#الضابط_واغتصاب_مراهقة

الجزء الاول

#الضابط_واغتصاب_مراهقة
بقلمي فردوس عبد اللطيف
الجزء الاول   القصة حقيقية
خير للإنسان أن يكون كالسلحفاة في الطريق الصحيح من أن يكون غزالاً في الطريق الخطأ.
ولدت في هذه الدنيا وياليتني لم أولد لم يكن اختياري حتى بيت اهلي وابي وامي واخوتي
هكذا يا اخواني نولد في هذه الدنيا ونجد أنفسنا مسيرين من اهل لم نختارهم ولكن هم من قرر أنجابنا ولكن هل كانت بحسابات بضمانات ام مجرد زياده في عدد الأبناء خير وبركه ...لا أنكر ان الأبناء رزق من رب العالمين ولكن هل نستطيع حمايتهم من غدر الزمن ام لم يكن بحساباتنا ما حدث
مرحبا انا (رنا ) الطفله المدلله لأسره متكونه من الاب
صالح ...العمل فيترجي (مصلح سيارات )
سهاد...الام العمل ربه منزل
الاخت الكبرى ...ريم متزوجه ولديها اربع اطفال
الاخت الوسطى ..اسيل مخطوبه وعمرها 17 سنه
اخي ثامر طالب بالمدرسه
رنا ... اخر العنقود الطفله المدلله عند اهلي حالتنا الماديه جيده وكل شي متوفر
أروي لكم حكايتي من عمر 12 سنه لان طفولتي مابيهه شئ مختلف عن اي طفل عاش بين أسره تسودهه المحبه والاحترام
بيت عمي فالح قريب علينا وابن عمي مهند بنفس عمري
يزورنا كل يوم تعودنا على بعض منذ طفوله مايمر يوم اذا مايجي ونتشاوف لحد ما صارت علاقتنا اكثر من الأخوه لان
من تصرفاته فهمت يحبني لكن ما معترفلي واني بصراحه مثل اي بنت مراهقة حبيته وانتظر جيته بفارغ الصبر
ثامر ...يوم ليش رنا ماتلبس حجاب كبرت وحاليا هي بالثالث متوسط الي بعمرهه تزوجن
ام ثامر ..يمه بعدهه زغيره شلاحكها تلبسها حجاب
ثامر ..انتو خربتوهه بدلالكم تالي منكدر نسيطر عليها
ام ثامر ...والله انت كانك غيران منهه لان مدلله
رنا ..ثامر عفية انت ليش معقد جاي تشوف الناس تطورت و
الحك البس الحجاب وبعدني زغيره
ثامر ...ولج لو بايدي البسج حجاب وعبايه
**************
طلعت من المدرسه وشفت كبالي مهند ابن عمي مبتسم
رنا ...ولج اريج هذا مهند واكف ينتظرني
اريج ..يمه الحب يمه باعي ابتسامته فدوه يضحكلج
رنا ..هلو مهند شجابك
مهند ..جاي ع ابوي ويضحك
رنا ..ابوك يداوم هنا ويانا
مهند ..دمشي امشي لج غير اخاف عليج من عيون العالم
رنا ..وليش تخاف علي
مهند .. كل هذا وانت ماتعرفين ؟
رنا ..دنكت واستحيت منه وصلنا للبيت تلكتني امي
ام ثامر .. هلا يمه روحي بدلي حتى نصب غده ترى يوم الخميس زواج اختج اسيل بعد هي عروس لازم ماتشتغل بالبيت وانت لازم تستلمين بمكانهه
رنا .. خلي ابدل وأسبح يا يمه استلمتيني بالواجبات
ام ثامر ..اي روحي  (بزر الكعده وبرر الشيب لو دللته ماهو عيب )
اسيل ..لعد اني بس الكراب علي من اتزوج واروح حاتعرفون قيمة وجودي
رنا ..انت روحي وطلعي منهه واني وماما نتفاهم
اسيل ..قصدج تقشمريهه ...حبيبتي ماما وتبوسيها وتقشمرين بابا هم ويبقى البيت هو سه ومحد ينظف
رنا ..هو منو عدنه منحتاج نظف البيت نظيف بس من تجي
ريم وجهالهه ندخل بالإنذار
اسيل ..تعالي ولج رنو اشو شفتج من الشباك جايه ويه مهند شنو السالفة
رنا ...شمدريني يمكن يحبني
اسيل .. هو اعترف ؟ لو بعده
رنا ...اووو بعده عبالك ينتظر ياخذ خيره كلما يجي يمي ويريد يحجي اشوفه يرتبك وتتخربط احواله ..واليوم واكفلي بباب المدرسه ويكول احميج
اسيل ..هذا مبين واكع بالحب
رنا ...خلي اروح اسبح لا يجي ويشوفني مكفشه
اسيل ...روحي عيني روحي
كعدنه اني واسيل نحظر الشنط واغراضهه دمعت عيون امي وظلت تبجي
ام ثامر ..يمه حاتعوفيني وترحين يم الرجال لحد الان اتذكر يوم جبتج وانت ناعمه وترضعين كوه ..يمه كبرتي وصرتي عروس شبسرعه ولج يايمه البيت وحشه بدونج
اسيل ..حظنت امي وبقينا نبجي وكاني أودعها
      يمه ترديني ابطل ما اتزوج اكيد اجيلكم
ام ثامر ... يمه تجين خطار كل ست اشهر هاي اختج ريم من تجي جنها غريبه علينه والرجال صار اهلهه
الله يسعدج بنيتي هو هاي البنات الاهل تربي والرجال ياخذ عالجاهز ....ما اوصيج بنتي كوني زوجه مطيعه وراح تعيشين ويه عيال لاتدخلين بحياتهم خليج بعيده عنهم وعن مشاكلهم
اسيل ... صار يمه اني معلي اكضي شغلي واروح لغرفتي ومعلي باحد
رنا ..كلبتوها مناحه الناس تفرح وتغني وتركص واحنا نكضيها بواجي تعالي خلي نرتب اغراضج تالي يكولون اغراضهه ما مرتبه
رنا ...كملت اختي ترتيبات العرس وامي سوتلها حفله حنه
بيوم حفله الحنه لبست فستان بنفسجي فاتح لأني بيضا ويرهملي ورحت للصالون ويه العروسه ومن رجعنا للبيت
شفت مهند واكف يم الباب ويحجي ويه اخوي ثامر من نزلت من السياره مهند ظل يباوعلي وعيونه مشالهه من علي واني من خجلي دنكت ودخلت ردت اعثر همزين لزمتني اختي اسيل هاي عود هي العروسه ولازم ترتبك ...بصراحه كنت لابسه كعب عالي وهاي اول مره عود للكشخه لان الفستان طويل همزين ماتفشلت
الحفله كانت حلوه صديقاتي جابو دي جي وأغاني ردح واحنا البنات ماصدكنه ركصنا لحد ما تعبنه وجابو الحنه وحتى العروس واشتغلت الهلاهل
باوعت عالممر شفت مهند بأشرلي تعالي وره البيت
نزعت العفو حذائي لان رجلي ورمو من الكعب العالي ورحت ركض وره البيت
رنا ..هلو مهند رايد شي ؟
مهند ..لج هاي شطالعه اليوم حتى الكمر زعل وما طلع
رنا ..هاي شنو اليوم تحجي غزل
مهند ..انت حركتي مشاعري اليوم جمالج ما ينوصف
      رنو اني احبج وانت ما تتزوجين غيري
رنا ..اشلون يعني ما اصير لغيرك
مهند ...مثل ما اكولج انت من نصيبي والي يفكر يتقربلج اقتله فهمتي
رنا ..انت شتحجي كلامك قوي هو هذا نصيب محد يعرف وين نصيبه
مهند ..اني اكولج انت نصيبي ومحجوزه الي واني ابن عمج من حقي احجزج وانهي عليج ..يعني اذا تقدملج واحد وانت توافقين ادخل وأنهي عليج مسامعه بالنهوه (معناها ابن العم يحجز بنت عمه ويمنعهه تتزوج غيره )
رنا ..الله وانت تعرف ماعندي غيرك  واني الك انت (انا كلي ملكك )
مهند ...اي هيج اريدج
ثامر ..هاي شتسوون هنا ليش خاتلين
مهند لا مخاتلين
ضربني وجرني من شعري ولزم ايده مهند
مهند ..عوفها مثنى ليش تاذيها هي ويامن واكفه وبعدين بس جاي نحجي
ثامر ..تختلون وره البيت شعدكم وظل يصيح
ام ثامر ..ولك ثامر تريد تسويلي فضيحه ونسوان عمامك كلهن هنا وراح تصير سوالف بسبب صياحك
ثامر ..شعدهم هنا يمه
ام ثامر ..يمه مهند روح وبعدين نتفاهم وانت رنا روحي لغرفتج لا احد يشوفج مكفشه وبدلي ومشطي كفشتج وتعالي يم النسوان
رنا ..صار يمه
ام ثامر ...ابني شويه اهدأ وعوف العصبيه وذولي جماعتك المسربتين جايبهم بره روح وديلهم عشا خلي يولون
ثامر ..ما اريد اشوف مهند هنا بالبيت
ام ثامر ..صار يمه يجرالك
رنا ..رحت لغرفتي ابجي جتي اسيل بوستني
اسيل ..ام دميعه كافي بجي لا تقهريني واني لابسه عدسات ومن ابجي لازم انزعهم وتالي يكولون العروسه قشمرتنه ولابسه عدسات ورموشي حاتوكع
رنا ..ضحكت ...
اسيل ..وتالي يرجعوني عليكم عيالي
رنا ..قابل انت مثل ذني الي يخلولهن مكياج ومن يمسحو يطلعن يخرعن ...لج مهند اعترفلي بحبه وكلي احبج
اسيل .. الف مبررروك اهلهل ليش دكولين اخرع  اني اخرع
رنا ..لا لا انت تخبلين بدون ومع المكياج وضحكنا مشطتلي تسريحتي ولبست فستان قصير واسيل عدلت مكياجها ونزلنا نضحك كدام النسوان
امي من شافتنه ارتاحت بس دمعتهه بعيونهه ومن تباوع على اسوله تطفر دمعتهه مو بايدهه غصبا عليهه
اليوم الثاني كلنا مخبوصين والعروسه وراها تحظيرات اليوم حاتروح لعش الزوجيه هذا اسمه لكن اعتقد اسمه سجن الزوجيه لان هذا مجتمعنا وتقاليده وعاداته المراءه خلقت لخدمه الرجل سواء اب او اخ وتالي يستلمهه الزوج لاخر يوم بعمرهه هكذا هي حياتنه وهكذا هو نصيبنا وعلينا تقبله ...  ولا و المطلوب من العروسه ان تفرح لانهه حا تتزوج وتحتفل لخدمه سجانهه السيد المطاع
اخوي ثامر ماحجه وياي ولا كلمه بس يخزرني بيومهه مهند ما شفته بس واكف بالشارع اعرف ثامر منعه بس هو ميصبر اكيد حا يتحجج حتى يدخل للبيت مثل قبل
اجوي سيارات الزفه واخذو اسوله وساعه طلعتهه من البيت دموعنه نزلت بدون توقف امي تبجي واسيل اول ما وكفت حظنت امي وظلت تبجي وسالت على ابوي
رنا ..بابا بغرفة الخطار
راحت اسيل وحظنته
اسيل ..بابا ابريلي الذمه بوست راسه
ابو ثامر ..ظل يبجي ..الله معاج بنتي ربي يسعدج ومكدر يكمل الكلام الموقف كان صعب اخذهه زوجها وطلعت اسوله من البيت ورحت معاها ودموعي ما توقفت لان اعرف هاي طلعت اختي من البيت معناها حاتصير غريبه وتجي مثل الخطار ...مثل اختي ريم
اخ يا دنيا نتعود عالعزيز ويذهب الى طريق المجهول لا احد يعرف هل هو السعاده الدائمه ام التعاسه والعبوديه اذهبي الى حظك يا اختي ربما يكون دار السعاده
كملت الحفله وزفوهم ورجعت مع اختي ريم وزوجها وصلوني للبيت من دخلت الكل كان حزين الهدوء يعم البيت
رنا ..ثامر وين امي
ثامر ..بغرفة اسيل
رنا رحت لكيتهه كاعده عالسرير وتبجي من شافتني مسحت دموعهه
ها يمه رجعتي
رنا ..لا بعدني هاي روحي
ابتسمت وحظنتني
ام ثامر ..ولج يمه الله ياخذ روحي ولا اشوفج تطلعين من البيت وياخذج الرجال من عندي
رنا ..لعد منو يطبخ لخطيبي من يجي تردين تنهزمين
يمه نامي وارتاحي هذا مصير كل بنت لازم تتزوج واذا ماتتزوج كلتو عنست وكعدت على كلوبنه
ام ثامر ..مدري منين تجيبين هالحجي
رنا ..روحي نامي ترى بنتج هسه بحظن زوجها
ام ثامر ..ولج استحي احنا بعمركم جنا نختل ومنعرف نحجي
رنا ..هذا عصر التكنلوجيا
صحيح اول اسبوع كان وحشه مكان اسوله خالي لكن الله اعطانه النسيان نعمه بدينا نتعود بحياتنا بدون اسوله والشغل صار براسي بعد ما كنت معتمده ع اختي واتحجج بالدراسه صار البيت كوله براسي والشغل والدراسه صعب الواحد يوفق بينهم هذا غير ابن العم مهند حبيبي كلما يطلع ثامر يجي للبيت ويكعد ويانا تعودت عليه وصار هو الحبيب والقريب والصديق
اليوم المشؤم
كنت بالثالث متوسط داومت بالمدرسه بس عندي شعور غريب بداخلي كنت مخنوكه بدون ما اعرف السبب حتى ما ردت اروح للمدرسه بس كان عندي امتحان
امتحنت حتى ما جاوبت بالامتحان رجعت للبيت وخطواتي بطيئة شفت هوسه بباب بيتنا وعمامي ملتمين اريد بس أوصل وادخل للبيت واشوف شصاير لكن المسافة صارت علي ابعد من ما أتصور ...دخلت للبيت واشوف امي كاعده بالارض تصرخ وتلطم واخوي ثامر لازمهه اخواتي موجودات
رنا ..نزلت دموعي بدون ما اعرف منو مات
ام ثامر ..ليش عفتني يا ابو ثامر استعجلت الرحيل بعدك يا ابو جهالي
رنا ..بابا لا لا بابا لطمت وكابلني خواتي وبدون شعور ولكن هل ينفع هل يعيد والدي للحياة ولكن من قهرنه لان الموت مابي رحمه ياخذ العزيز بلحظه سواء كنت مستعد ام مشغول بالدنيا وتلاهيهه
بكيت حزناً للفرقا. أبي سأنتظرك إلى أخر لحظة في حياتي وسأبكي حتى تجف دموعي فقد تورمت خدودي وقاربت على الجفاف دموعي سأنتظر وأنتظر وأنتظر رغم أني أعلم إنك لن تعود ولكن.. ليس بيدي حيله فقد أحببتك حباً لا يتصور ولا يعرف مداه إلى من خلقني فقد أشتقت إلى ضحكك وصدرك وصوتك وكل شيء فيك لا يمر يوم بدون أن أتذكرك وقد ضاق قلبي.
تخربطت امي ونقلوهه للمشفى
  يتبع
************بقلم فردوس عبد اللطيف**********