Deja Vu

مقدمة

انا احمد عندي 22سنة طالب في كلية علوم جامعة القاهرة ساكن في سراي القبة عايش لوحدي بعد الحادثة الي حصلت من 3 سنين تحبوا تعرفوا عنها اكتر ؟
كان يوم عادي جدا في شهر فبراير السما مطرت تلج اه تلج والله ما بهزر كان والدي سايق بينا علي طريق قاهرة اسكندرية و الدنيا كان كلها تلج و الطريق مش واضح فجاءة دون مقدمات و انا قاعد ورا في العربية حسيت ب اضطراب في مخي و بدأت احس بحاجات عجيبة من حواليا و كانت فاكر كويس اني شوفت علامة طريق اسكندرية 20 كم ،بعدها بلحظات لقيت عربية نقل دخلت فينا .
صحيت من الفزع لقيت ان احنا لسه في العربية ، كأن المشهد بيتعاد تاني ،و لقيت علامة الطريق نفسها لسه هبص ل والدي و احذره للاسف العربية كانت خبطتنا . صحيت في أوضة العمليات، محاليل متعلقة و ضمادات و حاجات كتير واضح ان الحادثة كان اثرها كبير عليا
بدأت ابص حواليا مفيش حد معايا في الاوضة كنت فاكر هيحصل زي الافلام لما اصحي هلاقي ناس كتير واقفين حواليا مستنين اللحظة ديه بس للاسف احنا في ارض الواقع .
بدأت افتكر شوية حاجات من الحادثة دم في كل حتة صراخ مش عارف مصدره قطع الزجاج الي علي ايدي كانت عاملة زي حلم بدأت اقوم من السرير شوية فكيت ابرة المحلول الي في دراعي و نزلت وقفت علي الأرض و منغير هدف رايح ناحية الباب و بفتحه اه هسيب المستشفي و امشي انا كنت عارف ايه الي حصل بس بحاول اعمل نفسي عبيط .
عارف ان هيجي الي يقولي اهلك ماتوا في الحادثة الخ الخ محستش ب صدمة ساعتها بس مشاعري مكنتش جامدة كنت زعلان بس مش مصدوم استسلمت للموضوع بسرعة .
تقريبا عشان انا شوفت ده قبل ما يحصل .