لصمتي حكايه بقلم شيماء المشهداني

الجزءالسادس

#لصمتي_حكايه
القصه حقيقيه
بقلم..الشيماء
الجزء السادس..
الناشربارق العراقي
......
...صار يجي علينا دائما رافد .. ومن يجي بيني وبينه بس نظرات .. مر شهرين على كلامه وياي ..
وعمتي ام رافد اتصلت بوالدي وطلبت منه انه تجي يمنا هي واولادها بسبب سوء الوضع بمنطقتهم ..
اخت رافد اسمها مي كالت الي ...
اني اعرف الي بينج وبين اخويه رافد ...
سكتت ماحجيت شي وياها .. رغم الي بيني وبينه بس نظرات ..
بقوا يمنا شهر تقريبا وهو يراقبني ويباوع عليه شاتصرف الى  ان بيوم كتله كافي تباوع عليه .. لو تخطبني لو تشيل من عينك عليه ..
وهو ماقصر راسا فاتح عمتي وخطبتني من اهلي ..
فرحت هواي خاصه من والدي وافق
  بشكل حسيت الدنيا من دونه ما تسوه شى ..
وتفاجات أنه حجوا بالخطوبه وراسا كال رافد نتزوج .. من كالي على الزواج استغربت .. 
  شلون وبيتكم صغير وين نزوج بيتكم  75 متر هو غرفة وصاله ومطبخ بس  وين نزوج اني وياك ..
معليج اني ادبرها ..
وبعد ايام اجتي عمتي كالت لوالدي رافد يريد يتزوج ..
وين يكعدها انتو ماعدكم مكان ..
  يبقون اسبوعين  يمنا واعوفهم بالغرفة واسبوعين يمكم لحد ما ربك يفرجها وابني غرفه اله..
جانت عمتي تفكر بغرفه  عدنا بيت اهلي غرفة فارغه حتى نكعد بيها  ..
والدي خجل يرد أخته خاصه وهي كالتله احنا اهل مو غربه ..
وافق والدي .. لكن اني ممقتنعه بس سكتت ...
امي صارت عصبيه أو رفضت ..
ام ساره هي بتنا وهو ابن اختي ..
  اني ممتثاقله بنتي  واخليها بعيوني  بس  ما اريد الناس تكول لزكولها زواج كوة غير غرفتها ومكانها..
ابن اختي ويجي ويكعد ..
بس والدي كال الغرفه الاخشاب متتنصبوها بيتي .. من تنبنون الغرفه نصبوا اخشابها ..

امي اخذت موقف من والدي وانقهرت بس والدي من يكول كلمه خلص واذا امي عارضته يعاندها .. 

بديت اتحظر للعرس لكن اني  محتارة  بين مقتنعه بالوضع هذا وبين لا مامقتنعه ..
اخويه عمر خطب وخطيبته اسمها سرى  حبابه  وحلوة جانت  وضلت امي تحظر للعروس الجديدة وخطوبتها لو تحتار بموضوع زواجي .. لكن والدي فرحان بزواجي بابن أخته ..
عمر وفر لخطيبته كل شي  .. واتفقنا خطوبته الخميس  والاربعاء بالليل اتصل بيه رافد ..
سارة راح نجي نلبسج الذهب..
يا ذهب رافد  اني مخبوصة بنيشان عموري..
ولج هي نص ساعة ونروح..
هذا هو تعالوا ..
اجت عمتي لكن وجهها مكلوب  جابتلي  زنجيل رفيع وبي مداليا دمعة وترجيه وحلقة اني حسيتهن اغلى شى عندي لان من الانسان الي احبه وجان هو فرحان  ..
عمر اشترى لخطيبته  اساور ومحبسين وكلاده وتراجي .. كلنا فرحنا بخطوبته ..
اجا رافد بخطوبة عموري وكال ..
  تدرين ليش اجينا البارحه نلبسج الذهب.. 
ليش ..
لان اخاف تشوفين ذهب الي جابة اخوج لخطيبته وتنقهرين  واني ما عندي امكانية اجيبلج الشي الي يليق بيج ..
ما بعيني شي بس الي جبته الي اني حبيتك الك مايهمني  الفلوس والذهب  و الي تكول عليهم مايليق بيج  اني احس بيهن عبالك جايب الدنيا كلها ..
ابتسم بوجهي وكال ويسالوني ليش تحبها ..
منو سالك هالسؤال ..
بعدين احجيلج ..
وخلصت الحفله وجان ميقبل احجي أو افرح أو اركص..
لبسي جانت عبارة عن نفنوف طويل وحجاب وكلهم بدلو فساتين مال حفلات تخبل بس كلت ما دام رافد يحبني وميقبل البس بس نفنوف  خلص ما البس الا  الي يريدة هو ..