لصمتي حكايه بقلم شيماء المشهداني

الجزءالرابع

#لصمتي_حكايه
القصه حقيقيه ..
بقلم .. الشيماء ..
الجزء الرابع ..
الناشربارق العراقي
مرت فترة طويله وسامر ميقبل اروح لاهلي.. مر ثلاث شهور تقريبا واني ما شايفتهم واهلي هم كطعوا من ورة تصرفاتهم ..
وجنت كلش اشتاق الهم وبيوم جنت تعبانه كلش وحطيت راسي ونمت من تعب البيت والشغل .. واني نايمه حسيت اكو شي جوايه كمت حتى اعرف اشبيه واشوف روحي غركانه بدمي..
جان سامر نايم ..
اكعد سامر ..
شكو اشبيج ..
كوم شوف شصار بية ..
خير شبيج ..
شاف النزف راح على اسراء يركض صحاها من النوم .. اجتني اسراء تركض كومي سارة ناخذج للدكتورة ..
كمت اغسل واني دايخة كلش دخلت للحمام متحملت صحت اسراء عفية راح اوكع دخلتلي وغسلتني واخذتني للدكتورة ..
فحصتني وكالت صاير حمل عدها ويمكن صار اجهاض بس سويلي سونار رحت سويت سونار كالتلي دكتورة السونار ما مبين عندي اكو حمل روحي سوي تحليل لهرمون الحمل لان هو يبقى بالجسم 40 يوم رحت اسوي تحليل كالولي ابو التحليل طالع رجعت للبيت واني تعبانه كلش كالتلي اسراء باجر ناخذج عود ارتاحي اليوم ضليت نايمه وتعبانه ..
وثاني يوم كتله سامر اريد اروح احلل..
ليش شتسوين بعد نزل الحمل ..
غير اعرف جنت حامل لو لا .. و يجوز مو حمل غير اعرف سبب النزف ..
ميحتاج ترحين للدكتورة لاتلحين ..
سكتت لان اعرف الكلام وياه لا يقدم ولا ياخر ..
بقيت مشتاقة لاهلي واشتغل وابجي عليهم ..
وبيوم اجتي اخته المتزوجه اسمها حنان سلمت عليه وكالت ..
سمعت بيج كلش انقهرت عليج شجاج كتلها ما ادري فجأة هيج صار بية..
اسراء مرت حمايه كالت الها .. لا مو فجأة من القهر لان سامر حارمها من اهلها ..
باوعت علية حنان .. يعني شنو حارمج فهميني ..
صارلي اكثر من ٣ اشهر ما شايفة اهلي..
وليش ..
حجيتلها الي صار..
صاحت بصوت عالي ..
سامر وينك ..
وهو جان كلش يحترم خواته..
اجا سامر ..
ها حنان ..
صدك هذا الي سمعته من اسراء انت حارم البنيه من اهلها.. والله هاي بنت اوادم تحملتك منو اليوم تتحمل احد يمنعها من اهلها وتسكت شوف داكولك اذا متوديها لاهلها هاي الايام ترى اني اخذها وبعد ما اخليها ترجع الك دمرت البنيه جانت مثل الوردة وذبلت بين ايديك ..
صار اوديها ..
اسمعي سارة اذا ماوداج لاهلج كوليلي ..
لا صدكي راح اخليها تروح وتبات ..

حنان بعد ماكالتله وديها لاهلها .. وداني لاهلي وحسيت طلعت من سجن مؤبد مدى الحياة .. طبيت لبيت اهلي جنت كلش فرحانه وكل شي ما حجيت الهم لان اريد استغل كل لحظة حلوة وياهم ..
وراح وعافني يمهم وتحررت منه ومن اهله ومرت يومين واني يمهم واجه سامر ياخذني وكأنه اجه ملك الموت يأخذ روحي ..
جنت احاول بكل طريقة اتأقلم وياه واتمنى اعيش احساس الأمان وياه كزوج واعيش مثل أي زوجه ما كدرت جان بعيد عني بكل شي حتى احساس الانوثه بداخلي قتله وقتل طفولتي وكياني .. وبقيت على ذمته شي شكلي لا اكثر ولا اقل ..
ورجع على طبعه يضرب ويهين واني ساكته .. وبيوم جان زعلان ولحد الان ماعرف شنو الي يرضيه أو يزعله ..
اجيت علية كلت احجي وياه بلكي يتغير أو يحن عليه ..
تريد اسويلك شي ..
باوعلي بنظرة حقيره من نظراته ..
شنو تتحارشين بية..
اني ظحكت.. وحبيت اغير الجو .. وليش لا حبيبي ورجلي وما اتحمل اشوفة زعلان ..
جنت اتصرف وياه بعفويه وهو جان يتصور اني ماعندي كرامه ورخيصه ..
تعالي يمي ..
اجيت يمه .. نعم .. واني مبتسمه بوجهه حتى يتغير الجو ..
لزمني من ايدي بقوة ..
اني اعرف شنو الي ترديه وجاية علية ..
كمت اصرخ من لزمة ايدة حيل وجعني .. وواخذ غايته بالضرب والاهانه ..
حسيت روحي رخيصة كرهت روحي بيومها وقررت بس اروح لاهلي ما ارجع اله بعد ..
نزل جوه وبقى ينام جوه يم امه وكم يوم واتمرض واخوانه اخذوه للدكتور طلع عنده التهاب الامعاء الحاد .. و مهما يكون هو زوجي ويجوز يتغير من يشوفني مهتمة بي نزلت جوه انام يمه بالكاع حتى إذا يحتاج شي اني يمه.. وامه كالتلي ..
انتي ليش متصعدين تنامين فوك اني ااريد اداري ابني واهتم بيه ..
خاله شلون اعوفة وهو مريض ..
حاولت وياه بكل الطرق وهم مايهتم ولا حتى يحجي وياي ..
كمت احس بروحي عندي انفصام الشخصيه ( شيزوڤرينيا ) شخصية تكولي اتحملي انتي تحبيه وكلمة مطلقة محلوة بحقج وحق اهلج والمجتع ميرحم وحتى لو هو السبب راح تكونين منبوذة كدام الناس ..
وشخصيتي الثانيه تكول ..
لا العمر مرة مو كل يوم تعيشي انفصلي عنه وانسي وعيشي حياتج بعدج صغيرة ..
جنت افكر واكول الى متى ابقى هيج واعيش هاي المعاناة واني بعدني صغيره ..
وبيوم جنت جايبتله الدوة مالته ونطيته ألمي والكبسول طلعتهم من الشريط باوع على الكبسول وكام يصرخ بوجهي ..
تردين تموتيني..
اني صافنه علية هذا شبي ..
شكو غير انطيتك علاجك ..
ليش طلعتيهن من الشريط ..
وشكو بيها غير مريض وانطيك علاجك ..
ومنو يكول يجوز بدلتي العلاج وحطيتيلي زرنيخ ..
وبدون وعي كمت ابجي واضرب بوجهي والطم ..
ليش هيج تفكر الي يسمعك شيكول عني اني مرتك سامر ..
كااااافي كااااافي ترى ماتضحكين علية بدموعج دموع التماسيح ..
وشمر العلاج الي بيدة بوجهي ..
بعد معليج بيه سمعتي .. وصاح بنت اخوه وكال ..
اسمعي عمو بعد انتي جيبيلي العلاج ..
اهلة كلهم كاعدين محد بيهم اتدخل بس حسيت كل واحد اله نظرة حقد وفرحان على الي صار بيه واني ما اذيت احد بيهم جنت اريد اعيش حياتي وبس..
بدت الحرب علية بوجه اخر وكرهوني اهلة كلهم طبعا بتحريض منه ..
اكل وحدي والشغل كله علية .. و ميقبل اروح لاهلي وممنوع اتصل بأي احد وكال الهم راقبوها ..
رحت اله و كتله..
ليش هيج اني شسويتلك طلكني والله اتنازل عن كل شى بس عوفني..
باوعلي باحتقار صفح وعافني مارد عليه اصلا ..
بقيت اسبوعين على هذا الحال حسيت روحي خدامه وبس.. وبقى ينام جوة ..
واجتي لحظه شيطانيه و كلت خلص راح اكتل نفسي وصعدت لغرفتي وطلعت شفرة الحلاقه ردت اكطع الشريان الي بايدي خفت مصارت عندي جرءة .. كمت وذبيته بسله المهملات وكلت خلي احاول وياه يجوز يتغير..رغم كل الي سواه بيه وبعد عندي امل يتغير وينصلح حاله وياي ..
نزلت جوة لكيته وحدة وامه ماموجودة لان هي جانت ابد متنطيني مجال حتى احجي وياه و بس اجي احجي تكولي شتردين من الولد اتركيه شتردين منه الي بيه مكفيه ...
من شفته وحدة .. كلت يجوز يحن عليه و دخلت علية..
وهو يباوع عليه ..
محتاج شى اسويلك شي ..
انتي اخر وحدة اطلب منج شى..
حسيت عبالك ذليت نفسي كلش هواية صعدت فوك واعصابي ناااار جان عدهم سم مال حشرات ويستخدمون اله سرنجه اخذتها ورحت لغرفتي ما خفت من شى لان ماجنت اعرف حلال لو حرام اذا قتلت نفسي بس اكيد حرام اعيش هاي العيشه ..
خليت السم بالسرنجه وداحقن نفسي واجتي صورة بابا كدامي من جان خايف عليه وبطلني من المدرسه هو وأمي لان انقتلت هاي البنيه .. ونورس تضيع ورايه شنو ذنبها زواجها بعد فترة متكدر بدوني ..
لا مو علمود هذي العائله وهذا الشخص اضيع نفسي وعائلتي طبعا اني حقنت ايدي لكن مادفعت السم ..سحبت السرنجه وذبيتها وكلت من يجي اخوه محمد واكول اله وديني لاهلي وهناك بعد ما ارجع واحجي كلشي لوالدي .. طبيت لغرفتي نمت على وجهي هلكد مابجيت وكعدت العصر على وجع ايدي تموتني..
هاي ليش ايدي توجعني باوعت لكيت ايدي محتقنة من الورم .. بس اني حقنتها مادخلت السم .. طلعت ايدي متلوثه بسبب النيدل .. الوب من الالم لكن من يهتم ..
قررت احجيله لان الالم مو طبيعي ..
نزلت لكيته كاعد ..
كوم وديني لاهلي ..
ليش شعندج ..
حجيتله كلشي ..
انتي مو طبيعيه شلون تسوين هيج ..
كوم وديني اهلك يردون شغل حتى يصدكون اني مريضه ..
بس اني بداخلي اريد بس اشوف والدي واحجيله كل شي بعد مااسكت ..
غيرت ملابسي أو طلعنا اني وياه وهو كلمه مانطق ..
من وصلنا للبيت اخوتي الي عندة شغل والي طالع وي أصدقائه وبابا ماموجود ..
كال لامي .. شوفي بنتج تريد تموت نفسها حتى ابتلي ..
وامي ما حجت شى وياه ابد بس من راح ..
امشي اوديج للطبيب ..
رحت اني وماما ونورس .. واختي حجت للدكتور حتى يكون عنده علم .. طلع عندي جراحه والسبب تلوث بالدم وسوالي عملية صغيره علمود يكدر ينضفلي ايدي من الخراج ..
رجعت للبيت واني دايخه من وجع ايدي لكيت بابا كدامي ..
شافني وكال ..
اشبيها سارة ..
نورس حجت اله .. ضل صافن ..
بنتي تفكر تنتحر .. بس يامرحله
واصله وياعذاب بحيث تفكر تنتحر طفله بعمر الورد هيج يسوون بيها ..
وبقيت يم اهلي اسبوعين اهلي يودوني للدكتور علمود يعقم الجرح لان بقى مفتوح وكل هاي الفترة وسامر مااتصل أو سال عني ..
ورة فترة اجا سامر هو وامه..
والدي اول ماشافهم كاللهم ..
اطلعوا بره .. مانريد نشوف وجوهكم بعد بحياتنا وطلكها لبنتي اطلع بره ..
كل شي ماحجى وطلع .. بيا وجه يحجي ..
وبعد ايام دز اخوته الكبار حتى يتفاهمون على الطلاك ..
فرحت لان حااخلص راح اتحرر من العبوديه ..
وحزينه لان هو اول رجل قلبي يتعلق بيه وحددو موعد نروح لمحامي شرعي ونكمل معامله الطلاق رحت اني وباباو لبست احلى الملابس عندي ومكياج هم حطيت حتى يعرف الفرق بين عيشة اهلي وعيشته ..
من دخلنه للمكتب تلاكيت وياه وجه بوجه جان لابس قميص اسود والبنطرون هم اسود واللحيه طويله ..
شفته انكسر خاطري عليه وهو يباوعلي شلون متغيره ..
لا كافي سارة كل الي سواه وتنهظمين عليه .. وتم الطلاك وعفت سامر وانطوت صفحه سودة من حياتي .. اطلكت واني عمري ١٥ سنه ..
وللحكايه بقيه ..