لصمتي حكايه بقلم شيماء المشهداني

الجزءالسادس

الجزء السابع عشر
لملمت غراضي وحظرت نفسي للزواج .. حنه ماسويت لان السنويه مال بيبي بعدها مطالعه .. وكالوا العرس نسويه بس بهدوء ..

وبيوم العرس جابتلي البدله عمتي وجانت ابد محلوة رغم عمتي عدها ذوق وتحملت كلت خلي اعدي هالامور ماتسوى ..أما الصالون جان صالون عادي حتى مكانه وصخ ..
كلت اني حلوة اكيد  اطلع حلوة واني هم وجهت ام الصالون واختاريت لون المكياج والتسريحه ..اجا اخو رافد  اسمه رعد و رجعني للبيت وكال نص ساعه وتجي الزفه .. مجنت عازمه  احد وحتى عشاء او فندق ماكو بس اختي وامي  .. اجتي الزفه حتى زينه للسيارة ممسوين هم مشيتها كلت يله هاي شغلات عاديه بس هي مو عاديه بس شسوي اريد اسكت روحي دخلو للبيت ساكتين كعد بصفي شويه وكال  كومي اجا رافد وكال كومي ..
عمي سمعه وكال  رافد اوكف
ها خالو ..
سارة ما تطلع اله بهلاهل ..
عمتي كالتله شلون امي مطالعه السنه مالتها..
كلها مثل ما كتلكم البنية ما طالعه مكسورة لازم تطلع من بيت ابوها بهلاهل اخويه بنته متطلع بسكوت الناس متعرف حتى اكو عرس اله بصوت الهلاهل..
كامت تبجي عمتي وعمات رافد فرحوا وخبصو الدنيا هلاهل وهوسات وطلعنه سلمت على بابا والدمعه بعيني وصعدت بسيارة ولزم ايدي رافد .. 
  ووصلنه لبيت اهله كعدو يهوسون ويركصون وبعدين زفونه احلى ليله عشتها فزيت الصبح اباوع علية صفنت يمممممه حبيبي يمي كعدت الزم بوجهه  وفز هو علية ..
صباح الورد على احلى وردة بدنيا ..
صباح النور ..
وامي جابت الريوك وتريكنه بقيت عايشه الفرحه لحد اليوم الخامس كاعدين اني ورافد  وكاعد نسولف اجتى أخته مي   تنظف بوقتها جان شتاء ورادت تنظف الزوالي..
  مي  خلي اني انظف .. 
لا لا اني ..
ورجعت كعدت يم رافد مرت 10 دقائق اواكثر .. اجتي اخته شمرت المكنسه بقوة وطلعت ..
  رافد باوع عليه وكال ..
هاي شبيها ..
ما اعرف اشبيها..
عمتي جانت بالسوك اجتي واسمع مي  تبجي وتكول لعمتي رافد من يوم الي عرفها اخويه مايحجي ويايه اخذت اخويه مني..
وعمتي تكوللها ماما ياله لاتنقهرين هسة احجي ويه اخوج لا تبجين وافتهم منه..
اني ما تقصدت اسمعهم بس هما صوتهم جان عالي وبيتهم صغير فا اكيد اسمع.. رحت للمطبخ جان اكو مواعين كلت خل اغسلهم .. نظفت المطبخ  و اجتي مي مردتها تحس انه اني سمعت شى ..
مي وين اظم هاي المواعين ..
هسة اني اضمهم..
ورة دقايق اجتي عمتي دخلت للمطبخ كامت تصيح منو مخلي المواعين هنا..
وعمتي كامت تشمر بالمواعين كسرتهم كلهم ومي  كالتلها سارة غسلتهم ومتندل وين تحطهم صاحتني ..
ساررررررة اجيت والرعب بكلبي..
ها عمه ...
لمي الكزاز ومرة ثانيه لا تحطيهم على السنك..
عمه والله جنت ما اندل مكانهم ..
كافيييي يله نظفي..
اول ما مديت ايدي على الكزاز داست عمتي  على ايدي وراحت حسيت الدنيا اظلمت من الالم هم رجلها وهم كزاز جوه ايدي .. رافد جان واكف بالباب يم جماعته ..
مي اجتني تركض وايدي غركانه ايدي وابجي من الالم جابتلي شاش وكطن ..
  كالتلي اصيح رافد..
كتله لا عوفي ..
وراحت هي تلم الكزاز كمت ابجي ما اعرف ابجي بحركة على حظي لو الالم الي بية وره اشوية دخل رافد  راسا انتبه على ايدي..
هاي شنو اشبيج ..
بس ماعون نكسر ومن شلته انجرحت ايدي ..
امشي اوديج للدكتور..
ميحتاج حبيبي والله بسيط ..
بس هو ما جان بسيط لليل ايدي احس بيها حركه ما جرح بس عفته لان اذا افتح الشاش ويشوفه رافد راح يعرف انه هاي مو مال شلت ماعون وانجرحت..

نمت بليل واني افكر ياترى عمتي راح تبقي هيج راح تكرر ويايه هذا التصرفات  واني بعدني عروس..
مي جانت طالبه مدرسة اجتب الصبح ودكت الباب  علينا ..
فتحت الباب ..
وينه رافد خلي يكعد يوصلني ..
اني كتله ..رافد خطيه كوم وصلها البنيه راح تتأخر ..
كال رافد .. ها التميتوا عليه واني نعسان
فز من فراشه غسل.. ومي نزلت جوة تنتظره ورافد غير ملابسه ونزل .. 
نزلت وراهم كلت خلي اكعد فدنوب واشتغل واحظر شي للغدة .. 
  صاحني ابو رافد من الصبح..
ها عمو .. 
ليش بجيتي البنية اعتبريها اختج..
عمو يابنية ..
شوفي بنتي مي الوحيدة عندي كلشي ولا اشوفها تبجي.. 
واني شنو سويت الها ..
تكولليها اخوج نايم ومتقبلين تكعديه حتى يوصلها ..
ضليت متعجبه وأبو رافد حتى ميسمعني اذا حلفتله ..
  اسفة عمو ..
نظفت البيت  ورافد راح للشغل جان عدهم محل مال انشائيه كلي راح امر ابقى بي لان اخوته اثنين بالمدارس او واحد راح يسوك وابوه تعبان.. بقيت ابجي بالغرفة..
  حتى غدة ماتغديت اجه رافد بالليل عرف عيوني مورمه ..
اشبيج سارة ..
  ماكوشي  بس اشتاقيت لاهلي..
صارلج 6 ايام يمي اليوم ذكرتيهم وبعدين هما باجر جاين باجر مو السبعة .. اي ما اعرف شبيه ..
حظنته وكمت ابجي بحركه ..
  كوليلي دموعج هاي مو مال مشتاقه لاهلج..
اكولك بس لا تتعارك ولا تهوس..
شكو ..
كتله على كلشي..
راد يتعارك كتله الله عليك اني بس اريد احجيلك لان اموت من القهر بس اسمعني ما اريد تتعارك..
لكن ما سمعلي راح على مي ..
مي كوليلي  شوكت سارة ما خلتج تكعديني مو هي الي كومتني بس انتي تردين احد ينقهر عليج مسكينه انتي ..   كامت تبجي وتصرخ وتكوله اخذتك مني وعمتي كامت تحجي علية تكولي ما كفاج اخذتي اخوها منها وهسه تخلي يصيح عليها ..
عرفني من شافني باجية وبعدين ليش اكذب اني ما منعتها من اخوها ليش تجيبلي المشاكل..
كالتلي والله يعني انتي هسة ما بعدتي عنها رافد ..
صاح رافد  امشي ما اريد اسمع ولا كلمه رحت وياه للغرفة نام راسا كعدت الصبح اجتي مي اعتذرت مني..

وعمتي هم كالتلي لا تزعلين مني بس لان مي  الوحيدة ما اكدر اشوف ادموعها.. 
كتلها ما صار شى انتي مثل امي ومي مثل اختي..

نزلت انظف لان بعد كم ساعة اهلي راح يجون نظفت وكملت وطبيت سبحت وتمكيجت راحت عمتي جابتلي بدله لونها برتقالي فاتح مشجرة ب اصفر واجو اهلي سلمت عليهم وفرحت بشوفتهم ..ودخلت اني واختي للغرفة علمود تمكيجلي وحجيتلها كلشي كالتلي سكتي لا ماما تسمع والله تاخذج هسة ومتبقيج يمهم ..
للحكايه بقيه