكم. ..
وردة...واجة وحناني واحلى حنة خبلني بسوالفة وحركاته ...
ثاني يوم سوالي احلى زفة وتزوجت والحمدلله طلع اكثر من ماجنت متوقعته انسان وقور وخلوق اخلاق جدا عاليه وتربية فعلا تعبان ع نفسه شايلني من الكاع شيل طلباتي كلها منفذة عشت حياه حلوة وصارو عندي ولد اثنين والتهيت بحياتي وكدرت اطلعهم من حياتي كلها ومن يومها مشفتهم وماحاول اسأل عنهم ابد بس اسمع امي تحجي بيهم وسلوى صارلها سنة يم اهلها ميريدها وماخذ جهاله الكبار يمه ...
مهدي صارت حياتي وياه أسطورية ماحاول اخالفله رأي لان هو بلمقابل محترمني بكلشي وحياتي متخلو اكيد من بعض الهفوات الي ماخليها تطول وتأثر ع حياتي لان مهدي يستاهل مني كل خير..وكدرت اسيطر ع نفسي لان الي عدها مثل مهدي متفكر وميجي ع بالها غيره وصارو بلنسبة الي بقايا حلم آثاره انمحت باولادي وبزوجي ربي يحفظهم الي ....امين يارب

اتمنى تكون عجبتكم وعبرها ودروسها واضحة واتمنى استفاديتو منها شي ...
وردة اتمنالج كل الخير والسعادة وتفرحين باولادج انتي إنسانة قوية وكدرتي تتحملين كلشي وان شاءالله ربي عوضج بكل خير ....
تسلمون حبايبي ع ارائكم الروعة والمحفزة بصراحة ...

دمتم في رعاية الرحمن ....وانتظروني بقصة جديدة قريبا