بالليل عالساعه ثمان قامت خلود الكسوله م النوم وقالت بقيس نبض حسوون ...غسلت وجهها ونزلت بشويش ودخلت الصاله وهي ترجف لقت الكل جالس بالصاله ويضحك وم ضمنهم حسين اخوها مرتاح ويسولف وعادي مو مبين انه زعلان تطمنت وراحت ورمت نفسها بينهم بالكنبه بقوه ..
امها : بسم الله عليك يابنتي اركدي واجلسي بشويش زي البنات
اختها احلام: خلود الظاهر مافي امل تعقلي وربي
خلود ناظرتها بحده: مابي اعقل احب شخصيتي ذي ..اجل تبيني اكون زيك ماباقي فرق بينك وبين هيفاء وهبي
الام بقهر: عيب يابنت لا تقارنين اختك بذيك الفاجره ...اعوذ بالله
احلام تضحك وهي تخز خلود: سمعتي ياعبيطه
خلود وتلف وجهها منها: خلينا منك انتي... ولفت لحسين اخوها: الا اقول .. حسون ف حد كان عندك اليوم
حسين مستغرب سؤالها: وانتي وش دخلك
خلود تورطت: لا بس العنود قالتلي ان حسين عنده ناس
حسين بابتسامه: لا بس كان عندي رفيقي وشهو ناس ...عزيمه هي.. هالعنود ملجوفه
خلود بقلبها ياويل حالي ويازينهم هالناس بس..
امها تسولفها: الا اقول يمه وش منومك لذا الوقت مو زين عليك تمرضين بعدين
خلود بابتسامه: عادي يمه انا بخير واحسن منك بعد
الام بسرعه: بسم الله عليك.. لا يبنتي مو بزين كذا اخاف تعاينين نفسك
خلود بابتسامه: تطمني يمه ماراح اعاين نفسي وبعدين احنا كذا ببريطانيا اي وقت يجينا نوم ننام مانحسب للوقت والحمدلله احنا بخير
الام بققت عيونها: اثر البنت م غير امها ماتسوى وقت العصر والمغرب لاحد ينام هالوقت يكون وقت مرض ويكسر الجسم
خلود تمشي: طيب يمه مايصير خاطرك الا طيب
/
/
عند يزيد انصدم لما قالتله امه انهم بيزوجونه بنت خالته ويزيد عصب وصارخ عليهم وكلم ابوه انه يبي يتزوج وحده م اختياره وابووه حطه بالامر الواقع وقاله ان ماتزوج هالبنت لا هو ولده ولا هو ابوووه واحرجه واضطر يوافق ع زواجه م بنت خالته الي كان يعتبرها زي اي وحده م خواته ... وسووا ملكه وخلاص.. كان يقول بخاطره حوبة البنات الي لعب عليهم انه تزوج وحده خاطره مو فيها ...(وبعدك ماشفت حاجه يايزيد)
نزل م غرفته ودخل الصاله عند امه لقاها تشرب قهوه وتطالع التيفي ع مسلسل هندي .. باس راس امه وجلس جمبها: شخبارك يمه
الام م غير لا تناظره بالها مع المسلسل: اهلين ياحبيبي كيفك انت
يزيد بملل: يمه وربي مابيها ليش تغصبوني عليها
الام ناظرته معصبه: وش فيها بنت اختي ترفضها... انت ماراح تلقئ مثلها وراح تتزوجها باذن الله
يزيد بعصبيه: طيب لييه انا .. شوفي عبيد نويف بس انا ما ابي انا توي جيت م بريطانيا تلصقون فيني زواجاتكم
امه بحب: يايزيد انت اكبرهم وانا ابي افرح فيك وازوجك واشوف اولادك
يزيد نزل راسه: بس انا احب
امه بققت عيونها: حنا ماعندنا هالسوالف وهالحب خليه لنفسك خطبنا لك بنت ولا كل البنات البنت ...عاقله ورزينه وجميله واذا شفتها راح تنبهر فيها وراح تناسبك ياوليدي توكل ع الله وتزوج...راح تحبها بعدين
يزيد بحمق سكت ولا تكلم وع طول قام لغرفته.. وهو ماشي نادته امه: ماتبي قهوه
يزيد وهو ماشي: مابيها نفسي مسدوده
ووطلع وقلبه مليان قهر ومو قادر يستوعب انه يتزوج م وحده مايحبها ونفس الشي بالغصب كان يقول بنفسه والله اني احبها ما اقدر اكذب اكثر م كذا واقاوم احساسي اني ماحبيتها ياليت اتزوج بكيفي وادورها بكل السعوديه لين القاها واتزوجها... اه يالقهر ربي يسامحكم بس يا ابوي وامي
